124
याहवेहजी ङ्योलाइ ल्होमिंम्
कैंडो क्रेबै त्हेए ल्हागिर दाऊदइ प्ह्रिबै क्वे।
1 “याहवेह ङ्योने बालु आरेस्याँ!”
इस्राएलीमैंइ बिरिगे।
2 “याहवेह ङ्योने आरेस्याँ
म्हिमैंइ सैल् म्हैबै त्हेरि
3 चमैंए ह्रिंस ङिए फिर मि धोंले लुँमा
चमैंइ ङि सोगोंन् क्ल्ह्योंवामल।
4 प्ल्होंखबै बाढिइ धोंले चमैंइ ङि गास घ्रिन् लवामल;
धै प्हलें ङिए फिर प्रमल;
5 प्ल्हों खबै बाढिइ
ङि नोइ बोयामल।”
6 याहवेहजी शत्तुरमैंए योउँइँले ङ्योलाइ सिल् आपिं।
छतसि खीए मिं थेब् तरिगे!
7 नमे सैइ प्रबै म्हिइ चुबै ङोउँइँले
नमे स्योरब् धोंले ङि स्योर खइमुँ;
चमैंए जाल ट्होयाइ,
धै ङि त्होंल् योंइ!
8 स्वर्ग नेरो पृथ्बी बनेबै याहवेहए मिंर
ङ्योइ ग्वार योंम्।