63
Xoossa Xoononne Izi Ashshiza Wolqqa
1 Eedoome biittan diza
Booxira katamappe
zo7o seelo may7o may7idi
yizay hessi izi oonee?
hayssi bonchcho may7idi
ba wolqqa gitateththan hemettishe
yizay izi oonee?
«Xillo haasayzaynne
ashshanaas wolqqay dizay
tana gidikkinaa!» gees GODAY.
2 Ne seelo may7oy woyne gum7iza
asata may7o mala
ays zo7idee?
3 «Gum7izasohozan woyne
tani tarkka yedhdhadis;
kawoteththatappe oonikka
tanara deenna;
tani istta ta hanqon yedhdhadis;
ta bashshankka
istta dirxxereththadis;
istta suuththi ta seelo
may7o bolla dhacettides;
ta may7oy ubbay moorettides.
4 Tani halo kessana
gallassay ta wozinan dees;
ta wozzana gallassayka gakkides.
5 Tani xeelladis shin
maaddizay beettibeenna;
maaddizaadey baynda gishshas
tani malalettadis.
Hessa gishshas ta qesey
taas atoteth ehides;
ta hanqoyka tana minththides.
6 Ta hanqon kawoteththata
yedhdhadis;
ta bashshan istta maththosadis;
istta suuththaaka
biittan gussadis» gaana.
Xoossay Isra7eeles Ooththida Kiyateth
7 GODAA kiyateththi,
GODAY nuus ooththida
ooso ubbaa gishshas,
izi galatettiza
oosoza gishshas,
iza siiqozanne
iza kiyateththa keena,
Isra7eele keeththas
izi ooththidayssa,
ee izi ooththida
lo7o oosota gishshas
ta yootana.
8 GODAYKKA, «Tumukka;
istti ta dereta;
istti taas wordotontta
attuma nayta» gides.
Hessa gishshas izi istta
Ashshizaade gidides.
9 Istta meto ubbaan ceecides;
Iza duussaa erisiza kiitanchchay
istta ashshides;
izi ba siiqoninne
ba maaroteththan
istta wozzides.
Kase aadhdhida wode ubbaan
istta denththidesinne tookkides.
10 Istti gidikko makkallida;
iza Geeshsha
Ayanaakka mishisida
hessa gishshas izi simmidi
isttas morkke gidides;
istta olides.
11 Hessafe guye asay beni wodezanne
Muse wode yuushshi qoppides;
Ba dorsata heenththanchchatara
ubbaafe kessidayssi
izi awan dizee?
Ba Geeshsha Ayana
istta giddon woththidayssi
ha7i awan dizee?
12 Bonchchettida wolqqama qese,
Muses ushachcha kushe
bolla woththides;
baas mernaas sunth kessanaas,
haaththata istta
sinththan shaakkides.
13 Paray aykkoy baynda bazzo biittara
kanththi biza mala,
isttaka ciimma giddora
kaaleththi pinththides;
hessa gishshas
istti dhuphettibeettenna.
14 Duge zulle wodhdhiza
mehe wude mala,
GODAA Ayanay isttas
shemppo immides;
izi deraa hessaththo
kaaleththiday, ne sunththaa
bonchchisanaassa.
Maado Demmanaas Woossiza Woosa
15 Abeet GODAWU,
dummatida, bonchchettidanne
dhoqqu gida ne araataappe
saloppe duge xeella;
ne wolqqaynne
ne mishettiza mishoy awanee?
ne ashketeththaynne
ne qadheteththi
nuuppe haakkides.
16 Abrahaamey nuna erontta aggiko,
Isra7eeleykka
nuna akeekontta aggikokka
neni nuus aawa.
Abeet GODAWU, neni nuus aawa;
Beniisofekka doommidi
ne sunththay nuna wozzizayssa.
17 Abeet GODAWU,
nuni ne ogeppe kezana mala,
nu wozina tullisada
nees yayyontta mala
ays ooththay?
Ne aylleta gishshas gaada,
nees xinxxo gidida
qommota gishshas
gaada nuukko simma.
18 Guuththa wodes ne derey
geeshshasohoza laattides;
ha7i gidikko nu morkketi
ne Keeththaa yedhdhida.
19 Hekko beniisofe nuni neyta;
gido attiin
istta neni haarabeekka;
istti ne sunththankka
xeygettibeettenna.