24
Paulo itaoya gávana
Pilikisi matana goi kotu manuna
1 E maliyalina ainima bogina sikavava, kidi Tonúwala Toolagaina, Ananiyasi, Diyuu idi tomoyamoyayao maniyedi be nakae adi tobóbwara yoina Tetulo Yerusalema goi sisou siiwo sima Sesariya goi, e Tetuloyana bei gávana matana goi Diyuu idi wowókana Paulo manuna italavaitedi.
2-3 E bogina sima, gávana livala ietune ina bego Paulo ima. Tuwo tauyana ima go, kina Tetuloyana Paulo iwowoko idigo kana,
‘Toolagaim Pilikisi, kom pasim tuta maanawena tuboina bogina kababane be nakae kaga liliuna im nanamsa goi bogina kuguinuwedi, e aba lovina ame ana dedevina manuna, tauna im guinuwa liliuna goi be nakae asa liliudi goi mama kauyagu gagaina im lovina kauyaone.
4 E geya itoboineguta bego tuta maanawena ayoisim go, akawanoi makimaki yaim bego mam mesayágana tuta kaakupina goi ima nuwonúwana kunovedoko.
5 Ame korotoyana kagite tobugoyo tayamo tomota liliuda yaida. Nakae ivanibiníbita asa liliudi goi livisi iguuinuwe Diyuu liliudi yaidi poyapoya ana madabokina goi. Ago tauyana kidi Nasareta taviileidi adi tovakumgo.
6-8 Aiyuwoina tauyana woi ipoikíkina bego Vada Kimaasabaina nakae ikibaibaili! Moe nakae kagite, tauna tauyana kayoisi. Neta toinim kudovatusi, bei ina goyo kubabanedi nakae bogina kawowoko. Moe pasina tauna latuwogu ima wowókana kunovedoko.’
9 E kidi Diyuu nakae Tetuloyana taiyao Paulo sikaugugusi. Kaga liliuna Tetuloyana italavaaitedi kidi sikamoitaamoedi.
10 Ago gavanayana ikaukede bego Paulo ibóbwara. Tuwo Paulo itaoya, Tetulo ina bóbwara ikatumapu idigo kana,
‘Gávana, ayagoi tala maanawena goi kom kai Diyuu ama totakínona, tauna maagu uyáwana kom matam goi aataoya kidi idi wowókana yau yaigu bei alawoiwoiyedi.
11-12 Guna uyáwana unana kom itoboinem tomota kulumadadedi bei kuyagoi bego kaga ame bei alatuwokoim moe mooitamoina. Diyuu geya tayaamo goyo sigitegu aguinuwe unana geya tayaamo tuta Vada Kimaasabaina goi o idi kaba tugugunayao goi o asa sinaena goi akaumakimaki Diyuu taiyao o livisi aguinuwe Diyuu yaidi goi. Geya itoboineguta dogoiyadi aguinuwedi unana maliyalina ana badabada yawou aiyuwo kaka mlida, atuko ana Yerusalema goi bego asakululu Yaubada yaina, tauna moe tuta kaakupina bego dogoiyadi aguinuwedi.
13 E dogoiyadi manudi ame tuta siwoowokoigu geya itoboinedita idi kiyakiyaya sikaiwoduwedi bei kugitedi kuyagoi moitamo abágala.
14 E ame akamoitamoe yaim bego yau Yeisu ina Kenao ana tosabokuli tayamo. Kenaoyana ana tosabokuliyao kidi Diyuu sivayoudi taviileidi unana idi nuwonúwana goi Kenaoyana moe bágala. Kenaoyana goi yau ataimámina tubumao idi Yaubada yaina. Kaga liliuna Yaubada ina Katukeda Mosese ivini be nakae kaga liliuna Yaubada ana tokabivalavala boi siiginidi anuumisedi.
15 Aiyuwoina dogoi tayamo alootutae, e ame korotoyadi nakae silootutae. Dogoiyana moe Yaubada bei tokámasa ikaitaoedi, tokibóbwata be nakae tokapipilova.
16 Moe pasina tuta liliuna yau nakae apoisógana bego Yaubada matana goi be nakae tomota liliudi matadi goi nuwogu geya isabutukoeta.
17 E tala maanawena akaaiyaka ta kasa ta kasa goi go, talayadi sikavava, ama Yerusalema goi bego mani akaiguyauye tokai guna bodao Diyuu yaidi goi be nakae guna vininabeso akasale Yaubada yaina.
18 Moe nakae Vada Kimaasabaina ina kali sinaena goi aguuinuwe go, sibabanegu. Go tutayana sibabanegu, yau bogina akimasabegu Yaubada yaina goi; boda taiyao geya, mge gagaina geya, go sem yau aguta sibabanegu.
19 E Diyuu maniyedi Esiya goi sima sivamgemge go, tauyadi itoboine ame tuta sikaaiyaka ameko. Neta madi wowókana yau yaigu, itoboinedi kom matam goi sitaoya yau guna goyo sitalavaitedi bei kunovedi.
20 Go kidi geya simaita, tauna ame korotoyadi kutagonēdi toinidi sitalavaita ava bágala yaigu sibabane boi Diyuu idi kotu goi ataoya.
21 Geya tayaamo goyo itoboinedi sitalavaite, go sem dogoi tayamo toito itoboinedi sitalavaite. Moe boi aataoya yaidi goi bóbwara tayamo moitamo aduduwo kagu,
“Tokámasa adi taoyamna manuna, tauna guna kotu ame tuta matami goi.” ’
22 E kina go Pilikisiyana Yeisu ina Kenao ana sinapu bogina iyagoidoko go, tuwo geya itakinoidita, go sem Paulo ana kotu ana tuta iupavile. Ivalilivedimo idigo kana,
‘Tutayana tovayaviya adi tokalikumatana Lusiya Yerusalema goi isou ima, baige ami kotu bei alovinae.’
23 Ago tovayaviya adi tovakumgo tayamo ilatuwuko idigo kana,
‘Paulo komatakavatedoko go, tauyana taagonaina vada sinaena. Neta senao latuwodi siwo sivaite, taabu kosanaabodēdi.’
24 E maliyalina maniyedi sikavava, Pilikisi ma monena Darusila, tauyana Diyuu, sima, e livala sietune ina bei Paulo ima. Tuwo ima go, numisa Guyau Yeisu yaina goi ivateteli sinove.
25 E tutayana Paulo ivatétala kibóbwata, tomota toinidi idi kabikúnuwo be nakae Yaubada ina takínona ana tuta ina sowóduwo manudi, Pilikisiyana bogina imatoita, tauna idigo kana,
‘Ame tuta kom kūna. Ava tuta itoboinegu, bei aduduwemneim kuma kuvatetalamna.’
26 Go tauyana latuwona Paulo mani ivini bego italigei. Moe pasina tuta liliuna Paulo iiduduwe inonoina bei taiyao sibobóbwara.
27 E nakae nakae siguuinuwe tala aiyuwo. E Pilikisiyana latuwona Diyuu ivauyaonedi, tauna Paulo ikalave deri goi ikaaiyaka. E tala aiyuwoyadi sikavava, Pilikisiyana isou go, ana katumapu itaoya. Ana katumapuyana yoina Posiyo Pesto.