2
Xoossi Yerusalaame Bolla Ehida Hanqo
1 GODAY Xiyoone macca nayo ba hanqon wostti kawushshidee!
Isra7eele bonchcho
saloppe duge sa7an yeggides;
izi ba hanqo gallas ba
toho shempisizaso
gididaaro zaari
qoppanaas koyibeenna.
2 Yaaqoobe duussaso ubbaa Xoossi
qadhetay baynda dhayssides;
Yuhuda dere miixata
izi ba hanqon laallides;
izi kawoteththanne
dere ayssizayta
kawushshidi duge
biittan yeggides.
3 Izi ba gita hanqon
Isra7eele wolqqa liiqisides;
morkkey iza olanaas yiza wode
ba maado kushe
isttafe denththides;
ba yuushon diza ubbaa
miza tama laco mala
iza hanqoy Yaaqoobe bolla
eexxi kezides.
4 Izi morkke mala
wondafe dafi oykkides;
iza ushachcha kushey
yiishshaa yeddanaas giigsides;
bana lo7izayta ubbaa
morkke mala shukkides;
Xiyoone dunkaaneta bollaka
ba hanqo tama mala qolides.
5 Xoossi morkke mala gididi
Isra7eele dippi histtides;
kawoteththa keeththaaka
dhayssides;
izi miixaakka laallides;
Yuhuda asaa bolla
kayonne zilas darssides.
6 Izi ba keeththa kaththa giddon diza
gaabba shoddiza mala
shoddi olides;
Xoossi Xiyoono
iza layththan layththan
bonchchiza ba7aaletanne
sambatata diggides;
izi ba mino hanqon
kawozanne qeeseza
kawushshides.
7 GODAY yarsho
yarshizasohoza kadhides;
ba keeththaaka aggides;
ba kawoteththa keeththa gimbeta
morkkes aaththi immides;
ba7aale gallassatan
ooththizayssaththo
istti GODAA Keeththan
keehi waassida.
8 GODAY Xiyoone katama gimbe
laallanaas qanxxi dendides;
mixe wodoroza piddisides;
izi istta dhayssontta aggenna;
miixatinne gimbetti laalettida;
isttika issife dhayda.
9 Izi pengeti duge biittan gelida;
kare gordiza birata kolatati
meqeretti wodhdhida;
izi kawozinne daannati
ayzaabetan di7etti bida;
hayssafe guye kase isttas diza
wogay ooththenna;
izi nabetaska hayssafe guye
GODAAPPE ajjuutay qonccenna.
10 Xiyoone dere cimati
biitta bolla co7u gi uttida;
istti ba hu7en gudulla laallida;
maaqaka may7ida;
Yerusalaame geela7oti
duge biitta xeellida.
11 Ta derey wurides;
naateththa naytinne qeeri nayti
katama giddon labbani kundida.
Hessa gishshas ta ayfey
afunththan baljumides;
taas maracey kokkorides;
ta wozinaykka seerides;
12 Olason madunxi kundida
asata mala
katamay giddon istti daaburda;
istti bantta aayeta,
«Kaththinne haaththi
nuus awan dizee?»
gi oychchishe istti qese bolla
borkotidi shemppo kezida.
13 «Hanne Yerusalaame!
Ta ne gishshas
ay gaanaas dandayazinaa?
Ta nena aazara ginasa xeelloo?
Hanne dosettida
Xiyoone geela7oyee!
Ta nena wostta minththeththanaas
dandayazinaa?
ne madunththay
abbafeka cimmatees;
nena paththanaas
dandayzay oonee?
14 Ne nabeta ajjuutay
wordonne coo hada;
ne nagara qonccisidi
nena di7eteththafe ashshettenna;
istti nees yootiza tinbitey
baleththizaazinne
ogeppe kare kessizaaza.
15 Ne achchara aadhdhi biza ubbay
ne bolla ba kushe baqqi kaa7ana;
biitta ubbaan
aadho lo7o geetettiza
katamayanne
dere ubbay ufayettiza
katamaya hanii?» gaana;
qidhishekka ba hu7e qaaththana.
16 Ne morkketi ubbay issife
bantta doona keehi doyda;
bantta ach saxxishe qidhida;
«Nuni izo mittidos!
nuni amottidaara hanno;
shemppora paxa diidi
gakki ayfen be7idos» gida.
17 Xoossi ba qoppidayssa ooththides;
daro wodeppe kase yootida
qaala polides;
izi nena qadhetay
baynda laallides;
ne waayettishin
morkkey ufayettana mala
ne morkketa
dhoqqu dhoqqu histtides.
18 Yerusalaame gimbe
giddon diza asawu!
Xoossaako waassite;
intte afunththi omarsinne
gallas di7o mala goggo;
intteka shempofte;
intte ayfesikka shemppo immofte.
19 Qammaa kumeth dendidi waassite;
Godaa sinththan intte wozina
haaththa mala gussite;
oge doonan koshatti kundida
ne nayta
shemppo gishshas ne kushe
pude izakko denththada woossa.
20 Abeet GODAWU!
Hayssa ne be7a!
Neni hayssaththo kase oona bolla
ooththa erizaakko ane akeeka;
aaya yela dichchida naa
zaara maanaas bessizee?
Qeeseynne nabey
Xoossa Keeththan
hayqqanaas bessizee?
21 Yelagatinne cimati hayqqidi
ogen kundi attida;
yelaga maccassatinne
attumati mashshan hayqqida;
ne hanqettida gallas
istta wodhadasa;
qadhetay bayndaka shukkadasa.
22 Ba7aale gallas diggisas
xeygiza mala
ta morkketa ta bolla xeygadasa;
ne hanqo gallas
oonikka kessi ekkibeenna;
woykko shemppora paxa
attiday deenna;
ta yela dichchidayta
morkkey taappe dhayssides.