95
परमेश्वरजी बिबै ताँ ङिंदै खीए मिं थेब् लब
1 खो, याहवेहए मिंर ङ्यो क्वे प्रिंले!
ङ्यो रक्षा लमिंबै पारा ङाँर ह्यासि सैं तोंदै कै तेसि ओरले!
2 धन्यबाद पिंदै खीए ओंसों ह्याले,
सैं तोंदै कै तेसि खीए मिं थेब् लले!
3 तलेबिस्याँ याहवेह बेल्ले थेबै परमेश्वर ग,
ताँन् देवतामैंए फिर्बै थेबै म्रुँ खीन् ग।
4 खीए योर पृथ्बीर्बै गैरु-गैरु क्ल्ह्योमैं मुँ,
नु-नुबै क्लिं क्हाँए च्होमैं या खीलन् ग।
5 मा ङ्युँइ खीलन् ग, खीजीन् च बनेब् ग,
धै कार क्ल्ह्यो या खीए योजीन् बनेब् ग।
6 खो, क्र कुरसि खीलाइ फ्योले
धै ङ्यो बनेबै याहवेहए ओंसों च्हि तुँले!
7 तलेबिस्याँ खीन् ङ्योए परमेश्वर ग,
धै ङ्यो खीए खर्गर्बै क्युमैं,
नेरो खीए म्हिमैं ग।
तिंयाँ क्हेमैंइ खीए कै थेद्!
8 याहवेहजी छले बिमुँ,
“क्हेमैंए खेमैंइ मेरीबा नेरो क्यु आयोंबै क्ल्ह्योर्बै मस्साहर लब् धोंले
ह्रोंसए सैं सारो आलद्।
9 चर ङइ लबै केमैं क्हेमैंए खेमैंइ म्रोंसे या
चमैंइ ङए जाँच लइ।
10 छतसि च त्हेर्बै म्हिमैंने ङ प्लिच्यु बर्ष समा बेल्ले ह्रिस खसि बिइ,
‘चु म्हिमैंइ ङए घ्याँ आसेइमुँ,
चुमैंए सैं ङ ङाँइले ह्रेंगो तयाइमुँ।’
11 छतसि ‘ङइ भों न्हल् पिंबै क्ल्ह्योर चुमैं खोंयोंइ होंल् योंरिब् आरे!’ बिसि
ह्रिसर ङइ कसम चइ।”