32
1 “Kagamu na barangengo ma na masaoka, kamu ka rongomia niqu tsaqina goko,
kamu ka rongomi vatavidoua na omea kau tsaria.
2 Niqu sasani sauba ke sangagamu dou
vaga kalina na kolobu e pukatsuna tana kao
me gini dato dou na buruburu vaolu.
Niqu goko sauba kara vaga kalina e tumu na usa
me malobusia na omea tsukatsuka vaolu.
3 Inau sauba kau tsonikaea na asana na Taovia,
migira nina tinoni sauba kara tsarivulagia gana loki tsapakae.
4 “Na Taovia aia nogo nimui isutugu susuliga,
e doulaka me gotolaka pipi sui tana nina omeomea.
Nimui God e gotolaka me mana saviliu;
maia e naua moa na omea e mana me goto.
5 Migamu moa amu tau totukakai i konina aia me tau ulagamui kamu lia nina tinoni,
amu sasi sosongo mamu tinoni vanga peropero.
6 ?Egua ti amu nauvaganana vania na Taovia,
igamu na tinoni bule manana mamu tau sasaga?
Aia na tamamui, maia nogo e aqosigamu,
me naua ti amu gini lia na puku loki.
7 “Kamu padavisua i sau tana tagu ni sau vasau;
ma kamu veisuagira na tamamui kara tsarivanigamu na omea ara laba,
kamu veisuagira na tuqatuqa kara turupatuna vanigamu na omea ara laba i sau.
8 Aia God Susuliga Sosongo e tusu kao vanigira na puku sui;
maia e pedevanigira na nauna i tana kara totu.
Me molovanigira pipi puku tango kesa nina angelo ke reitutugugira,
9 migira moa na kukuana a Jakob e vilivani segenina nogo ia.
10 “Na Taovia e reigira ara liu bamai i laona na kaomate,
i tana e susuliga sosongo na guguri.
Maia nogo e ravisigira me reitutugugira,
vaga nogo ti na dalena na matana aia.
11 Vaga na manuloki e sasania na dalena na lovo,
mi kalina e reia laka e varangi ke puka, maia e tabedouginia na rapona,
me vaga goto na Taovia e tabedougira na Israel mara gini tau puka.
12 Aia segenina nogo na Taovia e idagana sautu vanigira nina tinoni,
me tau goto sangâ sa god ni veratavosi.
13 “Aia e tamivanigira kara tagaovigira igira ara totu i kelana na vungavunga,
ma kara gania na omea ara dato i laona na uta.
Mara tsodoa na bulumitsua atsi i laoqira na vatu;
ma niqira gai na olive ara molo vuaqira dou tana kao vatuvatuga.
14 Niqira buluka ma niqira naniqoti e dadanga dou na tsutsuqira;
mara tamanina na sipi, ma na naniqoti, ma na buluka dou liuliu bâ,
ma na uiti ma na uaeni dou liuliu sosongo bâ.
15 “Igira nina tinoni na Taovia ara tamani omea danga,
me atsa moa e vaga ia, migira ara petsakoe mangana moa;
ara mutsa sosongo me gini subu na tobaqira.
Igira ara piloligi tania God aia e aqosigira
mara sove tania niqira vagamauri susuliga.
16 Ara samasama vanigira na god peropero, me gini masugu na Taovia;
me gini momosa loki tobana na reiana na omea seko ara naua.
17 Ara savori-kodoputsa vanigira na god ara tau mana,
igira na god vaolu ara tau saikesa donaginigira na mumuaqira,
na god igira na Israel ara tau saikesa goto nogo rongomangaqira.
18 Ara padalea niqira God, niqira vagamauri susuliga,
aia nogo e tusumauri vanigira.
19 “Mi kalina na Taovia e morosia na omea seko vaga ara naua igira na dalena mane ma na dalena daki,
me gini kore loki me sove tanigira.
20 Maia e tsaria, ‘Igira na tinoni tsatsarae sosongo ma vanga malapalu girani,
sauba e utu goto kau sangagira,
ma kau reia na omea ke laba vanigira.
21 Igira ara murigira na god peropero e tagara soaqira, me gini momosa tobaqu,
mau gini masugu vanigira.
Me vaga ia, minau sauba kau gini aqo kesa na puku tavosi e tagara soana,
migira kara gini kore;
ma kau naua migira kara masugu vanigira na puku na bule.
22 Na korequ sauba ke irudato vaga na lake
me ke iruvigira pipi sui na omea tana barangengo.
Me ke tsau bâ tana barangengo na mate
me ke ganigira na lamuqira na vungavunga.
23 “ ‘Inau sauba kau molomai vanigira na rota seko loki e vô ke sui,
ma kau gini aqo pipi sui niqu pipili gana kau vanasiginigira.
24 Migira sauba kara gini mate na vitoa ma na masagi;
ma na lobogu seko loki sosongo.
Me sauba kau molomaigira na omea tuavati atsi kara ganigira,
ma na muata vogata kara gatigira.
25 Na vailabu sauba ke alomaia na mate tana sautuna na veraqira;
ma na omea mataguniga loki sauba ke gadovigira i laona na valeqira.
Na mane ma na daki vaolu sauba kara viri mate sui,
me atsa goto igira na baka tetelo se na tuqatuqa sauba ke utu goto kara gaegira.
26 Eo, e tangomana manana kau toroutsanigira saikesa,
rongona ke tagara goto ke kesa ke padagira.
27 Mau tau moa ngaoa igira gaqira gala kara gokokae
ma kara tsaria laka igira nogo ara tuliusigira niqu tinoni,
kalina inau segeniqu nogo au kedegira.’
28 “Na Israel aia e kesa na puku tinoni tau sasaga;
ara tau saikesa padagadovia sa omea.
29 Ara tau tangomana kara reigadovia na rongona gua ti gaqira gala ara tuliusigira,
mara tau goto tangomana kara padagadovia na omea vaga ia ara laba.
30 ?Matena gua ti e kesa lelê moa na gala e tangomana na tuliusiaqira kesa toga na Israel,
me ruka lelê moa ara ka tangomana na tuliusiaqira sangavulu toga?
Rongona na Taovia niqira God e piloligi tanigira;
niqira God susuliga tsapakae e sauligigira.
31 Igira gaqira gala ara dona segeni nogo laka niqira god igira ara maluku lê,
mara tau saikesa susuliga vaga niqira God igira na Israel.
32 Gaqira gala ara tabaru sosongo vaga nogo igira na Sodom ma na Gomora i sau,
ara vaga saikesa nogo na itai na uaeni ara molo vuaqira vavai ma na tabatu i koniqira,
33 ara vaga na uaeni ara aqosiginia na tabatu e totu tana muata vogata.
34 “Na Taovia e padavisua na omea ara naua igira gaqira gala;
maia e pipitua moa na tagu dou ti ke kedegira.
35 Na Taovia sauba ke tangotugu me ke kedegira;
sauba ke labamai na taguna i tana igira kara puka;
me maimai varangi nogo na dani i tana kara mate;
36 Na Taovia sauba ke laumaurisigira nina tinoni
me ke galuvegira igira ara aqovania,
kalina ke reia laka ke nanga lê sui nogo gaqira susuliga,
me ke tagara nogo ke kesa ke kauvisu.
37 Mi muri ma na Taovia sauba ke veisuagira nina tinoni,
‘Iava ara ba liu igira na god susuliga igamu amu norugira ri?
38 Igamu amu palaginigira na seregana nimui savori-kodoputsa,
mamu tusuvanigira na uaeni kara inuvia.
Bâ, mi kalina ia kamu molovanigira igira kara mai sangagamu;
kamu molovanigira igira kara laumaurisigamu.
39 “ ‘Inau, inau segeni au God;
me tagara goto sa god tavosi ke mana.
Inau nogo au matesi tinoni, mau maurisi tinoni,
mau bokali tinoni mau tali tinoni,
me tagara goto ke kesa tangomana ke utusia na omea inau au naua.
40 E mana manana vaga nogo inau na God mamauri,
au sulukaea na limaqu mau vatsa
41 laka sauba kau asa vavangâ niqu isi
ma kau reia laka ke laba na pedegoto.
Minau sauba kau tangotugu koniqira gaqu gala
ma kau kedegira igira ara reisaviau inau.
42 Tana niqu pipili sauba ke kukudu na gabuqira,
ma niqu isi kau matesiginigira sui igira ara suamangaqu inau.
Me sauba e utu goto kau gaea asei ke vailabu koluau;
e atsa moa igira ara boka migira ara laugira tana vailabu, sauba kara mate sui.’
43 “Igamu na puku tavosi sui, kamu tsonikaegira igira nina tinoni na Taovia,
rongona aia e kedegira sui igira ara labumatesigira,
me tangotuguqira i koniqira gana gala,
me padalegira niqira sasi igira nina tinoni.”
44 Mi kaira a Moses ma Josua ara ka tsokolokia na linge iani, rongona kara gini rongomia igira sui na tinoni ni Israel.
Nina Susuina Goko a Moses
45 Mi kalina a Moses e sui na sauana nina parovata God vanigira na tinoni,
46 maia e tsaria, “Igamu nimui aqo kamu muridougira pipi sui na ketsa girani inau au saunogoa vanigamu i dani eni. Kamu tsaritugutugu vanigira na dalemui rongona kara gini muri kalavatavigira dou pipi sui nina parovata God.
47 Na parovata girani ara tau na goko kobakoba lê moa. Igira saikesa nogo na pukuna na maurimui. Kamu muridougira me sauba kamu gini mauri oka tana kao i tabana na Kô Jordan, i tana amu vangaraua na ba totuviana.”
48 Mi tana dani goto nogo ia ma na Taovia e tsarivania a Moses,
49 “Ko vano tana kao vungavungaga ni Abarim tana butona kao ni Moab, gana ngongo savu na verabau ni Jeriko. Mo ko dato bâ tana Vungavunga Nebo mo ko morosia na kao ni Kanaan aia inau au vangaraua na tusuvaniaqira na tinoni ni Israel.
50 Igoe sauba ko mate i kelana na vungavunga ia, vaga nogo a Aaron na kulamu e mate i kelana na Vungavunga Hor,
51 rongona i kagamu sui amu ka tau tutuniqu kakai inau, mamu ka paluvangamaqu i mataqira na toga ni Israel kalina igamu amu totu tana kô ni Meriba, ligisana na vera ni Kades, tana kaomate ni Sin.
52 Igoe sauba ko morosi-aoa moa na kao inau sauba kau sauvanigira na tinoni ni Israel me utu saikesa vanigo moa ko sage bâ i laona.”