10
Liuna ainima aitonina:
Tatabole
1 E Yauwe ilatuwokoigu idigo kana,
‘Aiyuwoina kūna Pero goi kukawanōi guna bodao manudi. Tauyana mana pakonayao dabadi bogina akaukasedi. Ame nakae aguinuwe bei ameko goi Yau guna kaba kinana kidi yaidi aguinuwedi
2 be nakae kovatétala natumiyao be tubumiyao yaidi manakaegu da Itipita akaiwotetedi be nakae guna kaba kinanayadi yaidi goi aguinuwedi. Moeko goi koyagoigu bego Yau Yauwe.’
3 E tuwo moitamo Eroni be yau kana Pero kalatuwoko kadigo kama,
‘Yauwe kai Iberiu ima Yaubada ibóbwara ame nakae, idigo kana,
“Kom sivavina nakae nava kuukatae bego kwatetagonem Yau yaigu? Guna bodao kutaligēidi bei sima sisakululu Yau yaigu!
4 Go neta kwatae, am dodōkana. Yau itomo bei tatabole amedi im kaba lovina goi.
5 Tataboleyadi poyapoya ana madabokina bei sivatum, nakae bei geya itoboinemita poyapoya kogite. Kaga liliuna boi kúwana kasakasaidi geya sisamaumauidita be nakae alova liliudi sidugo, e tataboleyadi bei silokanidi.
6 Kom be im pakonayao nakae da Itipita liliumi imi vada bei sivakayaodeidi. Ame dogoiyana geya kada tayaamo tuta tamamiyao be tubumiyao yaidi isowóduwo geya, adi bíbina kunu goi ima ame tutayana goi geya.” ’
Abóbwara ikavava, ama taiyuwo katugavila Pero goi kasowóduwo kana.
7 Tuwo Pero ina pakonayao silatuwoko sidigo kadi,
‘Sivavina nakae bei amo tauyana kutagone mou goi iyowóida? Tomota kutaligēidi bei sina sisakululu Yauwe idi Yaubada yaina. Manakae? Nava geya kuyagoiyeta bego Itipita ana madabokina bogina sibugoyai?’
8 Sibóbwara ikavava, Pero ietunedi sima Eroni be yau sikabima kakaluvilamna kana. Kana ilatuwokoima idigo kana,
‘Kōna kosakulūlu Yauwe imi Yaubada yaina. Ego avatau avatau bei taiyao kona?’
9 Adigo kagu,
‘Liliuma, tubuwau be woiyai, tomoyamoya be namoyamoya, natumao koroto be vevina, e nakae ima yoguyoguyao, sipi be bulumakau taiyao kanavedi. Bogina kuyagoi. Uyáwana aikanina itoboine kaodugu Yauwe yaina.’
10 Go kina Peroyana idigopopóita kana,
‘Moitamo, kadago Yauwe imi Yaubada bei ivakiitaumi nakae kom mam bodao kadago bei ataligeimi. Kunōve. Ayagoi komi konuwotulu.
11 Tauna geya. Kaga kom kudige moe geya. Kōna. Komi koroto amitava kōna kosakulūlu Yauwe yaina. Moe nakae bogina kokawanoiye.’
Pero ibóbwara ikavava, e matana goi Eroni be yau sivatapiyema.
12 E tuwo Yauwe ilatuwokoigu idigo kana,
‘Nimam kuyosāle Itipita yatanaina goi bei tatabole sima Itipita alovaina be naunina liliudi silokanidi, nakae kaga liliuna boi kúwana kasakasaidi geya sisamaumauidita sikanidi.’
13 Tuwo moitamo guna kaituko ayosale Itipita yatanaina goi. E kina go Yauwe yágira bomatu ietune ima Itipita goi go, ame maliyalina ana madabokina be sabamgo ana madabokina goi itowotowo. E vanuwo itomo tatabole bogina iyawoisavedi sima Itipita.
14 E tataboleyadi sina Itipita ana madabokiina sivatum. Tauyadi badabada sisaki, nakae boi nimatu nakae geya go, bei tuta simamaima nakae geya.
15 Poyapoya ana madabokina sivatum, tuwo poyapoyayana ikalakoiwo. Náuna be alova keuwoidi, nakae kaga liliuna kúwana kasakasaidi geya sisamaumauidita madabokina silokanidi. Silokanidi ikavava, geya kada kaga tayaamo vakalakalaoina Itipita sinaena ikaaiyaka.
16 E tuwo Pero woilina vala ietune ima Eroni be yau iduduwema kana. Kana ilatuwokoima idigo kana,
‘Bogina agoyo Yauwe imi Yaubada yaina be nakae komi yaimi.
17 Tauna guna bágala sivatayamo konuwotāo be nakae kokawanōi Yauwe imi Yaubada yaina bei nakona ámasa ame ikabi inave.’
18 E tuwo yau ma siyagu kataoya Pero goi kasowóduwo kabala kana go, akawanoi Yauwe yaina.
19 E tuwo Yauwe yágira toogagaina koiboga ietune ima, e tataboleyadi iyawoisavedi sina Négwasa Kayakayaina goi sisalili. Tauna geya kada tayaamo tatabole Itipita sinaena ikaiyaka geya.
20 Ago Yauwe Pero dabana ikaukase, e kai Isileli tubunao geya italigeimeta.
Liuna ainima aivasina:
Kokonótuya
21 E tuwo Yauwe ilatuwokoigu idigo kana,
‘Nimam kuyosāle yábana kuvasakikināko bei Itipita ana madabokina goi kokonótuya isowóduwo. Nakae kokonotuyayana itoboinedi silotowo.’
22 E tuwo moitamo guna kaituko ayosale yábana avasakikinako, e Itipita ana madabokina goi kokonótuya isowóduwo go, kokonotuyayana maliyalina aito goi ikaaiyaka.
23 Tomota geya itoboinedita sediyao sigitedi be nakae kebadi goi geya sitaoeta maliyalina aito sinaedi. Kai go Isileli tubunao ima kasa goi imavada.
24 Tuwo Pero vala ietune ima iduduwegu ana ilatuwokoigu idigo kana,
‘Kōna kosakulūlu Yauwe yaina. Gogómana nakae itoboinedi taiyao kona go, imi yoguyoguyao, nakae imi bulumakauyao be imi sipiyao, tuwo sikaiyaka ameko.’
25 E yau sem adigo kagu,
‘Geya. Kom kutagonēma ima yoguyoguyao vininabeso manuna nakae kanavedi bei maniyedi kagabudi, maniyedi kavakasavedi go, kakasaledi Yauwe yaina.
26 Ima yoguyoguyao nakae kanavedi. Geya tayaamo bei ikaiyaka geya. Bogina kuyagoi. Ima yoguyoguyadi yaidi goi maniyedi bei kagabudi kasakululu Yauwe ima Yaubada yaina. Go kai geya kayagoiyeta ava yoguyoguva ana kadókana kana amoko goi kasakululu Yauwe yaina, e bei kayagoi.’
27 E kina Yauwe Pero dabana ikaukase, e Peroyana geya italigeimeta.
28 E tuwo idigo kana,
‘Ame tuta kwalavēgu! Am dodōkana. Taabu kumamāima! Neta kuma maisigu kugite, bei kukāmasa!’
29 E yau sem adigo kagu,
‘Moe kubóbwara moitamo! Maisim bei geya agitemneiyeta geya.’