102
1 Senhor, endu ke ajerurea.
Ndea py tonhendu ajapukaia.
2 Xee ajexavaia ára ejexa uka e'ỹ eme.
Endu ke. Ajapukai ramo xepytyvõ voi!
3 Mba'eta xerekove opa ma ovy hataxĩ rami,
xekãgue ma tata py okaia ramigua aendu.
4 Nhuũ ojaya pyre ipirupaa rami avi xepy'a re oĩ va'e aendu.
Akaru aguã voi xerexarai jepi.
5 Xepire voi ojapa ma xekãgue re,
xepoaẽ atã ainya va'e gui.
6 Xee ma guyra tekoa e'ỹa rupigua rami aiko,
urukure'a oogue rupi rive oiko va'e rami.
7 Ndake kuaavei,
guyra'i ha'e ae'i va'e oo áry oiko va'e rami.
8 Xerovaigua kuery ma ára pukukue re xere ovy'a reia rupi ikuai.
Xevy ipoxy vy xerery rupi ijayvu vaikue-ikue.
9 Mbojape 'rãgue py tanhimbu re akaru,
xerexay re irũmba rei va'e ay'u aikovy.
10 Ha'e ramigua ae aendu ndee xejou vai vy ndevai ramo,
mba'eta xemboyvate va'ekue ri aỹ ma xereity.
11 Xe'ára opa ovy pytũ rai'i ouvy vy kuaray'ã ovya rami.
Nhuũ ipiru ovy va'e rami akanhy.
12 Ha'e rã ndee Senhor, raka'e rã peve 'rã reiko.
Nderery re ima'endu'aa 'rã avakue okuave teria ja.
13 Ndee repu'ã vy remboaxy 'rã Sião tetã pygua kuery.
Ovaẽ ma ha'e kuery remboaxya rexa uka aguã,
hi'ora ovaẽ ma.
14 Nerembiguai kuery oayvu Sião py ita ikuai va'e voi,
ha'e pygua ku'ikue re eteve voi oexaxe vai okuapy.
15 Yvy regua kuery ha'e javi Senhor rery oendu vy ikuai 'rã ojererokyjea rupi,
yvy regua ruvixave kuery voi ogueroporaei 'rã hexakãa.
16 Mba'eta Senhor Sião tetã omoĩ atã vy
oexa uka guexakãa.
17 Oendu iporiaukue'i ojerurea,
ndojapyxaka e'ỹi ha'e kuery ojapukaia re.
18 Ha'e nunga ta'ipara toiny raka'eve rã guarã.
Ha'e rire ikuai jevy va'e voi ogueroporaei 'rã Senhor:
19 “Guenda iky'a e'ỹ va'e ijyvate va'ea gui,
yva gui ae Senhor oma'ẽ oiny yvy katy,
20 oendu aguã nhuã py ikuai va'e poaẽa,
ha'e ogueraa jepe aguã omano aguã rami omoingo pyre.
21 Sião tetã py ima'endu'aa aguã Senhor rery re,
ha'e Jerusalém py ogueroporaeia aguã.
22 Ha'e nunga oiko 'rã yvy regua kuery ono'õmba,
huvixa kuery ipo'aka va'e voi
Senhor pe ikuai aguã oupa jave.”
23 Ha'e rami teĩ ha'e ma oipe'a xembaraetea,
omboapu'a'ive aikovea.
24 Xee aipoa'e va'ekue:
“Xeruete, xereraa eme ke, aikovea mbyte teria ja.
Ha'e rã ndee ma reikove 'rã raka'e rã peve.
25 Jypy'i ete ma renhono va'ekue yvy ytarã,
ndepo py ae rejapo va'ekue yva.
26 Ha'e nunga ha'e javi okanhymba 'rã,
ha'e rã ndee ma reiko riae 'rã.
Ha'e nunga inhymave 'rã ovy ajukue rami,
ao rami remboekovia 'rã.
Amboae rami 'rã opyta.
27 Ha'e rã ndee ma ha'ekue ae 'rã reiko.
Nderekove ma opa va'erã e'ỹ.
28 Nerembiguai ra'y kuery voi ikuai porã 'rã,
hamymino kuery ma remoingo 'rã nerenonde.”
Nhanderuete nhanemboaxya re ijayvua
Mboraeirã Davi ombopara va'ekue.