13
Simon loh Rhalboei a bi
1 Trypho loh Judah khohmuen te muk tih phae hamla caem muep a hueh te Simon loh a yaak.
2 Pilnam tah rhihnah neh a mawntang te khaw a hmuh. Te dongah Jerusalem la mael tih pilnam te tun a coi.
3 Amih te a thaphoh tih, “Ka manuca neh kai taengah dumlai a len a pai khaw na ming uh. A pa imkhui long khaw hmuencim neh olkhueng ham ni a bi uh. Kai neh ka manuca loh aka rhaikoek caemrhal ka tong he khaw na ming uh.
4 Ka maya long khaw Israel ham ni a hinglu a voeih tih ka mah bueng la n'cul sak.
5 Rhainah tue vaengah ka hingnah ka hlun ham tah kai lamloh savisava saeh. Ka maya lakah kai ka then tloe aih moenih.
6 Kai tah ka namtu ham khaw, hmuencim ham khaw, na yuu na ca rhoek khaw tawn ka loh pueng ni. Namtom rhoek ngawn tah mamih thup hamla tun tingtung uh ngawn coeng dae,” a ti nah.
7 He ol a yaak uh vaengah tah pilnam khaw a mueihla let uh.
8 Te dongah anih te ol a huel tih, “Nang tah na maya Jonathan yuengla Judah hmuen kah mawt kung pai ni.
9 Kaimih kah caemrhal khaw han tloek lamtah na thui bangla ka saii uh bitni,” a ti nah.
10 Te dongah hlangrhalh te boeih a coi tih Jerusalem vongtung te bang a khah uh. Te phoeiah a kaepvai boeih a cak la a biing.
11 Jonathan capa Absalom te Joppa la rhalkap neh muep a tueih tih khohmuen a huul neh aka naeh rhoek te boeih a vai.
Trypho kah Thailatanah
12 Te vaengah Trypho te Judah khohmuen te rhawt hamla Ptolemais lamloh rhalkap neh muep cet tih, Jonathan te khaw rhaltawt neh a khuen.
13 Simon tah Adida rhaldan kah kolvan ah rhaeh.
14 Simon tah a manuca Jonathan yueng a om khaw, a taengah caemtloek a paan ham khaw a ming.
15 Te dongah laipai a tueih tih, “Na manuca Jonathan he tah manghai koe a ba tih, yung ah khaw a paek ham a om dongah ni ka khoh.
16 Te dongah tangka talent yakhat neh a ca rhoi te tlansum la ham pat laeh. Anih ka hlah phoeiah khaw kan tloelh mahpawh a ti atah kan hlah bitni,” a ti nah.
17 Laithae a thui te Simon loh a ming ngawn dae tangka neh a ca rhoi te a pat pah. Pilnam khuikah hopalaek tho boel saeh lamtah,
18 “Simon loh a ca rhoi neh tangka talent yakhat a pat pawt dongah Jonathan duek,” ti boel saeh tite a ngaih.
19 Te dongah a ca rhoi neh tangka talent yakhat te a pat. Tedae Trypho loh a ol te a hnukpoh tih Jonathan te hlah pawh.
20 He phoeiah tah Trypholoh khohmuen loh hamla cet tih a phae. Adora long puei kaepvai te khaw a hil. Tedae Simon neh a rhalkap rhoek te a rhaldang ah mekah hmuen khaw rhoengrhoeng a caeh pah.
21 Te vaengah rhalmah im kah hlang rhoek loh puencoe te duem a tueih tih, Trypho te khosoek lamloh mael saeh lamtah amih ham caak han pat saeh,” a ti nah.
22 Te dongah Trypho khaw a marhang caemt e boeih loh tih caeh hamla cai dae khoyin ah vuel muep tla tih vuel loh khoep a kang dongah cet uh pawh. Te dongah a caeh te paa uh tih Gilead la cet uh.
23 Baskama a pha vaengah tah Jonathan te a ngawn tih pahoi a up.
24 Te phoeiah tah amah khohmuen la mael.
Jonathan kah Phuel
25 Simon hlang a tueih tih a maya Jonathan kah a rhuh te a loh phoeiah a napa rhoek kah khopuei Modein ah a up.
26 Anih hamla Israel pum te rhahlung a tloh neh khohnin a set puet rhungrhap uh.
27 Simon loh Jonathan kah lungrhang te a napa neh a manuca rhoek kah phuel dongah a sak pah. Te te a sang la a saii tih kawl hmuh koila a hnukhmai khaw boeih a pi a cai.
28 Te kah a hmai ah khaw a napa ham, a manu ham, a manuca rhoek hamla pyramid parhih a saii pah.
29 Pyramid te khaw a tlingtlawnnah tloeptloep a khueh. Lungpa khaw muep a ling pah tih lungpang dongah a yoeyah la poekkoepnah la a pumcunah ne a tarhit pah. Te phoeiah a pumcunah sangpho muei te khaw a thuk pah. Te dongah tuitunli kah a pongpa boeih loh kawl a hmuh.
30 Te kah poekkoepnah lungrhang te Modein ah a sak tih tihnin duela om pueng.
Judea loh Loeihnah a dang
31 Trypho loh camoe manghai Antiochus te a thailatnah ne a saii tih a ngawn.
32 Te dongah anih yueng la manghai tih Asia kah rhuisam te a khuem dae khohmuen ah citcai muep a pai sak.
33 Tedae Simon tah Judea ah hmuencak te a sak tih a kaepvai te boeih a thung. Rhaltoeng imsang neh te vongka te khaw thohkalh boeih a khueh tih hmuencak ah caak a tung.
34 Simon loh puencoe a tueih tih amih te manghai Demetrius taengla duem a tueih. Khohmuen he Trypho loh a poelyoe tangtae khohmuen he koep thoh hamla rhennah a bih.
35 Tekah a bihnah te Demetrius loh kolo cala a lan tih a dangkah bangla ca a pat.
36 Manghai Demetrius loh Simon khosoih boei neh manghai paya taengah khaw, a hamca rhoek te Judah namtu te khaw kut kan tuuk.
37 Sui rhuisam neh rhophoe hnah nan pat te khaw ka hmuh. Nangmih neh langya la rhoepnah saii ham khaw oepsoeh la ka om uh. Nangmih te mangmu loeih sak hamla ka boei rhoek taengah khaw ca ka pat coeng.
38 Nangmih ham kan paek ka saii tangtae boeih tang nangmih taengah langya la om saeh. Hmuencak na sak te khaw namamih hut la om saeh.
39 Tihnin ah tholdalhnah neh a lolhmaihnah om cakhaw khodawk kan ngai coeng. Mangmu na ba te khaw boeih kan hlah coeng.
40 Ka taengom rhalkap la aka tueng ni a om atah amih long te khaw bi van saeh. Mamih laklo ah rhoepnah om saeh,” a ti nah.
41 Kum ya sawmrhih vaengah tah Gentile kah hamkun boeih te Israel pum dong lamloh a dul pah.
42 Te vaengah pilnam boeih a ca a daek vaengah khaw, oltloeknah a daek vaengah khaw, “Khosoih boei neh Judah mawtkung rhalboei Simon kah a kum khat nah,” tila a daek uh.
Simon loh Gazara a loh
43 Te khohnin ah Simon loh Gazara te a rhaeh thil thi a kaepvai te rhalkap ne a dum. Tanglung seh te a saii tih khopuei la a khuen. Te phoeiah imsang pakhat te a thuk tih a loh.
44 Seh dongkah hlang rhoek te khopuei khuila a cungpoeh uh dongah khopuei soekltoeknah la muep pai.
45 Khopuei hlang rhoek tah a yuu khaw a ca rhoek khaw vongtung taengla cet uh a himbai te a phen uh. A ol a len pang tih Simon taengah rhoepnah saii hamla a bih uh.
46 “Kaimih he ka halangnah bangla n'thueng boel mai lamtah, na sitlohnah mah han saii mai,” a ti nah.
47 Te dongah Simon loh amih neh kotluepnah a khueh tih amih a tloek te a toeng. Tedae amih te khopuei lamloh a haek. Mueirhol a khuehnah im te khaw a ciim uh tih laa neh koehnah neh ael uh.
48 Aka cuempawt boeih tah te lamloh a khoe tih olkhueng a tuem te a khueh. Im lo te khaw a cak la koep a moem tih amah ham im pakhat a sak.
Jerusalem Rhalmah im ah Simon Ngol
49 Jerusalem rhalmah im kah aka om rhoek tah cet tih kho khuiah hno a lai ham khaw, a yoih ham khaw a khang pah. Te dongah a bung bahoeng pong uh tih lamlum neh muep duek uh.
50 Te vaengah tah Simon neh rhoepnah saii hamla pang uh tih a saii uh tangloeng. Tedae amih loh a tanghnong sak rhalmah im te khaw koep a caihcil uh.
51 Kum ya sawmrhih kum khat a hla bae hnin hlai thum vaengah tah rhal puei a phop tih Israel lamloh a khoe coeng dongah, Judah rhoek te koehnah rhophoe neh, rhotoeng neh, tlaklak neh, tangkoei neh, tingtoeng neh, laa neh kun uh.
52 Kum takuem te khohnin tah omngaihnah khohnin la khueh ham Simon loh ol a tloek. Rhalmah im tlang hlaep kah bawk im khaw a cak la koep a moem tih a hlang rhoek neh pahoi kho a sak.
53 Simon loh a capa Johan te hlang a mingnah coeng tila a hmuh vaengah tah rhalkap boeih kah rhalboei la a khueh tih Gazara ah kho a sak.