20
Yaubada ina lovina yawou
(Atukeda 5:1-21)
1 E tomotayadi Yaubada ilatuwokoidi ame nakae, idigo kana,
2 ‘Yau Yauwe imi Yaubada da Itipita idi kasa goi akalaoduwemi. Boi komi da Itipita idi pakonayao go, Yau ataligeimi.
3 Tauna ituli ta yaubadao taabu kosabokuuliyēdi, go sem Yau agutava imi Yaubada.
4 Taabu tokwalu komaadagīdi bego dogoi tayamo yábana goi o poyapoya yatana goi o négwasa sinaena goi ana tapata nakae bego imi yaubada.
5 Taabu tokwaluyadi yaidi goi aemi kovaatugūyala nakae taabu kowuuwulīdi bego mami sakululu kokabikaaonēdi. Yau Yauwe imi Yaubada vakookoligu. Avatau neta nakae iguinuwe moe ikaolilivegu. Bei ina goyo anuwokavatedi, e bei natunao be tubunao be natudiyao aliunedi.
6 Go avatauwa neta simatakooiyegu be nakae guna lovina sikabikaaonedi, e amo tauyadi be nakae mlidi idi bodao badabadaidi simamaima yaidi goi alokatedi.
7 Taabu Yau Yauwe imi Yaubada yoigu kokaigoyāi. Avatau neta yoigu ivatoi besobeso, amo tauyana bei aliune.
8 Maliyalina aba waiwasi konuwookavāte, nakae kokimasābe umagu.
9 Maliyalina ainima tayamo goi koopaisēwa. Amo maliyalinayadi goi bei imi paisewa madabokidi koguuinuwēdi.
10 Go maliyalina ainima aiyuwoina moe aba waiwasi Yau Yauwe imi Yaubada umagu. Amo maliyalinayana goi taabu koopaisēwa; komi, natumiyao, imi pakonayao koroto be vevina, imi bulumakauyao be nakae ogaoga sikaaiyaka yaimi, paisewa geya.
11 Maliyalina ainima tayamo goi Yau Yauwe yábana be poyapoya be négwasa be nakae kaga liliuna sinaedi amadagidi go, maliyalina ainima aiyuwoina goi awaiwasi. Tauna maliyalina ainima aiyuwoina aba waiwasi Yau Yauwe bogina akaipakuye be nakae akimasabe umagu.
12 Tamamiyao be sinamiyao kowowooinēdi, e bei yawoimi simamanao poyapoya goi Yau Yauwe imi Yaubada bei avinimi.
13 Taabu kokaaumāta.
14 Taabu korooerāta.
15 Taabu kovaaināwana.
16 Taabu kotalavaita polapōla semiyao yaidi.
17 Semiyao idi vada be monediyao be idi pakonayao koroto o vevina be idi bulumakauyao o idi aseyao o ava kónana tayamo taabu koyaalagāudi.’
Isileli tubunao Yauwe simaatoite tetelina
18 E kidi go tomotayadi palapala sinovenove be ávila sigitegite, nakae síula sinovenove be aubowo sigitegite, tuwo wowodi sitatátava go, sibala sina masigava goi siitaoya.
19 Tuwo silatuwokoigu sidigo kadi,
‘Kom toinim kuvadigōima bei kanovem. Go taabu Yaubada ivaadigōima, govila bei kakámasa.’
20 Go yau adigo kagu,
‘Taabu koomatōita! Yaubada ima bego Tauyana koyagoidoko, e bei kowowoinevatae be nakae goyo geya koguinuweyeta.’
21 Tuwo tomotayadi masigava goi siitaoya go, yau ana gaota kalaabadaina kikina goi ataoya. Gaotayana sinaena moe Yaubada ikaaiyaka.
Yauwe ina kanasíuna bukina
(Tateta 20:22—23:33)
Lovina aba kasala manuna
22 E Yauwe ilatuwokoigu idigo kana,
‘Ame nakae Isileli tubunao kulatuwokōidi, kudīgo kam,
“Komi toinimi bogina konove bego yábana goi avadigoimi. Geya kogiteguta, go sem konovegumo.
23 Tauna geya tayaamo kaga siriba goi koomadāgi bego dogoiyana be Yau taiyao kavavasa, e yaima kosakululu geya. Taabu tokwalu goura goi komaadagīdi bego dogoiyadi imi yaubadayao.
24 Go sem guna kaba kasala poyapoya goi komadāgi. Aba kasalayana goi imi yoguyoguyao moe imi sipiyao nakae imi bulumakauyao kokasalēdi yaigu. Yoguyoguyadi maniyedi bei kovakasavēdi go, maniyedi abivekoveko manuna kogabudīmo kokāika. Ava kasava goi neta atagona komi kosakululu yaigu, e amo asayadi liliudi goi bei awokoimi, e akaipakuyemi.
25 Go aba kasala gurewa goi neta kokaudakodako, taabu gurewayadi kokauvisivisīdi. Neta turu goi kokauvisivisidi, e gurewayadi bogina kokibaibailidi sakululu yaigu manuna.
26 Taabu aba kasalayana manuna aitámana koomadāgi, govila bei komwera, e bisosoimi sobuyekoidi moe aba kasalayana ikaaiyaka, e bei sikibaibāili.” ’