62
Xiyoonis Ooraththa Sunth
1 Izi xilloteththi maalado poo7o mala phoollanaashe gakkanaas,
izi atoteththi xomppe mala
poo7anaashe gakkanaas
ta Xiyooni gishshas co7u giikke;
Yerusalaame gishshassika
sirphi giikke.
2 Kawoteththati ne xilloteth,
kawotikka ne bonchcho be7ana;
GODAY ba doonan sunththida
ooraththa sunththan
ne xeygettana.
3 Neni GODAA kushe
bonchcho akilile,
ne Xoossa kushen kawota
kallachcha gidana.
4 Hayssafe guye neni,
«Azinay yeggi aggidaaro» geetettaka.
Qasse ne biittayakka,
«Yegetta attidaaro» geetettuku.
Gido attiin,
«Ta ufayssi izinna» geetettana;
ne biittayakka,
«Azinay dizaaro» geetettana;
GODAY nenan ufayettana;
ne biittayakka
azinara dizaaro gidana.
5 Panththi geela7o ekkiza mala,
ne nayti nena ekkana;
mishirazi mishirayn
ufayettiza mala,
ne Xoossi nenan ufayettana.
6 Hanne Yerusalaamee!
Naagizayta
ne dirsata bolla essadis;
istti gallassika
omars guye geettenna;
Intteno GODAAKKO waassizaytoo,
mulekka shempofte;
7 Izi Yerusalaame minththana
gakkanaassinne
biitta ubbaa bolla erettida
katama ooththana gakkanaas
izas shemppo immofte.
8 GODAY ba ushachcha kusheninne
ba wolqqama qesen,
«Hayssafe guye ta intte kath
intte morkketas
quma gidana mala immike;
qasse intte daaburi kessida
ooraththa ushshaa
allagati uyettenna.
9 Gido attiin kaththaa
shiishshidayti maana;
GODAAKKA galatana;
woyne teera maxi shiishshidayti
ta keeththa pengen uyana»
gi caaqqides.
10 Aadhdhite! Iza pengeta baggara
kanththi biite;
deraas oge baasite;
giigsite; shuchchata diggite;
kawoteththatas malaata essite.
11 Be7ite, GODAY
sa7a gaxa gakkanaas,
«Xiyoone macca nays,
‹Hekko nena Ashshizaadey yees;
ne waagay iza kushen dees;
ne qaaday izakkon dees› giite»
giidi awajjides.
12 Istti, «GODAY Wozzida
Geeshsha dereta;
nekka Yegetta Attonttaaro
koyettiza Katamayo» geetettana.