83
इस्राएलीमैंए शत्तुरमैंलाइ ट्होल् खाँरिगे बिसि प्राथना लब
आसापए भजन घ्रि, क्वे घ्रि।
1 ओ परमेश्वर, क्हि आपोंल्ले आटिमिंन्!
ओ परमेश्वर, तोइ आबिल्ले आटिमिंन्, के आलल्ले आटिमिंन्!
2 ङ्ह्योत्ति, क्हिए शत्तुरमैं सयो खब् धों तइमुँ,
क्हि आखोब्मैंइ क्र कैंडो लइमुँ।
3 चमैंइ स्योर तेसि क्हिए म्हिमैंलाइ ङो चुइमुँ,
क्हिए खोबै म्हिमैंए बिरोधर चमैंइ ताँ लइमुँ।
4 “खो, ङ्यो चमैंए ह्रें नास लले;
धै इस्राएलीमैंए मिं क्ह्रन् म्हयारिगे,” बिसि चमैंइ बिमुँ।
5 चमैं सैं घ्रि तसि जाल् रोइमुँ,
क्हिए बिरोध लबै ताँर चमैंइ मत लइमुँ।
6 एदोमथेंमैं नेरो इश्माएलीमैं,
मोआबीमैं नेरो हग्रिमैं,
7 गबालि, अम्मोनि नेरो अमालेकी,
पलिश्ती नेरो टुरोसथेंमैं,
चुमैं ताँन् क्हिए बिरोधर मत लसि क्ह्रिइमुँ।
8 लोतए सन्तानमैंलाइ ल्होबर
अश्शूरीमैं या चमैंनेन् क्ह्रिइमुँ।
तिस्या मैंन्
9 मिद्यानिमैंलाइ क्हिजी सैब् धोंले,
किशोन स्योंर सिसरा नेरो याबिनलाइ क्हिजी लब् धोंले,
क्हिए फिर जाल रोब्मैंलाज्यै या लद्।
10 सिसरा नेरो याबिनलाइ एन्दोर बिबै क्ल्ह्योर क्हिजी नास लवासि
चमैंए ज्यु सर क्राँयाइ।
11 छलेन चमैंए क्रथे मिंथेमैंलाइ ओरब नेरो जएब धोंन् लमिंन्,
जेबह नेरो सल्मुन्नालाइ धोंले चमैंए चिब्मैंलाज्यै या लमिंन्,
12 तलेबिस्याँ “परमेश्वरजी ह्रोंसए म्हिमैंलाइ पिंबै क्ल्ह्यो
ङ्योइ क्ल्हे लले,” बिसि जेबह नेरो सल्मुन्नाइ बिल।
13 ओ ङए परमेश्वर, चमैंलाइ छाज्यै प्लिल् खाँब छुज्यै प्लिल् खाँबै नो धों,
नेरो खैंइ नोबोबै पुइ धों लमिंन्।
14 खैले मिइ क्ह्यों (बन) ख्रोंसि मेउरो लवाम्,
धै मिए राबाइ कोंमैं ख्रोंवाम्,
15 छलेन क्हिए थेबै नाँ-बाडिइ चमैंलाइ ङ्हिंन् लसि
क्हिए थेबै नाँ-खैंइ चमैंलाइ ल्हामिंन्!
16 ओ याहवेह, चमैंइ क्हिए मिं म्हैप्ररिगे बिसि
चमैंए लि फापिन् लवाद्।
17 ह्युल तिगोंन् क्हि मत्त्रे ताँन् भन्दा थेबै परमेश्वर ग
धै क्हिए मिं याहवेह ग सेरिगे बिसि
18 चमैं खोंयोंन् बिलै फापिल् त्हुरिगे, चमैं ङ्हिंरिगे,
धै चमैं आब्रु ह्याल्ले सियारिगे।