79
ओ याहवेह, खोंयों समा?
आसापए भजन घ्रि।
1 ओ परमेश्वर, अरू ह्रेंमैंइ क्हिए ह्युलए फिर ह्वाखइमुँ;
धै क्हिए पबित्र मन्दिर चमैंइ जुठ लइमुँ;
चमैंइ यरूशलेम नास लवाइमुँ।
2 क्हिए के लबै म्हिमैंए सिनु
मुर प्हुरबै नमेमैंलाइ चबै ल्हागिर शत्तुरमैंइ पिंइमुँ,
चमैंए से क्ह्योंर्बै खेदोमैं पिंइमुँ।
3 शत्तुरमैंइ चुमैंए को क्यु धोंले यरूशलेमर बग्दिवाइमुँ,
धै चुमैंलाइ पाबै म्हिमैं खाबै आरे।
4 छतसि ङिए चेंदो मुँबै ह्रेंमैंइ ङिलाइ बिल्लि लइमुँ,
झाइले ङिए खागु टिबै म्हिमैंइ ङिलाइ प्ह्रसि निस्योम्।
5 ओ याहवेह, खोंयों समा? क्हि खोंयोंइन ङिने ह्रिस खरिब्मा?
क्हिए ह्रिस मि धोंले खोंयों समा लुँरिमुँ?
6 च ह्रेंमैंइ क्हिलाइ आम्हाँदि,
च ह्युलमैंर्बै म्हिमैंइ क्हिए मिं आकिं,
छतसि चमैंए फिर क्हिए ह्रिंस उँमिंन्।
7 तलेबिस्याँ चमैंइ याकूबलाइ क्ल्ह्योंवाइमुँ
धै च टिबै क्ल्ह्यो तोइ आचैन् लवाइमुँ।
8 ङिए खेमैंइ लबै पापए हिसाब ङिने आकिंन्;
ङिए फिर क्हिजी युनन् ल्हयो खमिंन्,
तलेबिस्याँ ङिलाइ क्हिए थेबै खाँचो मुँ।
9 ओ ङिलाइ मुक्ति पिंबै परमेश्वर,
ङिइ क्हिए मिं थेब लरिगे बिसि ङिलाइ ल्होमिंन्।
क्हिए मिं थेब लबै ल्हागिर
ङिए पाप क्षमा लसि ङिलाइ जोगेमिंन्।
10 “चमैंए परमेश्वर खनिर मुँ?” बिसि अरू ह्रेंमैंइ तले बिए?
क्हिए के लब्मैंए बग्दिबै कोए खी
क्हिजीन् किंम् बिसि अरू ह्रेंमैंइ सेरिगे! ङिज्यै या म्रोंरिगे!
11 झेलर मुँब्मैंइ ल्हयो खल्ले ओरबै कै क्हि ङाँर फेनेरिगे;
सिल् त्हुबै दण्ड योंब्मैंलाइ क्हिए थेबै शक्तिउँइँले रक्षा लमिंन्!
12 ओ प्रभु, क्हिलाइ प्ह्रसि ङिए ङ्हेब् ट्हुब्मैंइ क्हिए मिं वाइमुँ,
छतसि चए ङिखे गुणा खी चमैंने किंमिंन्।
13 छ लमा ङि, क्हिए म्हिमैं, क्हिए खर्गर्बै क्युमैं ग।
छतसि ङि खोंयोंन् बिलै क्हिए मिं क्वेब्मुँ;
पुस्त-पुस्त समा ङिइ क्हिए छ्याँबै बयन लब्मुँ।