20
OYesu bamubuulya oku bwezyebwe
(Mat 21:23-27; Mak 11:27-33)
1 Lwabbaire lumo, oYesu oweyabbaire ngʼayegesya omu Yeekaalu, era ngʼabakobera aMawuliro aMasa, abakabona abakulu nʼabakugu omu byʼaMateeka ga Musa, aamo nʼabantu abakulu omwigwanga, ni baaba egyali.
2 Kale awo ni bamubuulya bati, “Otukobere, oli na bwezyeki okukola ebintu ebyo ebyokola? Era naani eyakuwaire obwezye obwo?”
3 OYesu nʼabairamu ati, “Zena oleke mbabuulye ekibuulyo. Munkobere,
4 naani eyatumire oYokaana okubatiza, Kibbumba ooba bantu?”
5 Awo ni beegeyamu bati, “Singa tumwiramu tuti Kibbumba niiye eyamutumire, ayaba okutubuulya ati, ‘Kaisi lwaki oYokaana iye timwamwikiririiryemu?’
6 Neye singa tumwiramu tuti abantu niibo abamutumire, abantu bonabona batukubba amabbaale olwakubba baikirirya nakimo bati oYokaana yabbaire naabbi.”
7 Kale ni bairamu bati, “Titumaite eyamutumire.”
8 Awo oYesu yena nʼabakoba ati, “Aale zena tinabakobere obwezye obundinabwo okukola ebintu binu.”
Olugero lwʼabapangisya bʼomusiri
(Mat 21:33-46; Mak 12:1-12)
9 Awo oYesu ni yeeyongera era nʼagerera abantu ababbairewo olugero lunu ati, “Wabbairewo omuntu eyakomere omusiri gwʼemizabbibbu, nʼaguteekamu abapangisya, nʼayaba awantu nʼalwayo.
10 Ekiseera ekyʼamakungula owekyatuukire, nʼatuma omugalama eeri abapangisya, bamuweeku ebineneka byʼomusiri gwʼemizabbibbu. Neye ibo bamukubbire-bukubbi, era ni bamubbinga nga tibamuwaireku akantu konakona.
11 Kale nʼabasindikira tete omugalama ogondi. Neye oyo yena ni bamukubba, ni bamwemulayemula, era ni bamubbinga nga tibamuwaireku akantu konakona.
12 Era tete nʼatuma owokusatu. Nʼoyo yena ni bamutemulatemula, era ni bamutoola omu musiri ni bamumuma eedi.
13 “Awo onyere omusiri gwʼemizabbibbu ni yeebuulya ati, ‘Nakola ntya? Njaba okutuma omwana wange omutake, amo bamuwa iye ekitiisya.’
14 Neye abapangisya owebamuboine, ni beegeyamu bati, ‘Onu niiye omusika; oleke tumwite, obusika bwalibba bwaiswe.’
15 Kale ni bamutoola omu musiri gwʼemizabbibbu ogwo, ni bamutwala ni bamwita.
“Kale onyere omusiri ogwo niki ekiyalibakola?
16 Yalyaba nʼaita abapangisya abo, kaisi nʼagukwatisya abandi.”
Awo abantu ababbairewo owebawuliire ebyo ni bakoba bati, “Kadi singa ekyo tikibbaawo!”
17 Neye oYesu nʼabalingirira nakusani, kaisi nʼababuulya ati, “Aale eKiwandiike kinu kibba kitegeeza niki? Ekikoba kiti:
‘Eibbaale abombeki eribagaine,
lisuukire niiryo erikulu erisiba ensonda.’ ”
18 “Buli muntu agaana enjegesya yange ali ooti muntu agwa okwibbaale eeryo, nʼavunikavunika, era ali ooti yooyo oguligwaku ni limususungula.”
19 Awo abakugu omu byʼaMateeka ga Musa nʼabakabona abakulu, olwakubba babbaire bamaite bati olugero oolwo oYesu olwagerere, lubbaire lukwata ku niibo, ni banoonia engeri yʼokumukwata omu kaseera akananyere ako neye ni batya abantu.
Ebikwata oku kuwa omusolo
(Mat 22:15-22; Mak 12:13-17)
20 Kale awo abakugu omu byʼaMateeka ga Musa na bakabona abakulu owebabbaire bakaali bakiiya oYesu okumukwata, ni batuma abakeeti beesuuce ooti bantu abasa, bamukwatisye omu bibono ebyatumula, kaisi bayezye okumuwaayo omu mbuga yʼoweitwale lyʼe Buyudaaya.
21 Batyo abakeeti abo ni bamukoba bati, “Musomesya, tumaite tuti ebyotumula nʼebyoyegesya byʼamazima, era tomomola omu bantu, neye obeegesya mu mazima ebyo oKibbumba ebyataka bakole.
22 Atyanu Musengwa, otukobere: Kibba kituuce okuwa oKaisaali omusolo, ooba bbe?”
23 Neye oYesu nʼamanyica omutego gwabwe ogubabbaireku, kaisi nʼabakoba ati,
24 “Kaade muleete edinaali. Ekifaananyi nʼamaliina ebiriku byani?” Ni bamwiramu bati, “Bya Kaisaali.”
25 Awo oYesu nʼabakoba ati, “Kale ebya Kaisaali mubiwe oKaisaali, nʼebya Kibbumba mubiwe oKibbumba.”
26 Batyo abakeeti ni bateezya kumukwatikisya omu kintu kadi kimo okubiyatumwire aawo omu maiso gʼabantu. Kale ni beewunya ino olwʼekiyabairiremu, era ni basirika.
Ebikwata oku kuzuukira
(Mat 22:23-33; Mak 12:18-27)
27 Awo aBasedukaayo olwakubba bakoba bati mpaawo kuzuukira, abamo ni baaba egiri oYesu ni bamubuulya bati,
28 “Musomesya, oMusa yatuwandikiire ekiragiro kiti omuntu owaafa, nʼaleka onamwandu, neye nga tabyaireku omwana, omuganda wʼomufu ali nʼokufumbirwa onamwandu oyo, kaisi abyalire omugandawe abaana.
29 Kale wabbairewo abaganda musanvu. Asooka nʼaleeta omukali, neye nʼafa nga tabyaireku omwana.
30 Nʼowokubiri nʼamusika era yena nʼafa nga tamubyairemu omwana.
31 Era nʼowokusatu yena atyo. Nʼomu ngeri enanyere eyo bonabona omusanvu ni basikaku omukali oyo, era ni bafa nga tibamubyairemu omwana.
32 Oluzwanyuma, omukali yena nʼafa.
33 Atyanu oolwo oku lunaku olwʼokuzuukira, omukali oyo yalibba mukaani, ngoyo bonabona omusanvu bamufumbiirweku?”
34 Awo oYesu nʼabairamu ati, “Abantu abʼoku kyalo kunu ibo basuna obufumbo.
35 Neye abantu abo oKibbumba abaasaniza okubba omwigulu oluzwanyuma lwʼokuzuukira, ibo tibalibba nʼobufumbo.
36 Era ibo balibba tibeezya okufa tete olwakubba balibba ooti bamalaika. Era balibba baana ba Kibbumba olwakubba balibba bazuukiire.
37 Era nʼoMusa alaga ati abafu bazuukira olwakubba omu kitundu ekitumula oku kisaka, atumula oku Musengwa oKibbumba ati, Kibbumba wa Ibbulaimu, era wa Isaka, era wa Yaakobbo.
38 OKibbumba wa bantu ababba aboomi newankubbaire nga bamalire okufa neye tiwa bantu abasigala omu kufa, olwakubba aboomi nʼabafu eeri oKibbumba babba boomi.”
39 Abamo oku bakugu omu byʼaMateeka ga Musa ni bairamu bati, “Musomesya, oiriremu kusani.”
40 Bakobere batyo olwakubba wabbaire mpaawo eyaguma ni yeeyongera okumubuulya ebibuulyo ebindi.
OKurisito nʼoDawudi
(Mat 22:41-46; Mak 12:35-37)
41 Awo oYesu nʼabakoba ati, “Beezya batya okukoba bati oKurisito ogubasukireku amafuta, Mwizukulu wa kabaka oDawudi?
42 NgʼoDawudi onyere, omu kitabo kya Zabbuli yakobere ati:
‘OMusengwa oKibbumba yakobere oMusengwa wange ati:
Otyame ngʼondiraine oku lubba lwange olwʼengalo endiiro,
43 paka owenaligondya abalabebo
ni mbasuuca mukonkolo gwa kuwuumuliryaku ebigerebyo.’
44 “Ooba ngʼoDawudi onyere amweta ‘Musengwawe’ kaisi tete oKurisito ayezya atya okubba mwizukuluwe?”
Okwekuuma abakugu omu byʼaMateeka
(Mat 23:1-36; Mak 12:38-40)
45 Kale awo abantu bonabona nga bawulira, oYesu nʼakoba abeegibe ati,
46 “Mwekuume abakugu omu byʼaMateeka ga Musa, abataka okutambula nga bazwaire ebizwalo ebyanvuwiriri ebyekuusira ansi, okulaga bati bantu beeru. Era bataka okubasugiryasugirya omu butale nʼokutyama omu bifo ebyʼomu maiso omu makumbaaniro, nʼomu bifo ebyʼabantu abʼekitiisya oku mambaga.
47 Era banyaga ebintu byonabyona omu manyumba ga banamwandu, nʼokusaba oKibbumba omu bibono ebingi olwʼokweraga. Abo balisuna ekibonerezo ekikiraku obunene.”