45
1 Ayvu porã anho oĩ xekuraxõ re.
Huvixave peguarã ae kova'e mboraei ajapo.
Ombopara porã kuaa va'e rami 'rã xeayvu.
2 Ndee ma avakue ra'y kuery ikuai va'e gui neporãve va'e.
Ndejuru gui ayvu porã anho oẽ.
Ha'e nunga rupi ae Nhanderuete nemoingo porã raka'e rã peve guarã.
3 Ndepy'a guaxuve va'e, emoĩ ndejee ndekyxe.
Emoĩ avi ndeyvatea ha'e ndepo'akaa.
4 Ndepo'akaa rupi tereo kavaju áry,
anhetẽ va'e ha'e teko porã re vy.
Ha'e gui ndepo reiporu kuaa regua ojapo 'rã nhomondyipaarã ojekuaa aguã rami.
5 Oreruvixave, nderu'y ma hakua porã,
nderovaigua kuery kuraxõ re oike 'rã.
Ha'e ramo yvy regua kuery nenhe'ẽ rendua rupi 'rã ikuai.
6 Xeruete, ndepo'akaa ma raka'e rã peve 'rã oĩ.
Ndepo'akaa py anhetẽ rupi 'rã rejoguereko.
7 Rerovy'a teko porã, ha'e rã teko vai ma rejou vai.
Ha'e nunga rupi ae Nhanderuete Nderuete huvixaverã nemoĩ vy
neakã áry azeite omoĩ neirũ kuery gui ndererovy'ave vy.
8 Ndeao ma mirra, aloés ha'e cássia gui heakuã porãmba.
Ndero ma marfim gui ojapo pyre.
Opy ma onhendu 'rã ixã va'e pu nembovy'aarã.
9 Kunhague ikuai 'rã nerembiguai, huvixave rajy kuery guive.
Reiporu kuaa regua re oĩ ndera'yxy,
ouro iporãve va'e Ofir guigua py ombojegua pyre.
10 Xerajy, endu ke. Eikuaa pota xeayvua re.
Nderexarai ke neretarã kuery ha'e nderu ro pygua kuery gui.
11 Ha'e ramo ma huvixave oguerovy'a 'rã neporãa.
Ha'e ma nde-Senhor ramo
henonde eĩ nerenapy'ã re.
12 Ndea py ou 'rã Tiro pygua rajy mba'emo ome'ẽ va'erã reve.
Heta va'e kuery regua oguerekopave va'e ojerure 'rã reipytyvõ aguã.
13 Opy ma oĩ 'rã huvixave rajy pavẽ gui iporãve va'e.
Ijao ma ouro guigua py ojegua va'e.
14 Ijao potypa va'e reve ogueroikea 'rã heruvy huvixave renonde.
Irũ kunhataĩgue hakykue ou va'e ogueru 'rã oĩa py.
15 Ovy'a ete reve 'rã ogueru,
huvixave ropy ogueroike 'rã.
16 Nderu kuery rekovia ndera'y kuery ikuai 'rã.
Ha'e va'e kuery remoĩ 'rã huvixarã yvy jave re.
17 Xee ajapo 'rã nderery re ima'endu'aa riae aguã rami.
Yvy regua kuery ndereroporaei 'rã raka'e rã peve.
Nhanderuete nhanhemiaty imbaraete va'e re ijayvua
Jogueroporaei va'e pe Coré ra'y kuery kunhague oporaei aguã ombopara va'ekue.