10
OKurisito niiye esadaaka emala kusani
1 Amateeka gʼekiyudaaya, kiiriirye-bwiriirye kyʼebintu ebisa ebyabbaire biiza oKibbumba ebiyasuubizire, neye nga tibyabbaire niibyo ebinanyerenyeere. Nʼolwekyo igo tigeezya, nga gabita omu sadaaka egyo, egibairairamu buli mwanka, ni gatukulirya nakimo abo abagiwaayo nga basinza.
2 Singa gabbaire geezya okubatukulirya nakimo, esadaaka gyankubbaire tigikaali gyetaagisya okuwaayo, olwakubba abagiwaayo bankubbaire babatukulirya nakimo mulundi gumo lumala, era ngʼatyanu tibawulira musango omu mwoyo olwʼekibbikibbi.
3 Neye esadaaka egyo, olwakubba bagiwaayo buli mwanka, kibaleetera kwewukirya bibbibibbi ebibakolere enyuma buli owebawaayo esadaaka,
4 olwakubba eisaaye lyʼente enumi nʼeryʼembuli tiryezya kutoolawo bibbibibbi.
5 OKurisito ngʼaiza omu kyalo, niikyo ekyagirire nʼakoba oKibbumba ati:
“Esadaaka nʼebyo ebibawaayo, tiniibyo omwoyogwo ebigwegombere,
neye wantegekeire nze omubiri.
6 Ebibawonga nga babyoca biramba,
nʼebyo ebibawaayo olwʼebibbibibbi, tiwabisiimire.
7 Kagira zena nkoba nti, Ngonu ndi aanu.
Njizire okukola ebyotaka,
Musengwa wange Kibbumba,
ngʼeKiwandiike owekintumulaku.”
8 Era okusookesya yakobere ati:
“Esadaaka nʼebyo ebibawaayo,
nʼebyo ebibawonga nga babyoca biramba,
nʼebyo ebibawaayo olwʼebibbibibbi,
tiniibyo omwoyogwo ebigwatakire era tiwabisiimire.”
Ekyo yakitumwire, newankubbaire ngʼebyo byonabyona babiwangayo ngʼaMateeka owegalagira.
9 Awo nʼairaku nʼakoba ati, “Ngonu ndi aanu. Njizire okukola ebyotaka.” Nʼolwekyo atoolawo ekika ekisooka ekyʼesadaaka gyʼebisolo, kaisi oolwo ateekewo ekyokubiri.
10 Era batusuucirye abantu abatukulye olwakubba oYesu Kurisito yakolere ekyo oKibbumba ekyataka, oweyawaireyo omubirigwe ngʼesadaaka omulundi gumo lumala.
11 Buli moiza oku bakabona bʼediini yʼeKiyudaaya, ayemerera buli lunaku, nʼawaayo emirundi mingi esadaaka eginyere egyo, egiteezya kutoolawo ebibbibibbi.
12 Neye oKurisito yeewaireyo ngʼesadaaka lumo lwonkani, neye ngʼemala-bumali okusasulira ebibbibibbi ebiseera byonabyona, kaisi nʼatyama nʼoKibbumba omu kifo kyʼekitiisya eino.
13 Eeyo gyakuumiire paka oKibbumba oweyalimaliramu nakimo abalabebe amaani nʼabasuuca ekintu kyʼokwemaku bigerebye.
14 Olwʼokuwaayo esadaaka eyo emoiza, abo abaatukulya yabasuniire obutuukirirye obwʼebiseera byonabyona.
15 Era nʼoMwoyo oMweru, ekyo akikakasa egituli. Asookesya nʼakoba ati:
16 “OMusengwa akoba ati,
eenu niiyo endagaano eginalikola nabo, enaku egyo owegyalituuka.
Naliteeka amateeka gange omu myoyo gyabwe,
era naligawandiika omu biseego byabwe.”
Tete nʼakoba ati:
17 “Nʼebibbibibbi byabwe nʼobutengu bwabwe
tinalibyewukirya tete.”
18 Era oKibbumba owaamala okusoniya abantu, wabba tiwakaali weetaagisya okuwaayo esadaaka olwʼebibbibibbi.
Twigerere eeri oKibbumba
19 Kale boluganda, atyanu twezya okwingira omu Kifo eKyeru eIno nga tubula kutya, nga twesiga tuti oYesu yasukire eisaayerye nʼafa oku lwʼebibbibibbi byaiswe.
20 Kale yatwiguliirewo enzira empyaka, era enjomi omu tubita ni twaba buteereeri omu Kifo eKyeru eIno ekyʼomwigulu nga mpaawo ekitugaana ngʼolutimbe olwabbaire omu weema. Era enzira eyo niigwo omubirigwe oguyawaireyo.
21 Kale ngʼowetuli nʼokabona akira obukulu atyo, era afuga enyumba ya Kibbumba eri omwigulu,
22 twigerere eeri oKibbumba nʼomwoyo ogubulamu bubbeyi, era ogwizwire okwikirirya. Tukikole nga tuli nʼemyoyo emiteere, nga gibulamu okuwulira omusango, era nʼemibiri gyaiswe gibulamu bufuduuki bwʼekibbikibbi nga giri ooti baginaabirye nʼamaizi agatukula.
23 Tukalangukire oku suubi ogutukobera abantu era nga tituyuugayuuga, olwakubba oKibbumba eyasuubizire, iye mwesigwa.
24 Tufengeyo ino okunoonia engeri egyʼokukumanganamu omusyo oku nsonga gyʼokutaka nʼokukola ebikole ebisa.
25 Tuleke okugayaaliriranga okwaba omu nkumbaana gyʼabaikirirya omu Kurisito, ngʼabamo owebakola. Neye buli moiza airyengemu omwinaye amaani, eino eino nga nywena owemubona muti oLunaku lwa Musengwa okwira lwatira okutuuka.
26 Singa owetwaba nga tukola ekibbikibbi omukweyendera, aate ngʼamazima ga bukwenda bwa Kurisito tumalire okugategeera, wabba tiwakaali waliwo sadaaka gendi egibawaayo olwʼebibbibibbi bwaiswe.
27 Ekibba kisigaliire, niikwo okubba omu kutya, nga tukuumiriire kutusalira musango, era nʼobukambwe bwa musyo ogwaba okwoca abalabe ba Kibbumba.
28 Omuntu eyajeemeire aMateeka ga Musa, bamwitanga-bwiti anambula kumusaasira, kasita wabbangawo abajulizi babiri ooba basatu abamulumirizanga.
29 Nʼolwekyo nʼomuntu atalyanguka oMwana wa Kibbumba, atyo eisaaye eryʼendaagano eryamutukwirye, nʼalitwala ngʼeritali lyeru, era nʼazumirira oMwoyo atulaga ekisa, museega muti tiyalisaanira ekibonerezo ekikirawo obukambwe?
30 Nti tumaite ngʼoKibbumba niiye eyakobere ati:
“Okunyaaŋa kwange,
ninze nalibasasula.”
Era eKiwandiike ekindi kikoba kiti: “OMusengwa yalisalira abantu omusango.”
31 Kyʼentiisya ino oKibbumba onyere obwomi okukusalira omusango!
32 Mwewukirye ebiseera ebyabitire, ebimwasuniiremu ekitangaala kya Mawuliro aMasa aga Yesu, ni muguminkiriza okubagadya okwʼamaani.
33 Emirundi egimo babazumire era ni babayiigaania, emirundi egindi ni mubbeera abo abebakolere batyo.
34 Mwalumirwanga ino abasibe, era mwaguminkirizanga nʼeisangaalo abantu owebabanyagireku ebyanywe, olwakubba mwamaite muti muli nʼebintu ebikirawo obusa ebiri omwigulu ebitawaawo.
35 Kale timumumanga obugumu bwanywe omu bintu bya Kibbumba, olwakubba mwalisuna empeera nene.
36 Kyetaagisya muguminkirizenge, kaisi oolwo mukolenge ebyo oKibbumba ebyataka, era kaisi abawe ekiyasuubizire.
37 Wasigaire akaseera kampi ino,
“Oyo owʼokwiza aize, era ala tiyalirwa.
38 Neye omutuukirirye wange yaabbanga mwomi lwa kwikirirya.
Neye singa aira e nyuma, tinalimusaasira.”
39 Neye iswe tituli mwabo abaira e nyuma, ni bajigirika, wazira tuli mu baabo abaikirirya, ni babalokola.