143
क्यु ल्हें ङाब् धोंले ङए सोइ क्हिलाइन म्हैरिम्
दाऊदए भजन घ्रि।
1 ओ याहवेह, ङए प्राथना थेमिंनु,
ल्होमिंन् बिसि ङइ ग्वार ह्रिब थेमिंनु!
क्हि भर लल् खाँब नेरो ठिक के लबै परमेश्वर ग, छतसि ङलाइ जवाफ पिंनु।
2 ह्रोंसए केब्छैंए बिरोधर निसाफ आलमिंनु,
तलेबिस्याँ क्हिए उँइँर सोगों म्हिमैं खाबै या ठिक ठर्दिल् आखाँ।
3 ङलाइ सैब् बिसि शत्तुरइ ल्हामुँ,
चइ ङलाइ सर क्हुरवासि प्लेवामुँ।
ओंसोंन् सियाब्मैंलाइ धोंले चइ ङ मिछु खैबर टिलन् त्हुम् बिसि ल्हैदिमुँ।
4 छतसि ङए सैं खैता-खैता तइमुँ,
धै ङए सैं बेल्ले च्योंइमुँ।
5 ह्याबै त्हिंइमैं ङइ मैंमुँ,
धै क्हिजी ताँन् केमैं खैले लगे बिसि ङए सैंर मैंरिमुँ;
धै क्हिए योइ औदिबै केमैं खैले लगे बिसि ङ मैंरिमुँ।
6 ङए यो क्हि ङाँइन स्योंमुँ,
कारयाबै क्ल्ह्योइ क्यु ल्हें ङाब् धोंले ङए सोइ क्हिलाइन म्हैरिम्।
तिस्याँदे मैंन्
7 ओ याहवेह, ङइ ग्वार ह्रिब युनन् थेमिंन्,
ङए सैं खैता-खैता तइमुँ!
ङने बालु क्हिए लि आलोमिंनु,
आस्याँ ङ क्रोंर फेनेब्मैं धोंन् तब्मुँ।
8 न्हाँग छजँ क्हिए खोंयोंइ आनुबै म्हाँयाए बारेर थेरिगे;
तलेबिस्याँ क्हिए फिर्न ङइ भर थेंइमुँ।
ङ प्रल् त्हुबै घ्याँ ङलाइ लोमिंनु,
तलेबिस्याँ ङए सो ङ क्हि ङाँइन क्वेमुँ।
9 ओ याहवेह, ङए शत्तुरमैंउँइँले ङ जोगेमिंनु!
तलेबिस्याँ क्हिए प्हलेर्न ङ ग्वार योंबर खइमुँ!
10 क्हिए सैंर मैंब पूरा लबै ल्हागिर ङलाइ लोमिंनु,
तलेबिस्याँ क्हि ङए परमेश्वर ग!
क्हिए खों बेल्ले छ्याँब मुँ,
छतसि ङलाइ छ्याँबै घ्याँर डोरेमिंनु!
11 ओ याहवेह, ङइ क्हिए मिं थेब लरिगे बिसि ङए सो जोगेमिंनु!
क्हिजी खोंयोंइ ठिक के लमुँ, छतसि ङए दुःखउँइँले फ्रेमिंनु!
12 ङए फिर क्हिए म्हाँया खोंयोंइ आनुल्ले मुँ, छतसि ङए शत्तुरमैं सैवाद्,
धै ङए फिर दु:ख पिंब्मैं ताँनलाइ नास लवाद्,
तलेबिस्याँ ङ क्हिए केब्छैं ग।