11
Liuna yawouna ana katubayásina
1 E Yauwe ilatuwokoigu kana,
‘Tayamo vísiya tuwaina bei Pero nakae da Itipita liliudi avinidi namliyeta baige italigeimi bei ameko goi kosowóduwo. Tutayana italigeimi, moitamo toina bei ivatapiyekowosimi.
2 Amo tutayana tomota kulatuwokōidi tamo tamo sina da Itipita yaidi kónana siriba be goura sikawanoiyedi go, bei sivinidi.’
3 E Yauwe anuwóiya goi da Itipita nuwodi igudalidi, e ina bodao anuwóiya sibabane da Itipita yaidi. Yau nakae. Pero ina pakonayao be da Itipita liliudi matadi goi yau koroto gagaigu.
4 E tuwo ana Pero alituwoko adigo kagu,
‘Yauwe ibóbwara ame nakae, idigo kana,
“Nabunatoina goi komi da Itipita bei awokoimi.
5 Imi botomoyayao koroto liliudi Itipita goi bei sikámasa. Kom Pero toolagaim im botomoya bei ikámasa be nakae im pákwana vavina, tauyana toosobuna, ina botomoya bei ikámasa. Imi yoguyoguyao adi botomoyayao bolamo nakae bei sikámasa.
6 Tuwo Itipita ana madabokiina goi vataitáiya gagaina bei konove. Geya kada tayaamo tuta taiyayana ame nakae geya. Boi nimatu nakae geya, e tuta simamaima bei nakae geya.
7 Kidi go Isileli tubunao goi mge geya toina, nakae geya tayaamo weiniya bei igou tomota be yoguyogu yaidi. Moeko goi bei koyagoigu Yau Yauwe Isileli tubunao akimasabedi ituli, e komi da Itipita ituli.”
8 Tuwaina Yauwe idigo kana,
“Im pakonayao liliudi bei sima aedi sivatugúyala Yau yaigu kadi, ‘Komi kosīya! Kom be nakae tomota liliudi sisabookuliyem kotāoya kosīya!’ Moe mlina bei Itipita akalave.”
Tauna nakae Yauwe ibóbwara.’
Abóbwara ikavava, e magu egamogamogu gagaina Pero goi asowóduwo.
9 E Yauwe ilatuwokoigu idigo kana,
‘Pero geya inovemta bei yau itoboinegu guna guinuwa aba kainaopa avaituwedi da Itipita yaidi.’
10 E kina go Eroni be yau guinuwa aba kainaopayadi liliudi Pero matana goi kaguinuwedi go, Yauwe Pero dabana ikaukase, e ina kasa Itipita goi kai Isileli tubunao geya italigeimeta.