☰ NUWOGAU 3
3
Da Sadesi adi leta
1 Tuwaina Tauyana idigo kana,
‘Anerose ainimaina Tomoya ana totugugunayao Sadesi goi imatakaavatedi ana leta totugugunayadi manudi kugīni kam,
 
“Yau Yeisu yaigu goi Yaubada Balomaina ainima aiyuwo be nakae utuna ainima aiyuwo sikaaiyaka. Ame nakae alatuwokoimi: Imi sinapu bogina ayaagoidi. Komi valemi bego balomaimi maa yawoidi go, komi woi balomaimi kaamasidi! 2 E tauna matamasimasisi koyâto go, koetoyâusa be ava sinapuva dedevidi nava sikaaiyaka yaimi kokitogagêdi, govila bei giyakainava sikámasa. Moitamo. Imi guinuwa bogina adovatusidi go, guna Yaubada matana goi geya sidedevineta. 3 Tauna konuwookavâte manakaemi boi Vala Dedevina konove be nakae bogina kokabi. Valayana koyoisiikavâte go, kotugavîla. Tauna matamasimasisi koyâto go, koyauyâusa! Go neta geya, yau bei tovaináwana nakae avatoopemi, tauna geya koyagoiyeta ava lava goi bei ao.† 4 Geya kada madabokimi Sadesi goi imi sinapu kwama baailidi nakae bogina sigoyo geya, go sem ami taiyuwomo nava imi sinapu dedevina kwama maavadaina nakae, tauna komi mami toboine yau taiyao mada kwama poowouna taketoiyaa vavasa.
5 Avatauwa komi neta kootogaga,†a e ami kwama poowoudi bei kolosidi be yoimi yawana vata bukina goi†b geya atauwedita be nakae yoimiyadi akamoitamoedi Tamagu mana aneroseyao yaidi bego komi yau guna bodao.†c
6 Avatauwa komi neta ma taaiyami, e Baloma Kimaasabaina ina livala Tomoya ana totugugunayao yaidi konoveedokôidi!” ’
Da Piladelipiya adi leta
7 Tuwaina Tauyana idigo kana,
‘Anerose ainima tayamo Tomoya ana totugugunayao Piladelipiya goi imatakaavatedi ana leta totugugunayadi manudi kugīni kam,
 
“Yau Yeisu Totumasaba†a be Aba Numisa.†b Yau tubugu Devida ina ki nimagu goi ayoyoisi. Neta totom akatupáeve, geya vatau tayaamo itoboine bei ikatunibode, e nakae neta akatunibode, geya vatau tayaamo ikatupáeve.†c E ame nakae alatuwokoimi: 8 Imi sinapu bogina ayaagoidi bego imi togaga giyaina ikaaiyaka go, tuwo guna livala bogina koyoisikavate be nakae yoigu geya kolawoiwoiyeyeta. Tauna konôve! Niboda bogina akatupáeve manumi go, geya vatau tayaamo itoboine bei ikatunibode. 9 Konôve! Tauyadi Kaleya ana totugugunayao kadi, ‘Kai Diyuu, Yaubada ina bodao’ go, geya, go sem kidi topola. Tauyadi nava bei alovinaedi bego sima matami goi aedi sivatugúyala go, bei siyagoigu bego komi amatakooiyemi.† 10 Guna livala mesayágana manuna bogina koyoisiikavate, tauna yau nakae nava vakakona ana tuta bei ima poyapoya ana madabokina goi da poyapoya‡†a adi vakakona sibabane, go komi sem bei vakakonayana yaina goi avagagalemi.†b 11 Giyakainava bei awowoiwo, tauna mami numisa kotaoyaakavâta bego geya vatau tayaamo itoboine imi vaiwówana ivasebukoimi.
12 Avatauwa komi neta kootogaga,†a bei alovina komalakówala nakae guna Yaubada ina Vada Kimaasabaina manuna be Tauyana matana goi kokaiyako vata. Yaimi goi Yaubada yoina be nakae ina kasa yoina aginidi; asayana moe Yerusalema vau, nava bei guna Yaubada yábana goi ietune isou ima.†b Nakae yoigu vau yaimi goi bei agini.†c
13 Avatauwa komi neta ma taaiyami, Baloma Kimaasabaina ina livala Tomoya ana totugugunayao yaidi konoveedokôidi!” ’
Da Laodiseya adi leta
14 Tuwaina Tauyana idigo kana,
‘Anerose ainima aiyuwoina Yaubada ana totugugunayao Laodiseya goi imatakaavatedi ana leta totugugunayadi manudi kugīni kam,
 
“Yau Yeisu Aba Kamoitamo o kada, ‘Yau Totalavaita dókana Aba Numisa be Mooitamoina, nakae Yaubada ina madaginao unadi.’ † Ame nakae alatuwokoimi: 15 Imi sinapu bogina ayaagoidi. Sinapuyadi geya kada basabasaidi bwae tuulaina nakae o bwae yaviyavina‡ nakae geya. O neta komi basabasaimi amo bwaeyadi tayamo nakae! 16 Go geya, go sem komi geya basabasaimimo bwae dimokolooisina nakae, tauna tobugu goi bei akalagiwolemi. 17 Komi kodigo kami, ‘Kai toinima nimama goi kaetoesaesa. Dogoi liliuna bogina yoiyama’ go, geya koyagoiyeta bego komi ami toovalugo, komi aba nuwokapisi, komi tookaimi, matami sikebo be nakae ma paawakumi.† 18 Tauna akatuliwolemi goura maavadaina yeu goi yaigu kogimône bego koetoesaesa. Kwama poowoudi kogimonēdi bego kokotedi, imi pawaku ina omayamaya ana tabodaboda. Mátana ana medisini kogimône be matami komigīdi bego kogita dókana. 19 Avatauwa komi neta yau amatakooiyemi, akamamaetalimi be asapimi.† Tauna kotugavîla go, kopooisôgana imi numisa manuna. 20 Konôve! Yau imi totom goi aatáoya akaukeeyakeya. Avatauwa komi neta niyagu konove be imi totomyadi kokatupaevedi, e imi vada goi bei asiu yau komi taiyao takaika vavasa.
21 Avatauwa komi neta kootogaga,† bei atagonemi yau taiyao kebagu esaaesaina goi tatulaga talovina nakae boi yau atogaga, e Tamagu kebana esaaesaina goi yau taiyao katulaga kaalovina.
22 Avatauwa komi neta ma taaiyami, e Baloma Kimaasabaina ina livala Tomoya ana totugugunayao yaidi konoveedokôidi!” ’
† 3:3 Mad 24:43-44; Luk 12:39-40; 2Pi 3:10; Nuw 16:15. †a 3:5 Nuw 2:7,11,17,26, 3:12,21, 21:7. †b 3:5 Tat 32:32-33; Sam 69:28; Pil 4:3; Nuw 13:8, 17:8, 20:12,15, 21:27. †c 3:5 Mad 10:32; Luk 12:8. †a 3:7 Mak 1:24; Luk 4:34; Iyo 6:69; Gui 2:27; 1Iy 2:20; Nuw 16:5. †b 3:7 Tat 34:6; Nuw 6:10. †c 3:7 Ais 22:22. † 3:9 Ais 49:23, 60:14. ‡ 3:10 Da Poyapoya: Ame livalayana ana yagoina Iyoni goi moe avatauwa neta Yaubada siikatae be nakae geya situgavileta. †a 3:10 Nuw 6:10, 8:13, 11:10, 13:8,14, 17:8. †b 3:10 2Pi 2:9. †a 3:12 Nuw 2:7,11,17,26, 3:5,21, 21:7. †b 3:12 Nuw 21:2. †c 3:12 Ais 62:2, 65:15. † 3:14 Ais 65:16; Abi 8:22. ‡ 3:15 Bwae tuulaina nakae o bwae yaviyavina: Ame livalakaibala tayamo. Ana yagoina moe tomota basabasaina. Asa tayamo Laodiseya kikina moe Ierapolisi. Asayana goi bwae yaviyavina ikaaiyaka; bwaeyana medisini nakae tomota ivaaitedi. Aiyuwoina asa yoina Kolose ikaaiyaka Laodiseya kikina go, amo asayana goi bwae tuulaina ikaaiyaka; bwaeyana maavadaina be nakae dedevina toina. E nakae tomota ivaaitedi. Go bwae Laodiseya goi dimokolooisina. Avatauwa sinim latuwodi silagoba. † 3:17 Ose 12:8. † 3:19 Atu 8:5; Abi 3:12; Ibe 12:5-6. † 3:21 Nuw 2:7,11,17,26, 3:5,12, 21:7.
☰