22
አብራሃመ ፓጨተꬃ
1 ሄሳፈ ጉየ፥ ፆሳይ አብራሃመ ፓጭስ፤ እ እያ፥ “አብራሃመ” ያግድ ፄግስ።
እ፥ “ዬ” ግድ ኮይስ።
2 ፆሳይ፥ “ኔኒ ዶስያ ነ እስ ናአ ይሳቃ ኤካዳ፥ ሞርያ ቢታ ባ። ያን ታኒ ነና በሲያ እስ ደረ ቦላ እያ ፁሳ ያርሾ ኦꬃዳ ታዉ ያርሻ” ያግስ።
3 ዎንተꬃ ጋላስ አብራሃመይ ጉራ ደንድድ፥ ባ ሀርያ ጫንስ። ባ አይለታፐ ናምአታነ ባ ናአ ይሳቃ ባራ ኤክድ፥ ፁሳ ያርሹዋስ ግድያ ምꬃ ቀር ኤክድ፥ ፆሲ እያ በሲያ በሲ ባናዉ ደንድስ።
4 ሄꬓንꬆ ጋላስ አብራሃመይ ꬎቁ ግድ፥ ሄ በሳ ሃሆራ በእስ።
5 አብራሃመይ ባ አይለታ፥ “ህንተ ሀርያራ ሀይሳን ደእሽተ። ታራ ታ ናኣራ ያ ብድ ፆሰ ጎይንድ፥ ህንተኮ ስማና” ያግስ።
6 አብራሃመይ ያርሹዋ ምꬃ ደንꬅድ፥ ባ ናአ ይሳቃ ቶስስ። እ ባዉ ታማነ ማሸ ኦይክስ። ኤንቲ ናምአይ እስፈ ብሽን፤
7 ይሳቅ ባ አዋ አብራሃመ፥ “ታ አዋዉ” ያግስ።
አብራሃመይ፥ “ዬ፥ ታ ናአዉ” ያግስ።
ይሳቅ፥ “ታማይነ ምꬃይ ሀይስሽ፤ ሽን ፁሳ ያርሾ ኡርገ ዶርሳይ አዉኔ?” ያግስ።
8 ያትን አብራሃመይ፥ “ታ ናአዉ፥ ፁሳ ያርሾ ኡርገ ዶርሳ ፆሳይ ባዉ እማና” ያግስ። ያግን ኤንቲ ናምአይ እስፈ ብዶሶና።
9 ኤንቲ ፆሳይ እያዉ ኦድዳ በሳ ጋክዳ ዎደ፥ አብራሃመይ ያን ያርሾ በሲ ጊግስድ፥ ምꬅ ሂፅስ። ባ ናአ ይሳቃ ቃችድ፥ ሄ ምꬃ ቦላ ዝንእስስ።
10 አብራሃመይ ባ ናአ ሹካናዉ ባ ኩሽያ የድድ ማሸ ኤክስ።
11 ሽን ጎዳ ኪታንቾይ ሳሎፐ፥ “አብራሃመ፥ አብራሃመ” ያግድ ፄግስ። እ፥ “ዬ” ያግድ ኮይስ።
12 ኪታንቾይ፥ “ናአ ቦላ ነ ኩሽያ ዎꬆፋ፤ እያ አይብባካ ኦꬆፋ። ኔኒ ነ እስ ናኣ ታና ድጎና ግሾ፥ ኔኒ ፆሳስ ያየይሳ ታኒ ኤራይስ” ያግስ።
13 አብራሃመይ ꬎቁ ግድ ፄልስ፤ ሄኮ ካጨይ ቱራን ቃፀትዳ እስ ዶርስ ደኤይሳ በእስ። አብራሃመይ ብድ ሄ ዶርሳ ኤክድ፥ ባ ናአ በሳን ፁሳ ያርሾ ኦꬅድ ያርሽስ።
14 ሄሳ ግሾ፥ አብራሃመይ፥ “ጎዳይ እማና” ግድ ሄ በሳ ሱንꬅስ። ሀች ጋካናስ ሄስ፥ “ጎዳ ዙማ ቦላ እመታና” ጌተቴስ።
15 ጎዳ ኪታንቾይ ሳሉዋፐ ናምአንꬆ አብራሃመ ፄግድ፥
16 “ታኒ ጎዳይ፥ ሀይሳዳ ጋዳ ታኒ ታ ሁጰን ነዉ ጫቃይስ፤ ኔኒ ሀይሳ ኦꬅዳ ግሾነ ነ እስ ናኣ ታና ድጎና ግሾ፥
17 ታኒ ነና ቱማ አንጃና። ነ ዘረꬃ ታኒ ሳሎ ፆልንቶ መላነ አባ ጋፃን ደእያ ሻፈ መላ ኦꬃና። ነ ዘረꬃት ባንታ ሞርከታ ካታማታ ላታና።
18 ኔኒ ታዉ ኪተትዳ ግሾ፥ ሀ ሳአ ካዎተꬃት ኡባይ ነ ዘረꬃ ባጋራ አንጀታና” ያግስ።
19 ሄሳፈ ጉየ፥ አብራሃመይ ባ አይለታኮ ጉየ ስምን፥ ኤንቲ ኡባይ እስፈ ደንድድ ባርሳበ ብዶሶና። አብራሃመይ ባርሳበን ደእስ።
ናኮራነ እያ ናይታ
20 ሄሳፈ ጉየ፥ አብራሃመስ፥ “ምልካ ነ እሻ ናኮራስ ናይታ የላሱ፤
21 ኤንትካ ባይራይ ኡፃ፤ ኡፃ እሻት ቡዛ፥
22 አራመ አዋ ቃሜላ፥ ከሳዳ፥ ሃዞ፥ ፕልዳሻ፥ ይድላፋነ ባቱኤላ ጌተቶሶና” ያግስ።
23 ሀ ሆስፑን ናይታ ምልካ አብራሃመ እሻ ናኮራስ የላሱ። ባቱኤል እርብቃ የልስ።
24 ረኡማ ጌተትያ እያ ናምአንꬆ ማጫስያ ቃስ ፀባ፥ ጋሃማ፥ ታሀሳነ ማካ የላሱ።