Yauwe ina kanasíuna ana lovina
19
(Tateta 19:1—24:18)
Tomota sikatuubayasi bei Yauwe sivalobode tetelina
1-2 E kai Isileli tubunao kataoya, asa Rapidim kakalave kana Sainai yoyowoina. Kasiu kana Yaubada ina koya goi, e koyayana kikina katunagu. Moe bogina tukówana aito ima sowóduwo Itipita goi mlina.
3 E koyayana atuko ana Yauwe Yaubada yaina. Tauyana koya yatana goi itumasobu yaigu idigo kana,
‘Yakobo ina bodao, moe Isileli tubunao, kulatuwokōidi ame nakae,
4 kudīgo kam,
“Boi toinimi matami goi bogina kogitegu kaga liliuna aguinuwedi da Itipita yaidi nakae manakaegu akavalemi amemi yaigu nakae bóibo panepanena goi natunao ikavaledi.
5 Ame tuta neta moitamo niyagu konove be nakae guna kanasíuna yaimi bei aguuinuwe koyoisikavate, e komi moitamo toinigu guna kitomyao boda liliudi yaidi. Poyapoya ana madabokina moe guna kaba lovina.
6 E komi sem akinavemi koeboda tayamo bei komi guna togudalayao be nakae boda kimaasabaimi umagu.”
Tauna nakae Isileli tubunao kulatuwokōidi.’
7 E tuwo asou ana Isileli tubunao adi tomoyamoya aduduwedi sima kaga liliuna Yauwe bogina ilatuwokoigu, e alatuwokoidi.
8 E tomota liliudi taiyao sidigo kadi,
‘Kaga liliuna Yauwe iidigedi nakae bei kaguinuwedi.’
E tuwo akalavedi go, ana koyayana goi atuko ana Yauwe yaina idi livala atalavaitedi.
9 E Tauyana idigo kana,
‘Kunōve. Yau bei gaota kalaabadaina sinaena goi ao, e bei tomotayadi itoboinedi sinovegu tutayana avadigoim go, kom bei sinumisevataem.’
Tuwo asou ana tomotayadi kaga liliuna Yauwe ilatuuwokoigu, nakae alatuwokoidi. Tomotayadi kadi,
‘Kaga liliuna Yauwe iidigedi nakae bei kaguinuwedi.’
Tuwo akalavedi atukomna ana Yauwe yaina tomotayadi idi livala atalavaitedi.
10 E Yauwe idigo kana,
‘Kusōu kūna tomotayadi ame be itomo kukimasabēdi guna sowóduwo manuna go, adi kwama nakae sinikīdi.
11 Maliyalina aitonina goi bogina sikatubayāsi bego Yau Yauwe asou Koya Sainai tomota liliudi matadi goi.
12 Tomota adi túwana koya unana madabokina goi kuyāto ivaníbita go, kukatumatalīdi kudīgo kam,
“Ami dodōkana! Taabu koyayana kotukotūko be nakae taabu tuwanayana kobiisikōne. Avatau neta ibisikone, tauyana kokaumāte.
13 Taabu kobiisikōne. Avatau neta ibisikone, tauyana gurewa goi kokaumāte o sau goi koginubāsi. Neta yoguyogu o tomota, bei ikámasa.”
Nakae kulatuwokōidi go, tutayana síula niyana maanawena sinove, bei sima koyayana goi.’
14 E tuwo koya goi asou ana tomotayadi akimasabedi, e adi kwama sinikidi.
15 Ikavava, alatuwokoidi adigo kagu,
‘Kokatubayasīmi maliyalina aitonina manuna. Komi koroto, taabu vevina kobisiikonēdi.’
16 E maliyalina aitonina bogina ima go, nobuyana koya goi palapala idududu be nakae ávila ikavikávila, nakae gaota kalaabadaina ikaaiyaka. Síula niyana gagaina itáiya, e tomota liliudi idi tunagu goi sinove, tuwo madi matoita wowodi sitátava.
17 Tuwo tomotayadi idi tunagu goi amedi koya goi bego Yaubada sivalobode. Koyayana unana sitaooyakobu.
18 E Yauwe yeu goi isou ima Koya Sainai yatana goi. Koyayana aubowo gagaina iumai ina kaiyaka pasina go, aubowoyana ituko ina nakae neta vaega siigabudi. Koyayana madabokina itátava gagaina.
19 E síula niyana bogina ivakakana ima, e ivakaigaga toina. Yauwe aavadigo go, Tauyana niyana gagaina goi ikatumapugu; niyanayana ana taiyakeka palapala nakae.
20 E tutayana Yauwe isou ima Koya Sainai yatana goi, iduduwegu idigo kana,
‘Kutūko kūma koya yatana.’
Tuwo atuko.
21 Atuko, e Tauyana ilatuwokoigu idigo kana,
‘Kusōu kūna tomotayadi kukatumatalīdi taabu túwana sivaadamāne, govila bei sisiu sima bego Yau Yauwe sigitegu, e badabadaidi sivailai.
22 Kidi go Tonúwala nakae. Neta Yau Yauwe simekoigu, kulatuwokōidi toinidi sikimasabedi umagu, govila bei Yau Yauwe geya mgoninamo aliunedi.’
23 Go yau adigo kagu,
‘Tomotayadi geya itoboinedita situko. Kom toinim bogina kukatumatalidi kam,
“Túwana kuyatōidi Koya Sainai unana goi namliyeta koyayana kukimasābe umagu.”
Tuwanayadi bogina ayatoidi.’
24 E Yauwe idigo kana,
‘Kusōu kūna Eroni kwābi, e taiyao kokaluvīla kōma go, tonuwalayadi be tomotayadi taabu kutaagonēdi sivadámana bego simekoigu, govila bei sisiu, e geya mgoninamo aliunedi.’
25 Tuwo moitamo asou ana tomotayadi alatuwokoidi.