148
Pavẽ ogueroporaei aguã regua
1 Aleluia!
Peroporaei Senhor yva áryve rupi,
peroporaei yvate etea rupi!
2 Ixupegua anjo kuery ha'e javi, peroporaei pekuapy.
Ixondaro kuery yva regua ha'e javi, peroporaei pekuapy!
3 Kuaray ha'e jaxy, peroporaei pekuapy!
Jaxy-tata hendy va'e ha'e javi, peroporaei pekuapy!
4 Yva yvatevea rupi oĩ va'e, eroporaei avi,
yva áry yy ikuai va'e voi.
5 Togueroporaei okuapy Senhor rery!
Mba'eta ha'e ijayvu ramo opa mba'e oiko raka'e.
6 Omoĩ atã guive raka'e rã peve guarã.
Ha'e kuery ikuai aguã oeja va'ekue oaxa va'erã e'ỹ.
7 Yvy re pendekuai va'e, peroporaei Senhor,
ypo tuvixa va'e ha'e typya regua ha'e javi!
8 Onhemboxi va'e ha'e amandau,
yro'y apĩ ha'e yvy rataxĩ,
yvytu atã onhe'ẽ rendu va'e,
9 yvyty ha'e yvy'ã'i ikuai va'e,
yvyra hi'a va'e ha'e yary ikuai va'e,
10 mymba inharõ va'e ha'e vaka kuery,
yvy rupi otyryry ha'e guyra'i oveve va'e,
11 yvy regua huvixave kuery, ha'e javi regua guive,
yvatekueve ha'e yvy regua joe oikuaa pota va'e kuery ha'e javi,
12 kunumigue ha'e kunhataĩgue,
kakuakueve'i va'e ha'e kyrĩgue.
13 Togueroporaei okuapy Senhor rery,
mba'eta hery anho yvateve va'e.
Hexakãa ma yvy ha'e yva áryve rupi oĩ.
14 Ombopo'akave ojeupegua kuery,
ixupegua iky'a e'ỹ va'e kuery ha'e javi ogueroporaei aguã,
hembiayvu Israel kuery regua guive.
Aleluia!