2
Okubyala oYesu
(Mat 1:19-25)
1 Awo omu naku egyo, oKaisaali Agusito nga niiye afuga obwakabaka bwʼe Looma nʼawuluca ekiragiro ati abantu bonabona abʼomu matwalege beewandiikisye, bababale.
2 Okubala abantu okwo niikwo okwabbaire okusooka ngʼoKwiriniya niiye afuga eitwale lyʼe Siiriya.
3 Awo buli muntu nʼayaba okwewandiikisirya egibamubyala.
4 Kale nʼoYusufu nʼazwa omu kibuga e Naazaleesi, ekyʼomu Galiraaya, nʼayaba omu Buyudaaya, omu kibuga e Bbeserekeemu oDawudi ekibamubyaliiremu olwakubba oYusufu yabbaire mwizukulu wa Dawudi.
5 Yaabire nʼoMalyamu okwewandiikisya, ngʼoMalyamu amusuubizire okumufumbirwa era nga kimanyikanire kiti ayaba okumufumbirwa era nʼomu kiseera ekyo ngʼali nʼekida kikulu.
6-7 Owebatuukire eeyo ni batasuna kifo omu nyumba abantu abali omu nŋendo egibagonamu era ni basigala mu kinyumba ebyayo omu bigona. Owebabbaire nga bali eeyo, enaku gya Malyamu egyʼokubyala ni gituuka. Yabyaire omwanawe omubere, mwisuka, nʼamubwika omu bugoye, kaisi nʼamuteeka omwitiba ebisolo omu biriira.
Abaliisya nʼabamalaika
8 Okumpi kumpi aawo omu kitundu ekyo, mwabbairemu abaliisya abagonanga omu kiriisiryo eeyo, nga bakuuma entaama gyabwe obwire.
9 Awo omalaika wa Musengwa oKibbumba nʼababonekera, nʼekitiisya kya Musengwa oKibbumba ni kimoleka okubeeruguulirirya. Ni batya ino!
10 Neye omalaika nʼabakoba ati, “Timwatya olwakubba mbaleeteire amawuliro amasa, agʼeisangaalo erinene eeri abantu bonabona.
11 Olwatyanu, omu kibuga egibabyala oDawudi, bababyaliiremu oMulokoli, niiye oKurisito oMusengwa.
12 Kanu niiko akamanyiciryo akembawa akemwamumanyiciryaku: Mwajirya omwana omwibo ogubabwikire omu bugoye, nga bamuteekere omwitiba ebisolo omu biriira.”
13 Amangu ago, aawo awabbaire omalaika oyo, ni waizawo nʼabamalaika abandi bangi abʼomwije eryʼomwigulu. Ni bawuuja oKibbumba nga webemba bati,
14 “Ekitiisya kibbe eeri oKibbumba omwigulu!
Era nʼoku kyalo, eidembe libbe omu bantu abo oKibbumba abaasiima!”
15 Abamalaika owebamalire okuzwa egiri abaliisya, ni bakanga omwigulu. Awo abaliisya ni bakobangana bati, “Twabe e Bbeserekeemu, tubone ekintu ekyo ekigwireyo, oMusengwa ekyatukobeire.”
16 Kale ni baabayo mangu, era ni baajirya oMalyamu nʼoYusufu, nʼomwana omwibo nga bamuteekere omwitiba ebisolo omu biriira.
17 Owebamalire okubona omwana, ni basalaania ebibono ebibabbaire babakobeire oku omwana oyo.
18 Era abantu bonabona ababiwuliire ni beewunya abaliisya abo ebibabbaire bakoba.
19 Neye oMalyamu ebibono ebyo byonabyona nʼabikuumira oku mwoyogwe, era nʼabiseegangaku ino.
20 Awo abaliisya ni bakanga egiri entaama gyabwe nga bawuuja era nga bagulumalya oKibbumba olwʼebyo ebibawuliire nʼebibaboine. Ekyo kityo olwakubba byonabyona byabbaire nga biri nakimo ngʼomalaika oweyabbaire abakobeire.
OYesu bamutwala omu Yeekaalu
21 Awo omwana oweyayererye enaku omunaana igyo egyʼokumukomoleraku, ni bamwerula bati, Yesu, iryo eriina omalaika eriyayetere omwana onu ngʼakaali nʼokubba omu kida kya maaye.
22 Awo ekiseera owekyawoireku ekyʼababyaire okubatukulya nga bamalire okubyala, ngʼowekiri omu Mateeka ga Musa, oYusufu nʼoMalyamu ni batwala omwana oYesu omu Yeekaalu e Yerusaalemi okumuwaayo eeri oMusengwa oKibbumba.
23 Ekyo bakikolere kutuukirirya kiwandiike ekiri omu Mateeka ga Musengwa ekikoba kiti, “Buli mwana omwisuka omubere, bamuwangayo eeri oMusengwa oKibbumba.”
24 Era baabire okuwaayo esadaaka, ngʼeiteeka lya Musengwa oweryabbaire liragira liti; enjiiwa ibiri ooba amaizima amatomato mabiri.
25 Awo, wabbairewo omusaiza omukaire omu Yerusaalemi eriinalye bati Simyoni. Omusaiza oyo yabbaire muntu musa, nga mutuukirirye, era ngʼakwata amateeka ga Kibbumba gonagona. Omusaiza oyo yabbaire akuumiriire okubonaku ekiseera kyʼokununula kwa Isirairi. Era yabbaire nga muntu aizwire oMwoyo oMweru.
26 OMwoyo oMweru yabbaire amumanyikisirye ati tiyalifa ngʼakaali okubona oku Kurisito oMulonde wa Musengwa oKibbumba.
27 Omu kiseera ekibaleeteiremu oYesu omu Yeekaalu oMwoyo oMweru nʼakoba oSimyoni yena nʼaiza oku Yeekaalu. Ababyaire owebatuucirye oYesu oku Yeekaalu bakole ebintu ngʼaMateeka ga Musa owegakoba,
28 oSimyoni nʼaginga omwana omu ngalogye, nʼatandiika okuwuuja oKibbumba ngʼakoba ati:
29 “Aale atyanu Musengwa Kibbumba, otuukirirye ekiwasuubizire.
Oleke omuweereryawo yeefeere kusani omwidembe,
30 olwakubba amaiso gange gaboine oku Mulokoli
31 oguwategekeire abantu bonabona,
32 oti abbe ekitangaala eeri aBatali Bayudaaya,
era awesye abantubo aBaisirairi ekitiisya.”
33 Oiteeye nʼomaaye wʼomwana ni beewunya olwʼebibono oSimyoni ebiyatumwire oku mwana oyo.
34 Awo oSimyoni nʼabasabira enkabi, tete nʼakoba oMalyamu, omaaye wʼomwana ati, “Omwana onu bamuteekerewo, okuleetera abantu bangi omwIsirairi okujigirika, neye tete era bangi basune okulokoka. Era aiza kubba kamanyiciryo akebalyakanisya,
35 era kaisi ebiseego byʼomu myoyo gyʼabantu bangi kwibo bibbutuke. Era na iwe ekiseera kyalituuka enima nʼekusumuta omwoyo ooti-so mpiima enjogi niiyo ekusumuta.”
36 Era wabbairewo nʼonaabbi omukali eriinalye bati Anna, omwala wa Fanuweri, owʼomu kika kyʼAseri. Anna oyo yabbaire mukali mukaire ino. Yabbaire yafumbiirweku nga mwala mutomuto, nʼamala emyanka musanvu omu bufumbo oibaaye nʼafa.
37 Okuzwa oolwo yabbaire yankamala emyanka 84 nga namwandu. Omukali oyo tiyaazwanga omu Yeekaalu. Omusana nʼobwire yaabbanga mu kuweererya Kibbumba nʼomu kumwegairira, era ngʼasiiba.
38 Omu kiseera ngʼoSimyoni atumula nʼababyaire ba Yesu, Anna yena nʼatuukawo era ni yeebalya oKibbumba ngʼatumula ebikwata oku mwana oyo egiri abo bonabona ababbaire bakuumiriire ebyokununula kwa Yerusaalemi.
39 OYusufu nʼoMalyamu owebamalire okutuukirirya byonabyona ngʼowebabbaire balagira omu Mateeka ga Musengwa, ni bakanga e Galiraaya omu kibuga kyʼe waabwe, e Naazaleesi.
40 Awo omwana ni yeeyongera okukula, nʼabba wa maani, ngʼaizwire amalabuki era nʼenkabi gya Kibbumba.
OYesu asigala omu Yeekaalu
41 Kale, ababyaire ba Yesu baabanga buli mwanka e Yerusaalemi, oku Mukolo ogwʼoKutambukirya.
42 OYesu oweyayererye emyanka eikumi na mibiri, ni baaba naye e Yerusaalemi ngʼowebakolanga omu kiseera ekyʼoMukolo ogwo nago.
43 Owebabbaire bakanga e waabwe, ngʼenaku gyʼoMukolo giwoireku, oYesu nʼasigala omu Yerusaalemi neye ababyairebe nga tibamaite.
44 Owebamalire okutambula olugendo lwa lunaku lubbeereri, nga baseega bati omwana ali omu kiziima kyʼabantu abebabbaire batambula nabo neenu kadi, oolwo ni bamunoonia omu baganda baabwe nʼomu mikago gyabwe.
45 Owebakayire omwana, ni bakanga e Yerusaalemi okumunoonia.
46 Wabitirewo enaku isatu kaisi ni bamubonera oku Yeekaalu, ngʼatyaime nʼabakugu omu byʼaMateeka ga Musa, ngʼali kubawulisisya era ngʼababuulya ebibuulyo.
47 Bonabona abamuwulisisirye, ni beewunya ino olwʼamalabukige nʼebyo yena ebiyabairangamu.
48 Ababyairebe owebamuboine, ni beewunya ino. Omaaye nʼamukoba ati, “Mwana wange, lwaki otukolere otyo? Oiteewo na nze tubbaire tukunoonia nga tweraliikiriire ino.”
49 Neye iye nʼabakoba ati, “Lwaki mubbaire munnoonia? Mubbaire timumaite muti nteekwa kubba mu nyumba ya Bbaabba?”
50 Neye ibo nandi ni bamanyica ekyabakobere.
51 Awo nʼayaba nabo ni baserengeta okwaba e Naazaleesi, era nʼabagonderanga. Neye omaaye nʼakuumanga ebintu ebyo byonabyona oku mwoyogwe.
52 Awo oYesu ni yeeyongeranga okukula, era ni yeeyongeranga nʼomu malabuki era nga mukoda eeri oKibbumba nʼeeri abantu.