96
याहवेह पबित्र नेरो छ्याँब मुँ बिब् सेसि खीलाइ फ्योद्
1 याहवेहए मिंर छारा क्वे घ्रि प्रिंन्;
पृथ्बी तोगोंर्बै म्हिमैंइ याहवेहए ल्हागिर क्वे प्रिंन्।
2 याहवेहए ल्हागिर क्वे प्रिंन्, खीए मिं क्वेद्;
खीजी ङ्योलाइ जोगेमिंइमुँ बिसि त्हिंइ ह्रोंसे बिप्रद्!
3 खी बेल्ले थेब मुँ बिसि अरू ह्रेंमैंए म्हाँजोर बिप्रद्,
ताँन् म्हिमैंए म्हाँजोर खीजी लबै औदिबै केमैंए बयन लद्!
4 तलेबिस्याँ याहवेह बेल्ले थेब मुँ, धै खीए मिं बेल्ले नुल्ले क्वेल् त्हुब मुँ;
ताँन् देवतामैंल् भन्दा खीए मिं बेल्ले क्वेल् त्हुम्।
5 तलेबिस्याँ अरू ह्रेंमैंइ म्हाँदिबै देवतामैं कु मत्त्रे ग,
दिलेया याहवेहजीम् मु बनेइ।
6 खीए उँइँर इजेत नेरो मान मुँ;
खीए पबित्र क्ल्ह्यो म्रोंमा खी कति भोंब मुँ, कति छ्याँब् मुँ बिसि सेल् खाँम्।
7 ओ ह्रें-ह्रेंमैंए परवा, याहवेहए बयन लद्!
याहवेहए मिं बेल्ले थेब् मुँ, खी बेल्ले भोंब् मुँ बिसि बयन लद्!
8 खीए मिंलाइ ङ्हेंबै मान याहवेहलाइ पिंन्;
भेटि किंसि खीए ह्युमैंर खो!
9 खी पबित्र नेरो छ्याँब तब् सेसि याहवेहलाइ फ्योद्;
पृथ्बी तिगोंर्बै म्हिमैं खीए उँइँर थरथरले त्हारद्।
10 “याहवेहजी ग्याल्स लम्!
खीजीम् पृथ्बी भोंब् लसि थेंमिंइमुँ, छतसि चलाइ लाल् आखाँ;
खीजी खाबलाज्यै आफेलल्ले ताँन् म्हिमैंए निसाफ लब्मुँ,” बिसि अरू ह्रेंमैंए म्हाँजोर बिद्!
11 मु आनन्द तरिगे, पृथ्बी सैं तोंरिगे;
मा ङ्युँइ नेरो चर मुँबै तोन्दोंरि सैं बेल्ले तोंरिगे;
12 म्रों नेरो चर मुँबै तोन्दोंरि सै बेल्ले तोंरिगे!
छलेन क्ह्योंर्बै ताँन् सिंधुँमैं आनन्दले याहवेहए उँइँर क्वे प्रिंब्मुँ;
13 तलेबिस्याँ खी युसिन् मुँ,
पृथ्बीर मुँबै म्हिमैंए निसाफ लबर खी युसिन् मुँ।
ह्युलर्बै म्हिमैंए निसाफ खीजी ठिकले लब्मुँ;
धै खीजी ह्रेंमैंए निसाफ भर लल् खाँल्ले लब्मुँ।