46
1 Nhanderuete ma nhanhemiaty imbaraete va'e oiko,
nhandereraa jepearã jajexavai jave nhandea'i pyve oĩ va'e.
2 Ha'e nunga rupi ndajakyjei 'rã amboae rami yvy ojeapo teĩ,
ha'e yvyty ikuai va'e ye'ẽ mbyte py onhemombo,
3 yy opu'ã-pu'ã vy yjuipa,
opu'ã ovy ramo yvyty voi oryryipa teĩ.
4 Oĩ peteĩ yakã Nhanderuete pegua tetã mbyte rupi oxyry vy
ombovy'a 'rã ha'e pygua kuery,
Yvate ete va'e pegua oo iky'a e'ỹ va'e rupi voi.
5 Tetã mbyte ma Nhanderuete ae oĩ.
Ha'e ramo neĩ peteĩ henda py ma voi ndoityai 'rã.
Nhanderuete oipytyvõ 'rã ko'ẽmba guive.
6 Yvy regua kuery haxẽmba,
tetã ikuai va'e omyĩ 'rã.
Ha'e rã Nhanderuete oayvu omonhendu ramo yvy tykupa 'rã.
7 Nhandereve ma oiko Senhor ixondaro reta va'e,
Jacó Ruete ae oĩ nhanhemi aguã.
8 Peju ke pexa Senhor rembiapokue,
yvy re mba'emo ombovaipaague.
9 Mba'eta yvy apy peve omomba joe opu'ãa.
Omopẽmba guyrapa ha'e yvyra rakua,
karóxa joe opu'ãa pygua guive oapypa tata py.
10 Aipoe'i: “Pepytu'u peikuaa aguã xee ae Penderuete aikoa.
Xee ma xeyvate 'rã yvy regua kuery áryve,
yvy jave re ete 'rã xeyvate”, he'i.
11 Nhandereve oiko Senhor ixondaro reta va'e,
Jacó Ruete ae oĩ nhanhemi aguã.
Nhanderuete yvy regua kuery ruvixave pe oporaeia
Jogueroporaei va'e pe Coré ra'y kuery ombopara va'ekue.