78
परमेश्वरजी ह्रोंसए म्हिमैं डोरेइमुँ
आसापए मस्किल घ्रि
1 ओ ङए म्हिमैं, ङइ लोमिंबै ताँमैंर न्ह तोद्;
ङइ बिबै ताँमैं छेनाले थेद्।
2 ङइ आहनउँइँले पोंब्मुँ,
था आसेबै स्योंम्बै ताँमैं ङइ बिमिंब्मुँ।
3 च ताँमैं ङ्योए बाज्यूमैंइ ङ्योने बिथेंइमुँ,
छतसि ङ्योइ थेसि सेइमुँ।
4 चु ताँमैं ङ्योइ ह्रोंसए प्हसेमैंउँइँले लोइरि थेंरिब् आरे,
दिलेया तारे खबै पुस्तमैंने
याहवेहजी लबै औदिबै केमैं नेरो खीए भोंए बारेर
धै खीजी लबै प्लेटोयान् तबै केमैंए बयन ङ्योइ लब्मुँ।
5 याकूबए सन्तानए ल्हागिर खीजी ताँमैं बिइ,
धै इस्राएल ह्रें न्होंर ठिम घ्रि पिंइ,
ह्रोंसए सन्तानमैंने चु ताँ लोमिंरिगे बिसि
खीजी ङ्योए खेबाज्युमैंने बिमिंइ।
6 तलेबिस्याँ लिउँइँबै पुस्तामैंइ चु ताँ ह्ररिगे,
धै अझै तोगो समा आफिबै कोलो ओंलामैंइ चु ताँ सेरिगे,
धै चमैंइ ह्रोंसए सन्तानमैंने या चु ताँ बिरिगे।
7 छले चमैंइ परमेश्वरए फिर भर थेंमल,
धै खीजी लबै केमैं आम्लेमल,
धै खीए ताँमैं ङिंमल।
8 ह्रोंसए खेबाज्युमैंइ लब् धोंले
सैं सारो नेरो बिब् आङिंबै पुस्तामैं चमैं आतरिगे।
चमैंए खेबाज्युमैंइ परमेश्वरए फिर भर आम्हाँदिमल,
चमैंइ खीए फिर बिश्वास आलमल।
9 एफ्राइमर्बै म्हिमैं मे त्हलेमैं छेमल,
दिलेया नेबै त्हेर चमैं क्हो तोसि न्हेयाइ।
10 चमैंइ परमेश्वरजी फैबै बाछा आम्हाँदि,
धै खीए ठिमर प्रदा आङ्हाँ।
11 खीजी लबै केमैं चमैंइ म्लेयाइ,
च औदिबै केमैं खीजी चमैंने उँइँमिंल।
12 चमैंए खेबाज्युमैंए उँइँर
मिश्र ह्युलर्बै सोअन बिबै सहरए चेप्ला तबै क्ल्ह्योर
खीजी औदि-औदिबै केमैं लल।
13 खीजी मा ङ्युँइ ङ्हिबाँ लइ धै क्युए म्हाँजोउँइँले चमैंलाइ क्योंज डोरेबोइ,
धै खीजी गारा धोंले क्यु रामिंइ।
14 त्हिंयाँर न्हाँम्स्योए त्हो
नेरो म्हुँइँसर मिए राब तसि खीजी चमैं डोरेमिंइ।
15 क्यु आयोंबै क्ल्ह्योर खीजी पारा ङ्हिबाँ फैलसि तिवाइ,
धै मा ङ्युँइर्बै क्यु धोंले चमैंलाइ ल्हें क्यु थुँल् पिंइ।
16 खीजी पाराउँइँले स्योंमैं त्होंमिंइ
धै स्यों धोंले क्यु बग्दिमिंइ।
17 दिलेया क्यु आयोंबै क्ल्ह्योर ताँन् भन्दा थेबै परमेश्वरए बिरोधर चमैंइ आछ्याँबै के लदै लइ,
खीजी बिबै ताँ या आङिंमल।
18 ह्रोंसए सैंर मैंब् धोंले चबै सै ह्रिसि
चमैंइ सेन-सेन् परमेश्वरए जाँच लइ।
19 “परमेश्वरजी क्यु आयोंबै क्ल्ह्योर चबै सैमैं पिंल् खाँम्मा?”
बिसि चमैंइ परमेश्वरए बिरोधर पोंइ।
20 “खीजी पारर प्रिंमा पार तिसि क्यु त्होंइ,
स्योंमैं धोंले क्यु ल्हें बग्दिइ।
दिलेया खीजी ङ्योलाइ चबै सैमैं या पिंल् खाँम् रो वा?
धै खीजी ह्रोंसए म्हिमैंए ल्हागिर से पिंल् खाँम् रो वा?”
21 चमैंए ताँ थेसि याहवेह बेल्ले ह्रिस खइ;
धै याकूबए सन्तानए बिरोधर खीजी मि कुलसि चमैं नास लवाइ,
इस्राएलए बिरोधर खी बेल्ले थेबै ह्रिस खइ,
22 तलेबिस्याँ चमैंइ परमेश्वरए फिर बिश्वास आलल,
खीजी जोगेमिंम् बिबै ताँर चमैंइ भर आथेंल।
23 दिलेया “चबै सै कुलद्” बिसि मुने बिमा
खीजी मुर्बै म्रामैं थोंमिंइ,
24 म्हिमैंइ चबै ल्हागिर खीजी मन्न बर्सादिमिंइ,
धै चमैंलाइ स्वर्गर्बै चबै सैमैं पिंइ।
25 स्वर्गदूतमैंइ चबै क्हें म्हिमैंइ चइ;
परमेश्वरजी चमैंलाइ ल्हें चबै सैमैं पिंइ।
26 खीजी मुर स्यारउँइँले खैं खल् पिंइ,
धै खीजी ह्रोंसए शक्तिजी न्हुरउँइँले खैं खल् पिंइ;
27 छलेन स त्हुल धोंले खीजी चमैंए फिर से कुल्मिंइ,
मा ङ्युँइर्बै बालुवा धोंले नमेमैं कुल्मिंइ।
28 चमैं टिबै क्ल्ह्यो न्होंर नेरो
चमैंए तम्बुजरे खीजी नमेमैं युल् पिंइ।
29 खीजी चमैंए सैंर मैंब् धोंले पिंल,
छतसि चमैंइ म्रेंन्ले चइ।
30 दिलेया चमैंए चबै सै चमैंए सुँर मुँमन्,
चमैं म्रेंब् भन्दा ओंसों,
31 चमैंए फिर परमेश्वरए थेबै ह्रिस मि धोंले लुँइ।
चमैंए न्होंर्बै भोंबै म्हिमैं खीजी सैवाइ,
धै इस्राएलर्बै फ्रेंसिमैं ताँन् क्हुरवाइ।
32 छान् ललेया चमैंइ पाप के लरिइ;
खीजी औदिबै केमैं ललैया चमैंइ खीए फिर बिश्वास आल।
33 छतसि खीजी चमैंए छ्ह नुल् लवाइ,
धै चमैंए बर्षमैं ङ्हिंदा ङ्हाँन् तब लवाइ।
34 छले परमेश्वरजी म्हिमैं सैवामा अरूमैंइ खीलाइ म्हैइ;
झाइले चमैंइ सैं एसि खी ङाँइ एइ।
35 परमेश्वर चमैंए रक्षा लमिंबै पारा ग,
धै ताँन् भन्दा थेबै परमेश्वरजी चमैंलाइ जोगेमिंम् बिसि चमैंइ मैंइ।
36 दिलेया च लिउँइ चमैंइ सुँइ मत्त्रे खीलाइ थेब लइ;
धै ह्रोंसए लेइ खीने स्योर ताँ पोंइ।
37 चमैंए खोंइ खीए फिर भर आलल;
खीजी फैबै बाछा चमैंइ फुवाल।
38 दिलेया खीजी ल्हयो खबइले
चमैंए पाप क्षमा लमिंइ,
धै चमैंलाइ नास आलल;
खीजी ह्रोंसए ह्रिस ल्हें खे समा थौंदिइ थेंइ,
धै खीजी ह्रोंसलाइ ह्रिस खल् आपिं।
39 चमैंम् ज्यु मत्त्रे ग,
चमैंम् खैं धोंले ह्याबै ह्याबन् तम्,
बिसि खीजी मैंइ।
40 क्यु आयोंबै क्ल्ह्योर चमैंइ ल्हें खे खीए बिरोध लइ,
धै तोइ आकेबै क्ल्ह्योर खीए सैं नल् लइ!
41 चमैंइ घरिघरि खीए जाँच लइ,
धै इस्राएलए बेल्ले थेबै परमेश्वरलाइ चमैंइ ह्रिस खल् लइ।
42 खीए शक्ति चमैंइ आमैंल,
खीजी शत्तुरमैंउँइँले फ्रेमिंबै त्हिंइ चमैंइ आमैंल।
43 च त्हेर खीजी मिश्र ह्युलर ह्रोंसए चिनुमैं उँइँमिंइ,
धै सोअनर्बै चेप्ला तबै क्ल्ह्योर औदिबै केमैं लल।
44 च त्हेरि मिश्रीमैंए स्योंमैं खीजी को लवाइ,
छतसि च स्योंमैंर्बै क्यु चमैंइ थुँल् आखाँल।
45 चमैंलाइ च्हिरिगे बिसि चमैंए म्हाँजोर खीजी च्योमिमैं कुल्मिंइ,
धै नास लबै प्हद्गोमैं या कुलइ।
46 खीजी चमैंए म्ल्ह-नारे नम्ज्योमैंइ चल् पिंइ,
धै चमैंइ के लसि खबै रा-रोमैं या तिरिमैंइ चवाल् पिंइ।
47 खीजी चमैंए अँगुरए धुँमैंलाइ तिस्युइ
नेरो चमैंए तोंबुए धुँमैं प्हमइ नास लल् पिंइ।
48 खीजी चमैंए खेदोमैं तिस्युइ
धै चमैंए र-क्युए बगल कम्लि-तिम्लिइ ल्हिल् पिंइ।
49 चमैंने बालु खी थेबै ह्रिस खल।
छतसि चमैंलाइ न्होह्रों लबर
खीजी सैवाबै दूतए बगल कुलइ।
50 खीजी ह्रोंस ह्रिस खबै घ्याँ तयार लइ;
चमैंलाइ कालउँइँले आजोगेमिं,
दिलेया चमैंलाइ रुडिइ नास लवाइ।
51 खीजी मिश्र ह्युलर्बै च्ह थेब्मैं ताँन् सैवाइ,
हाम बिबै ह्रेंर्बै ठागुमैं या सैवाइ।
52 धै खीजी ह्रोंसए म्हिमैं क्युमैं धोंले बैरु तेसि पखइ,
धै क्यु बगल धोंले चमैंलाइ क्यु आयोंबै क्ल्ह्योए म्हाँजोउँइँले खीजी डोरेइ।
53 चमैं आङ्हिंरिगे बिसि खीजी जोगेदै पखइ,
दिलेया चमैंए शत्तुरमैं बिस्याँ मा ङ्युँइर प्ल्हुँयाइ।
54 छले परमेश्वरजी ह्रोसए पबित्र ह्युलर चमैं डोरेइ,
च कोंमैं मुँबै ह्युल खीजी ह्रोंसए क्योलो योइ ट्होसि चमैंलाइ पखइ।
55 चमैंए उँइँर खीजी अरू ह्रेंमैंलाइ ल्हावाइ,
झाइले चमैंए क्ह्ल्यो न्हेमैं खेमैंए सै न्होर धोंले भाग-भाग लसि इस्राएलीमैंलाइ पिंइ,
धै कुल-कुल लसि चमैंए तम्बुर टिल् पिंइ।
56 दिलेया चमैंइ परमेश्वरए जाँच लइ,
धै ताँन् भन्दा थेबै परमेश्वरए बिरोध लसि खीलाइ ह्रिस खल् लइ,
धै खीजी बिबै ताँमैं आङिंल।
57 चमैं ह्रोंसए खेबाज्युमैं धोंले बाछा फुवाब् नेरो धोका पिंब्मैं तइ,
धै भर लल् आखाँबै न्होंयाबै मेत्हले धों तब् मुँल।
58 नुबै कोंजरे पूजा लबै क्ल्ह्यो बनेसि चमैंइ खीलाइ ह्रिस खल् लइ;
धै चमैंइ कुमैं बनेसि फ्योइ, छतसि खी थेबै ह्रिस खइ।
59 च ताँ सेसि परमेश्वर बेल्ले ह्रिस खइ,
धै इस्राएलीमैंलाइ युगुर्लै पिवाइ।
60 शिलोर मुँबै पबित्र तम्बुए न्होंर खी म्हिमैंए म्हाँजोर टिमल,
दिलेया तोगो च तम्बु खीजी पिवाइ।
61 बाछा फैसि प्ह्रिबै युमा थेंबै मुदुस खीजी अरू ह्युलर पिमिंइ,
खीए शक्ति बेल्ले थेब मुँ धै खी बेल्ले छ्याँब मुँ बिबै चिनु
खीजी शत्तुरमैंए योर पिंवाइ।
62 खीजी ह्रोंसए म्हिमैं सेलाँइ सैल् पिंइ,
धै चमैंने बेल्ले ह्रिस खइ।
63 चमैंए फ्रेंसिमैं ताँन् मिइ ख्रोंवाइ,
छतमा चमैंए च्हमिमैंए ल्हागिर ब्ह्या लब खाबै आयों।
64 चमैंए खेगिमैं सेलाँइ सैवाइ,
धै चमैंए म्हरेस्योमैंइ शोक ललै आयों।
65 लिउँइ न्हरुउँइँले छोरब् धोंले याहवेह छोरइ,
अँगुरए प्हाइ पिब् धोंले खी छोरइ।
66 खीजी ह्रोंसए बिरोधीमैं सग्याँप्हुँग्या लवाइ,
खीजी खोंयोंन् बिलै चमैंलाइ फापिल् लवाइ।
67 छले खीजी योसेफए सन्तानमैं पिवाइ;
खीजी एफ्राइमए कुललाइ आत्हाँ,
68 दिलेया यहूदाए कुल
नेरो ह्रोंसजी खोबै सियोन कों खीजी त्हाँइ।
69 खीजी ह्रोंसए पबित्र क्ल्ह्यो नुबर मुँबै स्वर्ग धोंबन् बनेइ,
धै पृथ्बी धोंलेन् खोंयोंन् बिलै तरिगे बिसि खीजी च क्ल्ह्यो बनेइमुँ।
70 खीजी ह्रोंसए के लबै म्हि दाऊदलाइ त्हाँइ,
धै चलाइ क्यु प्ह्रोंउँइँले तेसि पखइ।
71 क्युमैंए छैं लबै केउँइँले दाऊद पखसि
खीजी चलाइ याकूबए सन्तानए प्ह्रोंछैं तल् पिंइ,
खीजी त्हाँबै इस्राएली म्हिमैंए म्रुँ तल पिंइ।
72 चु ङइ लल् त्हुबै के ग ङ्हाँसि दाऊदइ चमैंए छैं लइ,
धै चइ चमैंलाइ छेनाले डोरेइ।