9
Eweema eya Kibbumba eyʼoku kyalo
1 Era endagaano esooka eyʼaMateeka ga Musa yabbaire nʼebiragiro ebyalaganga engeri yʼokusinzamu oKibbumba, era nʼeraga nʼekifo ekyeru ekyʼomu kifo kyʼokumusinziramu ekyʼoku kyalo.
2 Ekifo ekyo kyabbaire weema eya Kibbumba aBaisirairi egibakomekere ngʼerimu ebisenge bibiri. Omu kisenge kyayo ekyenza, ooba ekisooka, mwabbairemu ekikondo oku bayanika eitaala. Era nga mulimu nʼemenza, nʼemigaati egibawaayo eeri oKibbumba. Ekitundu ekyo nga bakyeta Kifo eKyeru.
3 E nyuma wʼolutimbe olwokubiri, olwabbaire omunda omu Kifo eKyeru, niiwo awabbaire ekisenge ekyokubiri ekibeeta eKifo eKyeru eIno.
4 Mwiyo mwabbairemu ekyoto ekyʼobubbaani, ekibakolere mu zaabbu. Era mwabbairemu esanduuku eyʼendagaano, egibabwikireku ezaabbu oku mba gyonagyona. Omu sanduuku eyo, mwabbairemu ekibya ekyʼezaabbu, omwabbaire obubbongokera bwʼemere egibeeta emaanu. Era mwabbairemu nʼomwigo gwʼAlooni ogwalokere, nʼebipande ebibiri ebyʼamabbaale okubawandiikire ebiragiro eikumi ebya Kibbumba.
5 Oku ngulu kwayo kwabbaireku ebifaananyi byʼabakeruubbi abʼekitiisya. Ebiyaya byabwe nga bikingulya oku ngulu kwʼekisaanikiro kyʼesanduuku oku baswankiranga eisaaye lyʼebyo ebibasadaakire. Oku ngulu kwʼeSanduuku yʼeNdagaano kwabbaireku ebifaananyi byʼebibbumbe ebyʼekitiisya ebiriku ebiyaya. Ebiyaya ebyo byabwikanga oku kisaanikiro iyo entebe ya Kibbumba onanyere okusaasira. Ebyo byonabyona titwezya kubisonzola atyanu ekimo ku kimo.
6 Ebyo byonabyona nga biwoire okubicaana nakusani bityo, abakabona baingiranga buliijo omu kisenge ekisooka, ni batuukirirya omulimo gwabwe.
7 Neye omu kisenge ekyokubiri, eyaingirangamu yabbaire kabona akira obukulu yenkani, ngʼaingiramu omulundi gumo buli mwanka, era ngʼali nʼokutwalayo eisaaye lyʼesadaaka eriyawangayo okululwe, nʼoku lwʼebibbibibbi byʼabantu ebibakola omu kutamanya.
8 Mwebyo byonabyona oMwoyo oMweru yabbaire alaga ati, enzira etuuka omu Kifo eKyeru eIno, yabbaire ekaali kumanyikana eeri abantu, ngʼeweema eya Kibbumba eyasookere ekaali eriwo.
9 Ekyo kyabbaire kifaananyi-bufaananyi ekiwa ekyokwega ekyamakulu omu biseera binu ebitulimu. Kiraga kiti, ebirabo nʼesadaaka ebyo ebibaawangayo, tibyezyanga okutukulya okutoolawo okuwulira omusango omu mwoyo gwʼoyo abiwaayo.
10 Byakomanga ku bintu byʼoku ngulu, ebifa ku byokulya nʼoku byokunywa nʼoku bulombolombo obwʼokwetukulya, era ebyabbaire ebyʼokubbaawo paka oku kiseera ekyʼokwirya buli kintu obuyaaka.
Eisaaye lya Kurisito
11 Neye oKurisito yaizire nga niiye okabona akira obukulu owʼebisa ebyaba okwiza, nʼaingiire omu weema eya Kibbumba ekira obukulu nʼokutuukirira, eteri ya bantu egibakolere. Ekikoba kiti, iyo tiya ku kyalo kunu neye yʼomwigulu.
12 Iye tiyaingiireyo na isaaye lya mbuli ooba lya nyana wa nte. Wazira yaingiireyo na isaayerye erinanyerenyeere, nʼaingirira kimo omu Kifo eKyeru eIno omulundi gumo lumala, ngʼamalire okutusunira okutununula okutawaawo.
13 Atyanu, eisaaye lyʼembuli nʼeryʼente enumi, nʼeikoke lyʼente enduusi egiboocerye, ebibamwaga kwabo abatatukula, bibatukulya, omu Mateeka ga Musa, ni babba batukula ku ngulu mu mubiri neye timu myoyo.
14 Neye oKurisito abulaku ekyokumunenya, yeewaireyo nʼafa ngʼesadaaka eeri oKibbumba omu maani ga Mwoyo atawaawo. Aale atyanu eisaayerye tiryalikirawo ino okunaabya emyoyo gyaiswe nga litoolawo okuwulira omusango olwʼebikole ebibbibibbi, ni tuweererya oKibbumba onyere obwomi?
15 Nʼolwekyo oKurisito niiye omutabagania omu ndagaano empyaka, olwakubba abo oKibbumba abeyalondere nʼabasuubiza ebintu ebisa ebitawaawo, abeezyesya okubisuna. Ekyo kyezyeka, olwakubba yafiire nʼanunula abantu omu bibbibibbi byabwe ebibakolere nga bakaali bali ansi wʼeifuge lyʼendagaano esooka.
16 Ngʼekyokuboneraku, omuntu owaakola ekiraamo kikakata ngʼeyakikolere amalire kufa.
17 Ekiraamo tikikola ngʼeyalaamiirye akaali mwomi, wazira amala kufa, kaisi ni kikola.
18 Nʼendagaano esooka kagira bagikakasire na isaaye.
19 OMusa oweyamalire okulanga eeri abantu ebiragiro bya Kibbumba byonabyona ebiri omu Mateeka, nʼakwata eisaaye lyʼente nʼeryʼembuli, nʼatabulyamu amaizi. Kaisi nʼasiba ebyoya bya ntaama ebitukuliki oku kasaale akebeeta “Yisopu,” nʼaswankira eisaaye oku kitabo kyʼaMateeka nʼoku bantu bonabona.
20 Yaswankiranga nga waakoba ati, “Linu niiryo eisaaye erikakasa endagaano oKibbumba egyabalagiire okutuukirirya.”
21 Era omu ngeri enanyere eyo, oMusa nʼaswankira eisaaye eeryo oku weema eya Kibbumba nʼoku bintu byonabyona ebibakolesya omu kusinza.
22 Era omu Mateeka, kumpi buli kintu bakitukulya na isaaye, era anambula kusuka isaaye, tiwabbaawo okusoniya omuntu ebibbibibbi.
OKurisito sadaaka etoolawo ekibbikibbi
23 Kale abakabona, kyabbaire kibeetaagisya okutukulya ebifaananyi ebyʼebintu ebiri omwigulu nga bawaayo sadaaka egyo. Neye ebintu ebiri omwigulu ebinanyerenyeere, byetaaga okubitukulya nʼesadaaka ekira egyo obusa.
24 Era oKurisito tiyaingiire omu kifo ekyeru nga bantu niibo abakikolere, ekifaanana-obufaanani na kidi ekinanyerenyeere. Wazira yaingiire omwigulu awananyerenyeere, era nga gyali nʼatyanu omu maiso ga Kibbumba ngʼatukiikirira.
25 Era oKurisito tiyaingiire omwigulu kwewaayo mirundi mingi, ngʼokabona akira obukulu owaingira buli mwanka omu Kifo eKyeru okuwaayo eisaaye lyʼebisolo.
26 Singa kyabbaire kityo, awo oKurisito yankubbaire ali nʼokugada emirundi mingi okuzwera nakimo ekyalo kasookeede bakibbumba. Neye iye yabonekere lumo, mu biseera binu ebyʼenkomerero, kaisi atoolewo ekibbikibbi okulwa bantu bonabona, nga yeewaayo onyere ngʼesadaaka.
27 Era nga buli muntu oKibbumba oweyamutegekeire okufa lumo, era oluzwanyuma lwʼokufa, ni bamusalira omusango,
28 era nʼoKurisito atyo, bamuwaireyo omulundi gumo ngʼesadaaka okwetiika ebibbibibbi byʼabangi. Yaliiza omulundi ogwokubiri, neye nga taizire kwiramu kwetiika kibbikibbi, wazira okulokola abo abamukuumirira.