141
ङए कै थेमिंन्।
दाऊदए भजन घ्रि।
1 ओ याहवेह, ङइ क्हिलाइ हुइमा क्हि युनन् युमिंन्।
ङइ क्हिलाइ हुइमा ङए कै थेमिंन्।
2 ङइ लबै प्राथना क्हिए उँइँर लिंबै थाँ खबै धुप धोंब तरिगे,
ङइ ह्रोंसए यो क्वेमा ङेसर पिंबै ख्रो धोंन् तरिगे।
3 ओ याहवेह, ङए सुँइ आछ्याँबै ताँ पोंल् आपिंन्,
ङए म्हदिइ आछ्याँबै ताँ पोंल् आपिंन्।
4 दुष्ट के लब्मैंने बालु
आछ्याँबै के लबर ङए सैं ह्याल् आपिंन्,
धै चमैंए लिं-लिंबै चबै सैमैं ङइ चल् आत्हुरिगे।
5 ठिक के लबै म्हिइ ङलाइ धोंरिगे, छ लमा ङए ल्हागिर म्हाँया लब् धोंन् तब्मुँ,
चइ ङ हौदिरिगे, छले हौदिमा ङए क्रए ल्हागिर छ्युगु तब्मुँ।
ङए क्रइ च छ्युगु स्योवारिब् आरे।
दिलेया आछ्याँबै के लब्मैंए बिरोधर ङइ खोंयोंइ बिलै प्राथना लब्मुँ।
6 चमैंए क्रथे मिंथेमैं कोंउँइँले क्युरु भ्योंवामा
ङइ पोंबै ताँ क्ह्रोंसेंन ग बिसि दुष्टमैंइ क्होब्मुँ।
7 चमैंइ बिब्मुँ, “खैले क्होर क्ल्योब्मैंइ म्रों क्ल्योसि डल्ल तिवामुँ,
छलेन ङ्योए ह्रिबमैं क्रोंए सुँर सग्याँ-प्हुँग्या तब्मुँ।”
8 ओ याहवेह ङए प्रभु, ङए मि क्हि ङाँइन ङ्ह्योरिमुँ,
क्हिए प्हलेर्न ङ ग्वार ह्रिबर खइमुँ!
ङलाइ कालए सुँर आभ्योंमिंन्!
9 दुष्टमैंइ ङए ल्हागिर तोबै ङो,
नेरो आछ्याँबै के लब्मैंइ तोबै ङोउँइँले ङ जोगेमिंन्।
10 दुष्टमैं खेंमैंइ तोबै ङोर फेयारिगे,
ङ बिस्याँ तोइ आतनले स्योरइ खरिगे।