81
ङए म्हिमैंइ ङए कै थेरिगे
क्वे प्रिंब्मैंए चिबए ल्हागिर: गित्तित ह्राब् धोंलेन् आसापए भजन
1 परमेश्वरए मिंर सैं तोंदै क्वे प्रिंन्!
खी ङ्योए शक्ति ग, छतसि थेबै कै तेदै
याकूबए परमेश्वरए जयजय लद्!
2 क्वे प्रिंन्! खैंजडि ह्राद्!
सारङ्गी नेरो बीणा या छेनाले ह्राद्!
3 ङ्योए थेबै चाड सुरु लबर
औंसि नेरो पूर्नेर क्यु साँडेए रूँए थुतुरु ह्राद्।
4 इस्राएलए ल्हागिर चु निसाफ घ्रि ग,
याकूबए परमेश्वरजी लद् बिसि ल्हैदिबै ताँ ग,
5 खी मिश्र ह्युलए बिरोधर रेमा
योसेफए ह्रेंए ल्हागिर खीजी निसाफ घ्रि बिथेंइ।
च क्ल्ह्योर्न ङइ ङो आसेबै कै छ बिब् थेल:
6 “क्हेमैंए प्हैंदउँइँले ङइ ल्हिबै ति तमिंइ;
ल्हिबै ट्हलोउँइँले क्हेमैंए यो तेमिंइ।
7 दुःख तमा क्हेमैंइ ङने ग्वार ह्रिइ,
धै क्हेमैंए दु:खउँइँले ङइ फ्रेमिंइ।
मु ङ्हेबै क्ल्ह्योउँइँले खाबज्यै आम्रोंल्ले ङइ क्हेमैंलाइ ज्वाफ पिंइ;
मेरिबार त्होंखबै क्युर ङइ क्हेमैंए जाँच लइ।
तियाँदे मैंन्
8 “ओ ङए म्हिमैं थेद्! ङइ क्हेमैंलाइ लोदा सैंदा लब्मुँ!
ओ इस्राएल, क्हेमैंइ ङए ताँ थेब् गो बिस्याँ!
9 क्हेमैंए म्हाँजोर आगुए देवता थेंल् आत;
क्हेमैं अरू ह्रेंए देवताए ओंसों कुरल् आत।
10 ङ याहवेह क्हेमैंए परमेश्वर ग,
क्हेमैंलाइ मिश्र ह्युलउँइँले ङइ तेसि पखइ।
क्हेमैंए सुँ आँ लद्, ङइ म्रेंन्ले चल् पिंब्मुँ।
11 “दिलेया ङए म्हिमैंइ ङइ बिबै ताँ थेल् आङिं;
इस्रएल ङए न्होंर टिल् आङिं।
12 छतसि चमैं खेंमैंए सैंर मैंब् धोंले प्ररिगे बिसि
चमैंए सैंर्बै इच्छार्न ङइ पिमिंइ।
13 ङए म्हिमैंइ ङए कै थेरिगे,
धै इस्राएल ङए घ्याँर प्ररिगे बिब ङए सैं मुँ!
14 छतस्याँ चमैंए शत्तुरमैंलाइ ङइ युनन् ट्होवामल,
धै चमैंलाइ दुःख पिंब्मैंए बिरोधर ङए यो रेमल!
15 याहवेहलाइ तो धोंइ आङ्हाँब्मैं खी म्रोंसि ङ्हिंमल,
दिलेया चमैंइ खोंयोंन् बिलै दण्ड योंरिल् त्हुमल।
16 दिलेया ङइ इस्राएलीमैंलाइ ताँन् भन्दा छ्याँबै गहुँ चल् पिंमल,
धै पारार्बै खुदुइ क्हेमैंलाइ म्रेंल् पिंमल।”