43
क्हि खैतबै परमेश्वर जा बिसि क्हिए चारबै ह्वे उँइँमिंन्
1 ओ परमेश्वर, ङने तोइ छ्याब् आरे बिमिंन्,
धै क्हिजी बिब् आङिंबै ह्रेंमैंए बिरोधर ङए ख लसि पोंमिंन्,
छलु म्हिलु लब्मैं नेरो दुष्ट म्हिमैंउँइँले ङलाइ जोगेमिंन्!
2 तलेबिस्याँ, ओ परमेश्वर, क्हिए प्हलेर्न ङइ ग्वार योंम्।
ङलाइ तले पिवाल?
शत्तुरमैंए योर फेसि
ङ तले क्रोप्ररिल् त्हुइमुँ?
3 क्हिए क्ह्रोंसेंन्बै ताँमैं ङने बिमिंसि क्हिए चारबै ह्वे उँइँमिंन्;
चमैंइन ङ डोरेरिगे;
धै क्हिए पबित्र कोंर
क्हि टिबै क्ल्ह्योर ङ फेनेल् योंरिगे।
4 ओ परमेश्वर, ङए परमेश्वर, छलस्याँ क्हिए मिंर ख्रो पिंबै क्ल्ह्योर ङ फेनेब्मुँ,
धै ङए सैं तोंन् लबै परमेश्वरए मिंर
ङइ बीणा ह्रादै क्हिए क्वे प्रिंब्मुँ।
5 ओ ङए सैं, क्हि तले आतोंल?
ओ ङए खों, क्हि तले च्हतर्ले आदेल?
क्हिए आशा परमेश्वरने थेंन्;
तलेबिस्याँ खी ङलाइ मुक्ति पिंबै परमेश्वर ग।
छतसि ङ अझै खीलाइना थेब् लब्मुँ।