33
A Moses e Nongia God Ke Tabugira Na Puku Tana Israel
1 Idavia na mateana, ma Moses nina mane vivili God, e nonginongi mateqira na tinoni tana Israel me tsaria,
2 “Na Taovia e talumai tana Vungavunga Sinai;
me dato vaga na aso i kelana na vera ni Edom,
me mararasigira nina tinoni tû tana Vungavunga Paran.
Mara sangavulu toga na angelo ara totu kolua,
ma na lapina lake iruiru tana limana madoa.
3 Eo, na Taovia e galuvegira nina tinoni,
me reitutugudougira igira aia e tamanigira.
Me vaga ia migita ka tsuporu i matana
ma ka muridougira pipi sui nina ketsa.
4 Gita ka muria na Ketsa aia Moses e tusuvanigita,
na Ketsa iani aia na omea loki putsikae bâ igita a tamanina.
5 Na Taovia e lia niqira taovia tsapakae igira nina tinoni ni Israel
kalina igira sui niqira puku ma niqira ida ara saikolumai sui.”
6 Miani na omea a Moses e tsaria tana rongoqira igira tana puku konina a Ruben:
“Ke tau matemotu na puku konina a Ruben,
atsa moa ti igira ara tau danga.”
7 Mi tana rongoqira igira tana puku konina a Juda aia e tsaria:
“Taovia, ko rongomia niqira ngangaidato vanigo gana ko sangagira;
ko adisaigira tugua kolugira na puku tavosi.
Taovia ko vailabu tuguqira,
mo ko sangagira tanigira gaqira gala.”
8 Mi tana rongoqira igira tana puku konina a Levi aia e tsaria:
“Taovia, igoe o sauvanigira na Levite nimu maneaqo dou,
kaira ruka na vatu na Urim ma na Tumim
gana kara tsodovulagiginia na omea igoe o kilia.
Igoe o tovogira i Masa
mo tsodovulagia niqira sasaga tana kô i Meriba.
9 Igira ara tau goto gaegira na tamaqira ma na tinaqira, na tasiqira ma na daleqira,
rongona kara gini totukakai i konimu igoe.
Igira ara muridougira nimu ketsa,
mara taoni kalavatavia niqira tabana na vaitasogi kolugo.
10 Igira sauba kara sasaniginigira na tinoni na muriana nimu Ketsa;
ma kara savori-kodoputsa i kelana nimu belatabu.
11 Taovia, ko sangâ niqira puku ke gini dato susuliga;
mo ko tabedoua na aqo kara naua vanigo.
Ko tsogori rapasigira sui gaqira gala;
ma kara tau goto tukae tugua.”
12 Mi tana rongoqira igira tana puku konina a Benjamin aia e tsaria:
“Iani nogo na puku na Taovia e galuve sosongolia me reitutugudoua.
Aia e mataligira i laona na dani popono,
me totu i levugaqira patupatu.”
13 Mi tana rongoqira igira tana puku konina a Josep aia e tsaria:
“Taovia ko vangalaka vania niqira kao, mo ko malobusiginia na usa e talu i gotu,
ma na kô e talu i vavana na barangengo.
14 Ko molomaia na aso ke gini mada dou niqira vuagai,
ma kara gini vungu danga dou pipi tana tagu na vua.
15 Migira sui niqira tetena ni oka kara lakatana dou na tsuka omea i laona.
16 Ma niqira kao ke danga dato pipi vatana na omea dou sui i laona,
talu tana nimu vangalaka igoe Taovia o goko i laona na gai iruiru.
Migira na vangalaka girani kara tsunamai i koniqira igira tana puku konina a Josep,
rongona aia nogo na ida i laoqira na kulana.
17 A Josep e susuliga vaga kesa na buluka mane,
ma na kakatsana ara vaga na kakatsana kesa na buluka atsi.
Igira na toga tana puku konina a Manase ara vaga nogo kesa na kakatsana,
migira na sangavulu toga tana puku konina a Epraim ara vaga kesa goto na kakatsana.
Me gini kaira na kakatsana karani, aia e sokamuginigira na puku tavosi sui,
me takuviginigira tsau bâ tana vovosana na barangengo.”
18 Mi tana rongoqira igira tana puku ka koniqira a Sebulun ma Isakar aia e tsaria,
“Ko molovania na puku konina a Sebulun ke gini pabo dou bâ niqira tamani tana tsabiri omea i tasi,
ma niqira tamani igira tana puku konina a Isakar ke pabo babâ i veraqira.
19 Igira ara soamaigira na tinoni ni veratavosi kara bâ tana niqira vungavunga,
i tana ara savorigira na kodoputsa e ulagana.
Igira ara tsodoa niqira qolo tana aqo i tasi
mi laona na one liligina na tasi.”
20 Mi tana rongoqira igira tana puku konina a Gad aia e tsaria,
“Tsonikaea na Taovia aia e naua me gini loki niqira butona kao.
A Gad e totu pipitu vaga saikesa na laeone e varea kesa na omea tuavati atsi
gana ke ngotsia na limana se na lovana.
21 Kalina igira na tinoni lokiloki tana Israel ara saimai sui na vota kao,
migira na Gad ara aditamaniqira segeni na butona kao dou liuliu bâ;
igira na butona kao e ulagaqira na ida moa kara tamanina.
Migira ara muridougira pipi sui nina ketsa ma nina vali na Taovia.”
22 Mi tana rongoqira igira tana puku konina a Dan aia e tsaria,
“A Dan aia e kesa na laeone vaolu;
aia e tsipudatomai talu i Basan.”
23 Mi tana rongoqira igira tana puku konina a Naptali aia e tsaria,
“Na Taovia e vangalaka sosongo vania na puku konina a Naptali;
ma niqira butona kao e tû tana reku Galilii me tada.”
24 Mi tana rongoqira igira tana puku konina a Aser aia e tsaria,
“Na Taovia e vangalaka loki sosongo bâ vania na puku konina a Aser liusigira bâ na puku tavosi sui.
Aia kara padalokia bâ i laoqira igira na kulana sui,
ma kara danga dou na gai na olive i laona niqira kao.
25 Ma na matsapakapu tapala kara totu kaputigira na veraqira,
ma kara gini totu raviravi dou sailagi.”
26 Mi murina nina nonginongi ma Moses e tsarigotoa,
“Tinoni ni Israel, e tagara goto sa god ke vaga nimui God,
aia e sage tana mararana loki i gotu tana masaoka
me liu i laona na parako gana ke mai sangagamu.
27 God aia nogo e isutugumui sailagi;
me tangolikaeginigamu na limana saliu.
Aia e tsialigigira nogo gamui gala kalina igamu amu maimai moa i sautu,
me ketsaligamu kamu matesiligigira sui.
28 Me vaga ia, migamu na kukuana a Jakob sauba kamu totu tana rago,
ma kamu totu raviravi dou tana kao e danga na mutsa ma na uaeni i laona,
mi tana na kolobu e talu tana masaoka e malobusia na kao.
29 !Igamu na Israel, kamu magemage dou!
E tagara goto sa puku tinoni ke atsa kolugamu igamu,
igamu nogo na puku na Taovia e laumaurisigamu.
Na Taovia segenina nogo aia nimui tako ma nimui isi,
gana ke isutugumui me ke sangagamu kamu gini tangomana.
Igira gamui gala sauba kara nongigamu kamu galuvegira,
migamu sauba kamu tsogori tsunaligira.”