☰ NUWOGAU 4
Yaubada Tokalika itakínona aba kaipaki
ainima aiyuwo be síula ainima aiyuwo goi
4
(Nuwogau 4:1—11:19)
Yaubada kebana esaaesaina
yábana goi itulagalaga siyapaliye
1 Amo dogoiyadi bogina sikavava, akandolaga go, konōve! Totom tayamo yábana goi agite ikatupáeva! Ago niyanayana boi anovenove síula nakae idigo kana,
‘Kutūko kūma bei kaga itoboine nava isowóduwo akaiwoduwe yaim goi.’
2 Mainao Baloma Kimaasabaina iyoisigu, e tayamo kébana esaaesaina yábana goi agite ikaaiyaka, yatana goi Tolovina itulaagalaga.† 3 Tolovinayana ana kaigigita agite inámala gurewa naamalidi nakae. Ago kebanayana, kíyala naamalina itaoyakobu. 4 Ago kébana esaaesaina adi badabada tuwentipoa (24) situkobu, yatadi goi tomoyamoya‡ adi badabada tuwentipoa (24) situlaagalaga, tauyadi madi kwama poowoudi be madi dabayogigi goura esaaesaina dabadi goi. 5 Tolovina kebanayana goi ávila, butukáwana be palapala sisowóduwo.†a Kebanayana matana goi dúgala ainima aiyuwo sisaabenínima,†b mavadayadi moe Yaubada Balomainao ainima aiyuwo.†c 6 Nakae matana goi dogoi tayamo ikaaiyaka ana kaigigita négwasa daaumorina gerasi momooyasuna nakae,†a e inamanámala go, maavadaina toina.†b
Kebanayana kikina goi dogoi maa yawoidi adi taivasi†c sitaooyakobu go, sakavaidi madabokina mátana kaka. 7 Dogoiyadi ame nakae: Tayamo laiyoni maisiyana, aiyuwoina bulumakau bonatuna maisiyana, aitonina maisina tomota maisiyana, aivasina bóibo maisiyana iyovayova. 8 Dogoiyadi maa yawoidi adi taivasi tamo tamo ma panepanedi ainima tayamo. Sakavaidi goi be nakae panepanedi ogalaoidi goi mátana kaka.†a Tuwo tuta liliuna, maliyalina be sabamgo, sivesivesi kadi,
 
‘Yauwe Yaubada Tokalika,
iya Totumasaba toina.
Tauyana Tokaiyako vata:
Boi nimatu ikaaiyaka,
ame ikaaiyaka
nakae nava bei ikaaiyaka.’†b
 
9 Tauyana Tokaiyako vata kebana esaaesaina goi itulaagalaga go, kidi dogoiyadi maa yawoidi sikamoitamo Tauyana itoboine sitaaimamine, siiwowoine be nakae yaina sikaauyagu. 10 Tutayana nakae siguinuwe, e tomoyamoyayadi tuwentipoa (24) aedi sivaatugúyala kébana ana totusobu yaina. Totusobuyana moe Tokaiyako vata, e yaina goi sisaakululu. Idi sakululuyana goi idi lovina dabayogigina‡ esaaesaina dabadi goi sikabidi, Tauyana kebana matana goi sikaisobuyedi, e sivesi kadi,
 
11 ‘Ima Tomoya Yaubada,
Kaga liliuna kom kumadagidi
be nakae im nuwonúwana pasina sikaaiyaka.
Tauna itoboinem bei taimámina,
wowoina be nakae togaga kubabanedi.’
† 4:2 Isi 1:26-28, 10:1. ‡ 4:4 Tomoyamoya: Nakona ame tomota o anerose. Neta tomota nakona Yaubada ana tonumisa gagaidi Aba Vatowo ina Malakai goi. †a 4:5 Tat 19:16; Nuw 8:5, 11:19, 16:18. †b 4:5 Isi 1:13; Sak 4:2. †c 4:5 Nuw 1:4. †a 4:6 Nuw 15:2. †b 4:6 Isi 1:22. †c 4:6 Isi 1:5-10, 10:14; Nuw 5:6, 7:11, 14:3, 15:7, 19:4. †a 4:8 Isi 1:18, 10:12. †b 4:8 Tat 3:14; Ais 6:2-3; Nuw 1:4,8, 11:17, 16:5. ‡ 4:10 Idi lovina dabayogigina: Ame dabayogigiyana moe iyato dabana goi go, ana yagoina moe tauyana mana lovina iilovina.
☰