65
1 Oreruete, ndere rojeroviaa rupi rogueroporaei 'rã Sião tetã py!
Ndevy pe rojapo 'rã ronhemboayvuague.
2 Ronhembo'ea rendu va'e,
ndea py ou 'rã opa marãgua avakue
3 gueko vaiague re ndovy'ai vy.
Rojejavyague orere ipo'aka ramo
ndee rembogue 'rã.
4 Ovy'a ete 'rã ndejeupe guarã reiporavo va'ekue.
Ha'e va'e kuery onhemboja 'rã ndere, nderoka py ikuai aguã.
Ha'e ramo rovy'a vaipa 'rã ndero py oremboaxya rexa uka va'e re,
ndevygua templo iky'a e'ỹ va'e py.
5 Oreruete orereraa jepea, ndeguigua teko porã re rojapukai ramo
ndee orembovai 'rã nhomondyipaarã rejapo vy.
Yvy apy re ikuai va'e ha'e ye'ẽ mombyryve oĩ va'e rupigua
ndee anho nerarõ okuapy.
6 Nembaraetea rupi vy remombyta porã raka'e yvyty,
ndepo'akaa py renhemonde reve.
7 Ye'ẽ revovo onhendu ramo remombytu'u ju,
yai opu'ã-pu'ã va'e revovo,
yvy regua kuery revovo guive.
8 Ha'e ramo hexa pyrã rejapo va'e
yvy apy re ikuai va'e oexa vy onhemondyipa 'rã okuapy.
Kuaray oua katy gui ha'e oikea katy gui ou va'e
rejapo 'rã ovy'a reve oporaei okuapy aguã rami.
9 Yvy re reikuaa pota vy remoakỹ 'rã,
remoingo porã ete 'rã.
Yakã'i Nhanderuete pegua typy porã meme 'rã.
Mba'emo ra'yĩ oiko porã 'rã,
ha'e rami aguã rami remoingo rire.
10 Ha'e rami vy remoakỹ 'rã yvy roikaraĩague rupi,
rembojojapa 'rã yvy'ã ikuai va'e.
Oky rayvi py remoakỹ
ronhotỹ va'ekue remoingo porã vy.
11 Ma'etỹa opaa py rexa uka 'rã ndeporayvua coroa rami iporã va'e.
Repyrõague rupi reja 'rã yvy moingo porãarã,
12 teko e'ỹa rupi jai rogue ikuai va'e re guive.
Yvy'ã ikuai va'e voi ovy'a 'rã.
13 Mymba heta 'rã ikuai nhuũndy rupi,
ha'e yvy'ã guy rupi ma hary anho 'rã ikuai.
Ha'e nunga ha'e javi ovy'a vy oporaei 'rã okuapy.
Nhanderuete oguerovy'aa ague
Jogueroporaei va'e pe mboraeirã ombopara pyre.