10
Koniliasi be Pita tetelidi
1 E tayamo koroto asa Sesariya goi ikaaiyaka, korotoyana yoina Koniliasi. Koniliasiyana moe Roma ana tovayaviyayao andedi (100) adi tovakumgo. Ame tovayaviyayadi boda tayamo yoina Italiya.
2 Tauyana koroto kaasalaina Yaubada yaina nakae mana bodayauwo Yaubada ana totaimaminayao. Tookaidi ivaaitedi gagaina be nakae tuta liliuna ikawanoi Yaubada yaina.
3 E tuta tayamo bogina lavilavi nukotona goi ikalayáusa. Ina kalayausayana goi Yaubada ina anerose tayamo igitedoko ima idigo kana,
‘Koniliasi!’
4 E tauyana mana matoita gagaina ipotapota kana,
‘Tomoya, manakae?’
E aneroseyana idigo kana,
‘Im kawanoi Yaubada bogina inove be nakae im vaita tookaidi yaidi bogina igitedi, e iuyaonem. Moe guinuwayadi moe im vininabeso Yaubada yaina nakae, tauna inuwaisim.
5-6 Tauna Yopa goi tayamo koroto yoina Saimoni ikaaiyaka. Tauyana youyuwoina moe Pita. Pitayana ikaaiyaka koroto tayamo ina vada goi négwasa kikina. Korotoyana yoina Saimoni nakae go, ina paisewa moe yoguyogu kaamasidi sakavaidi adi tokatubayásina. Tauna ame tuta im korotoyao kuetunedi sina amoko goi Pitayana sikabi sime.’
7 E aneroseyana ibóbwara ikavava, ina go, kina Koniliasiyana ina pakonayao adi taiyuwo ina vada simataakavate be nakae tovayaviya tayamo iduduwedi sima. Tovayaviyayana moe ina tovaita tayamo be nakae koroto kaasalaina Yaubada yaina.
8 E sima ilatuwokoidi kaga liliuna isowóduwo. Ikavava, ietunedi sina Yopa.
9 E vanuwo itomo, korotoyadi simamaima bogina Yopa sivakakana go, dine goi kina Pita vada yatana imwera ikawanoi.
10 E bogina loga ikámasa; latuwona ikáika. E vevina áika giyaina siguuinuwe go, kina Pita nukotona goi ikalayáusa.
11 Alayausayana goi yábana ikatupáeva go, dogoi tayamo isou. Dogoiyana moe areko gagaina maisiyana go, matakubuna aivasi. Ago ina sou ana kaigigita moe nakae neta tomota matakubunayadi siyoisidi go, sisailave isou imamaima poyapoya goi.
12 Arekoyana yatana goi yoguyogu, bolitavanu be woiwoi ituli ituli, be moteta ituli ituli be nakae mánuwo ituli ituli sikaaiyaka, maniyedi vaatabudi, maniyedi taagonaidi.
13 Ago níyana tayamo inove idigo kana,
‘Pita, kutāoya go, kwaumatēdi kwāika!’
14 E kina go Pitayana ikatae, idigo kana,
‘Tomoya, geya toina! Geya kada tayaamo tuta yoguyogu vaatabuna o baailina akani geya, unana moe bomama.’
15 Ago aiyuwoina niyanayana inove idigo kana,
‘Kaga kaga Yaubada ikimaavadedi taabu kuvaayokōidi baailidi, tauna taabu kwaatāedi!’
16 E ame livalayadi sivato inoveko. Ikavava, mainao arekoyana ibiu itukoe inave yábana.
17 E Pita nukotona iwówana gagaina ina kalayausayana manuna; ina nuwonúwana goi kana,
‘Ame kaga nakona ana yagoina?’
Nava inuwonúwana go, boi korotoyadi Koniliasi ieetunedi bogina sisowóduwo. Sisowóduwo sima Saimoni, tauyana yoguyogu sakavaidi adi tokatubayásina, ina vada manuna silumadádana sidigo kadi,
‘Saimoni nako goi ikaaiyaka?’
Silatuwokoidi ikavava, sima tauyana ina vada sibabane go, vadayana ana kali totomna goi sitaoya.
18 Sitaoya, silumadádana sidigo kadi,
‘Saimoni, tauyana youyuwoina Pita, moeni o geya?’
19 E kina go Pita nava ina kalayausayana inuwoleléuye go, Baloma Kimaasabaina idigo kana,
‘Pita! Koroto adi taito bogina sima siluusalem.
20 Korotoyadi Totuyoyowo go, tuwo taabu kwaatāedi, go sem kutāoya kusōu kūna tauyadi taiyao kōna go, taabu kunaanayūwo unana yau aetunedi sima, tauna taiyao kōna.’
21 E tuwo moitamo isou ina korotoyadi ilatuwokoidi idigo kana,
‘Konōwo. Yau tauyagu koluusalegu. Kaga latuwomi koma?’
22 ‘Ima tomoya Koniliasi ietunema kama. Tauyana tovayaviyayao adi tovakumgo. Tauyana tokibóbwata be nakae Yaubada ana totaimámina tayamo go, Diyuu liliudi sikaodedevine. Anerose kimaasabaina Yaubada umana isowóduwo tauyana yaina ilatuwoko kana,
“Koniliasi, Pita kududūwe ima im vada goi bei ina livala kunove” ’, korotoyadi kaedi.
23 Tauna Pita iuyaonedi sisiu vada sinaena taiyao sikaaiyaka go, irugwausidi.
E vanuwo itomo, Pita itaoya, korotoyadi be nakae sediyao nuumisaidi maniyedi Yopa goi sikaaiyaka taiyao sina. Sinonoina, enao goi simasisi.
24 E simasisi vanuwo itomo, Pita ma senao sima Sesariya goi sisiu. E kina go Koniliasiyana osenao be nakae ina bodao bogina iduduwedi sima Pita bogina situuyaosi bei ina livala sinove.
25 E tutayana Pita isiu, Koniliasiyana ima ivalobode, e aena ivatugúyala Pita matana goi isakululu.
26 E kina go Pitayana igite, tuwo Koniliasi ibutáoe idigo kana,
‘Kutāoya! Yau tomota kom nakae. Geya itoboineyeta aem kuvatugúyala yaigu.’
27 Tuwo moitamo itaoya, taiyao sibobóbwara go, Koniliasi ina vada goi sisiu. Sisiu, Pita ikandobala tomota badabadaidi igitedi bogina sigugúguna.
28 Tuwo ilatuwokoidi idigo kana,
‘Komi bogina koyagoi kai Diyuu geya ama tagonamo komi Totuyoyowo kakaiyakemi be nakae kapodumemi. Ago Yaubada bogina ivatulukoigu geya tayaamo tomota itoboinegu avayoko vaatabuna o ma baailina, tauna taabu kataavilēiye.
29 Moe pasina tutayana kududuwegu, geya akataeyeta, go sem atagona ama. Tauna alumadadem kaga pasina kududuwegu ama?’
30 Koniliasiyana idigo kana,
‘Boi konavasiye lavilavina guna vada goi akaawanoi go, koroto tayamo ana kwama naamalina isowóduwo matagu goi itaoya.
31 Itaoya idigo kana,
“Koniliasi, im kawanoi Yaubada bogina inove be nakae im vaita tookaidi yaidi bogina inuwaisidi.
32 Tauna koroto kuetunēdi sina Yopa goi koroto tayamo yoina Saimoni sidudūwe ima. Tauyana youyuwoina moe Pita. Ame tauyana ikaaiyaka Saimoni, tauyana yoguyogu kaamasidi sakavaidi adi tokatubayásina, ina vada goi, moe négwasa kikina.”
33 E tauna koroto avatuwowonedi siwo sikabim go, uyagu unana kutagona kuma. E tuwo ame tuta madabokima Yaubada matana goi bogina kakaaiyaka ameko, latuwoma kaga bogina ida Tomoya ilatuwokoim, e kulatuwokōima kanove.’
34 E Pita ivatowo ivatétala idigo kana,
‘Bogina ayagoidoko bego Yaubada matana goi boda liliuda tavavasa. Tuwo kai Diyuu iuyaonema go, ametava geya,
35 go sem boda tamo tamo yaida poyapoya ame goi nakona kai Diyuu, nakona komi Totuyoyowo, neta mada matoita Yaubada tawowoine be nakae takibóbwata, e Tauyana bei iuyaoneda.
36 Vala Dedevina boi Yaubada ietune ima kai Isileli tubunao yaima goi. Valayana moe livisi Yaubada yaina ikavava go, Yeisu Guyau ina guinuwa goi tomota itoboineda ida tuboina tababane. Ame Valayana ivatulukoida Yeisu moe tomota liliuda ida Tomoya.
37-38 Komi bogina koyagoi kaga isowóduwo Yudiya ana dadava madabokina goi. Boi Iyoni sayóyova manuna itaalavaita. Italavaita ikavava, Yeisu guma Nasareta ima go, kina Yaubada Baloma Kimaasabaina be nakae togaga ivadamanedi Tauyana yaina. Tuwo Galili goi Yeisu ivatowo bei ivanibiníbita guinuwa dedevidi iguuinuwedi nakae avatauwa neta Totagíwaya iloviinaedi, e ikidedeevinedi. Yaubada ikaaiyaka Tauyana yaina, tauna itoboine nakae iguinuwedi.
39 Kai Yeisu ina vamoleyanayao ina guinuwa liliudi kai Diyuu ima kasa goi be nakae asa Yerusalema goi kagitedi bei kakamoitamoedi. Tauyana woi situpatuko kerose goi sikaumate.
40 Ame Tauyana maliyalina aito sikavava, ámasa goi Yaubada ikaitáoe namliyeta ikaiwoduwe tomota yaidi.
41 Go tomota liliudi yaidi goi geya ikaiwoduweyeta, go sem boi maniyedi tomota igimivayokoidi Yeisu ina taoyamna ana tokamoitamoyao, e ame tauyadi yaidi goi ikaiwoduwe go, ame tauyadi moe kai. Yeisu ina taoyamna tokámasa yaidi mlina, Tauyana taiyao kakakáika be kanimnim.
42 Niga Tauyana ilovinaema bego kana tomota yaidi goi Valena katalavaite be nakae Tauyana kakamoitamoe bego kina Yaubada bogina ivayoko Tauyana tomota liliuda ada totakínona, kita maa yawoida be nakae tokámasa.
43 Ame Tauyana boi nimatu Yaubada ina tokabivalavala liliudi sikamoitamoe bego Tauyana yoina goi avatauwa neta sinumise, e adi goyo adi nuwotao bei sibabane.’
44 Pita nava ibobóbwara go, Baloma Kimaasabaina ina totaiyakekayao liliudi yaidi goi isiu.
45 Go kidi Yeisu ina tonumisayaoyadi sakavaidi kuuponidi boi Pita taiyao sima sikaaiyaka sigite, nukotodi siwówana bego kidi Totuyoyowo nakae yaidi Yaubada Balomaina Kimaasabaina bogina isiwoi.
46 Moe moitamo. Imavada Baloma isou yaidi tutayana Totuyoyowoyadi ituli ta kaníyana ituli ta kaníyana goi sibobóbwara be nakae Yaubada sikiilagasi. Tuwo Pita senao Diyuuyadi ilatuwokoidi kana,
47 ‘Amo tauyadi Baloma Kimaasabaina bogina sibabane boi kita Diyuu nakae. Tauna avatau itoboine sayóyova ivagagalakoidi? Geya ae?’
48 E Pita senao sakavaidi kuuponidi ilatuwokoidi idigo kana,
‘Koniliasi senao taiyao Yeisu Guyau yoina goi kosayoyōidi.’
Tuwo moitamo nakae siguinuwe. Sisayoyoidi ikavava, Koniliasi senao taiyao sikawanoi Pita yaina bego ikaiyaka tauyadi taiyao. E Pita itagona.