66
1 Yvy jave re pendekuai va'e, peroporaei Nhanderuete!
2 Peporaei hery rupi iporã ramo,
perovy'a mboraei rupi.
3 Nhanderuete pe aipo peje: “Rejapo va'ekue ma iporã ete!
Ndepo'aka etea rupi nderovaigua ikuai va'ekue ojexa uka 'rã nenhe'ẽ rendu vy.
4 Yvy jave regua nerenonde 'rã oĩ guenapy'ã re,
mboraei rupi oporaei 'rã ndevy,
nderery rupi oporaei 'rã okuapy.”
5 Peju ke, pexa Nhanderuete rembiapokue,
avakue ra'y kuery pe mba'emo porã ojapo va'ekue ha'e javi.
6 Ye'ẽ omboypa raka'e yvy piru reia rive opyta aguã rami,
ha'e yakã mbyte rupi guive oaxaa yvy rupi.
Ha'e py ma javy'a hexe.
7 Opo'akaa rupi opena riae 'rã,
oexa pota 'rã yvy regua kuery re.
Nonhe'ẽ rendui va'e tonhemboyvate eme.
8 Yvy regua kuery, penema'endu'a porã ke Nhanderuete re,
pendu uka peporaeia.
9 Ha'e ma ojapo jaikove aguã rami,
ha'e ndojapoi 'rã nhandepyxyry aguã rami.
10 Mba'eta ndee Oreruete, orereko rexa,
oreky'a'o prata oiky'a'oa rami.
11 Oreapo va'ekue nhuã py orembotya aguã rami,
orevoyirã remoĩ orekupe re.
12 Rejapo avakue kavaju árygua kuery oreakã áry rupi oo aguã rami.
Oremboaxa va'ekue tata ha'e yy rupi.
Ha'e rami rire teĩ peteĩ henda tuvixaa py ju orereru.
13 Aike 'rã nderopy mba'emo ame'ẽ va'erã reve,
ndevy ajapo aguã anhemboayvuague,
14 ha'e rami aguã re xeayvu rire,
mba'eta ajexavaia ára ha'e rami aguã xeayvu.
15 Ndevy ame'ẽ 'rã ikyra va'e ojuka pyre,
kavara ro'okue reakuã reve.
Ajuka 'rã vaka ha'e kavara ra'y.
16 Nhanderuete renonde pejererokyjea rupi pendekuai va'e ha'e javi, peju ke, pendu,
pẽvy amombe'u 'rã xevy ojapo porã va'ekue.
17 Ixupe ajapukai karamboae,
xejuru py aroporaei guive.
18 Xepy'a re ovare e'ỹ va'e amoĩ va'e rire
Senhor naxerendui 'rãgue.
19 Ha'e rami rã Nhanderuete xerendu ae,
oikuaa pota guive ajerure vy xeayvu rã.
20 Ima'endu'a porãmby toiko Nhanderuete.
Anhembo'ea noendu rivei,
neĩ ndoexa uka e'ỹi guive xemboaxya.
Yvy regua kuery oguerovy'a aguã regua
Jogueroporaei va'e pe mboraeirã ombopara pyre mbaraka py ombojoguy aguã.