23
ሳር ሀይቁዋ
1 ሳራ ፄታነ ላታማነ ላፑን ላይꬅ ደአሱ።
2 ሄሳፈ ጉየ፥ እያ ካናነ ቢታን ደእያ ቅርያት-አርባ (ከብሮና) ካታማን ሀይቃሱ። አብራሃመይ ሳርስ ዬክስነ ካዮትስ።
3 ዬክ ስሚድ፥ አብራሃመይ ባ ማቸ አሀ ማታፐ ደንድድ ብድ፥ ህተታ ሀይሳዳ ያግስ፤
4 “ታኒ ህንተ ግዶን እማ፤ ታ ማቸ አሀ ሞጋናዉ ታዉ ህንተ ጋድያፐ ዱፎ በሲ ባይዘርከት” ያግስ።
5-6 ህተት አብራሃመ፥ “ጎዳዉ፥ ኑኒ ኦደይሳ ስአ፤ ኔኒ ኑ ግዶን ዎልቃማ ሀላቃ፤ ኔኒ ነ ማቸ አሀ ኑ ዱፉዋፐ ነና ሎእዳሶን ሞጋ፤ ኔኒ ነ ማቸ አሀ ሞጋናዉ ባ ዱፉዋ ኦንካ ነና ድገና” ያግ ዛርዶሶና።
7 አብራሃመይ ደንድ ኤቅድ፥ ህተታ ስንꬃን ዝግስ።
8-9 እ ኤንታኮ፥ “ህንተ ታና፥ ‘ነ ማቸ አሀ ሞጋ’ ጊኮ፥ ታኒ ግያባ ስእተ። ዞሃራ ናአ ኤፍሮናስ እያ ጋድያ ጋፃን ደእያ ማክፌላ ጌተትያ ጎንጎሉዋ ታ ዱፎ ኦꬃናዉ ባይዛና መላ ኩመꬃ ጋተን ኑና ዛልእሰርከት” ያግስ።
10 ህተ አድያ ኤፍሮን ሄ ዎደ ካታማ ፐንገን ሺቅዳ ባ አሳ ግዶን ኡትስ። ህተት ኡባይ ስእሽን፥ አብራሃመኮ ያግስ፤
11 “ሄሳዳ ግደና፤ ታ ጎዳዉ፥ ታ ኦደይሳ ስአ፤ ታኒ ጋድያካ እያ ግዶን ደእያ ጎንጎሉዋካ ነዉ እማይስ፤ ታኒ ነዉ እያ ታ አሳ ስንꬃን እማይስ፤ ኔኒ ነ ማቸ አሀ ሞጋ” ያግስ።
12 አብራሃመይ ሄ ቢታ አሳ ስንꬃን ዛር ዝግድ፥
13 አሳይ ስእሽን ኤፍሮና፥ “ታ ኦደይሳ ስአርክ! ታኒ ሄ ጋድያ ጋተ ቃንፃና፤ ኔኒ ታፐ ኤካርክ። ሄሳን ታኒ ታ ማቸ አሀ ሞጋና” ያግስ።
14-15 ኤፍሮን አብራሃመኮ ዛሪድ፥ “ታ ጎዳዉ፥ ታኒ ኦደይሳ ስአ፤ ጋደይ ኦይዱ ፄቱ ብራ ሳንትመ ከሳና፤ ሽን ሄስ ነ ግዶንነ ታ ግዶን አይብካ ግደና፤ ነ ማቸ አሀ ሞጋ” ያግስ።
16 አብራሃመይ ህተት ስእሽን፥ ኤፍሮን ግዳ ጋትያ ኤክስ፤ ሄ ዎደ ሚሸን ኦይዱ ፄቱ ብራ ሳንትመ ኤፍሮናስ እሚስ።
17 ያት ስሚድ፥ ማምረ ካታማ ማታን ማክፌላን ደእያ ኤፍሮና ጋደይ፥ ያን ደእያ ጎንጎሎይነ ሄ ጋድያን ደእያ ምꬃ ኡባይ፥
18 ካታማ ፐንገን ሺቅዳ ህተታ ኡባ ስንꬃን ዎጋꬆ አብራሃመ ጋደ ግድስ።
19 ሄሳፈ ጉየ፥ አብራሃመይ ባ ማችዉ ሳራ ካናነ ቢታን (ከብሮና) ጌተትያ ማምረ ካታማ ማታን ደእያ ማክፌላ ጌተትያ ጋደ ጎንጎሉዋን ሞግስ።
20 ሄሳ ግሾ፥ ሄ ጋደይነ ያን ደእያ ጎንጎሎይ ህተታ ስንꬃን ህግያን አብራሃመስ ዱፎ ግድስ።