14
Demetrius tukan
1 Kum ya sawmrhih kum nit vaengah manghai Demertius loh a rhalkap te a coi tih Media kah bomnah te Trypho taengah vathoh hamla a loh.
2 Demetrius loh a khorhi a rhawt pah te Persia neh Media mangha Arsaces loh a yaak vaengah h anih te a hing la tuuk sak ham a rhalboei a tueih.
3 Rhalboei te khaw cet van tih Demmetrius kah caem te a yawk sak. Amah te a tuuk tih Arsces taeng la a khueh. Te loh anih te thongim ah a khueh.
Simon kah Olcueih
4 Khohmuen he Simon kah khohnin khuiah mong, A namtu ham a then ni a tlap. A uknah he amih a kongaih la om, A mah tue khuiah tah anih te hinyahnah tueng.
5 Amah thangpomnah rhuisam la, Joppa te lamkai la a khueh tih tuipuei sang ham longpuei a ong pah.
6 A namtu kah khorhih khaw a aeh pa tih, khohmuen temrhainah rhep a dang.
7 Anih loh tamna boeiping khaw a coi tih, Gazara neh Bethzur neh, rhalmah im a uk. Te lamkah aka cim pawt khaw a khoe tih, anih aka tloelh a om moenih.
8 A khohmuen te ngaimong la a tawn uh tih, Diklai loh a pueh la a paek, kolvan thing thaih khaw a thaih rhah.
9 Longpuei ah khaw patong rhoek ngol, amih long khaw olthen ni a thui uh tih, Ca dong rhoek loh rhuepom caempho a bai.
10 Khopuei hamla buh a khuen pah tih, vongtung neh amih te a tungaep, A ming thang loh diklai khobawt a pha.
11 Khohmuen ah rhalmongnah a pai sak tih, Israel kah omngaih tangkik la a kohoe.
12 Pilnam boeih te amah kah misur thaibu kung ah ngol, amih kah a rhih ham pakhat khaw om pawh.
13 Amih aka hnuei ham khohmuen ah a sueng moenih, manghai rhoek khaw te khohnin ah a phop coeng.
14 A pilnam khuikah tlayae rhoek te a bom tih, Olkhueng bueng te a toem coeng dongah, Hnukpoh olaek rhoek te boeih a khoe.
15 Hmuecim khaw rhuepom la a khueh tih, hmuencim kah amrhaeng te koep a koei.
Rom neh Sparta kah Voekhlaknah
16 Jonathan a duek te Rome neh Sparta duela a yaak uh vaengah a ko muep thae uh.
17 Anih yueng la a maya Simon tah khosoih boei la a om te khaw, a khohmuen neh a kho aka taemrhai la a om te khaw a yaak uh.
18 Te vaengah anih ham te rhohum cabael dongah a thai la paya neh huitai la omnah te daek pah. Te te a manuca Judas neh Jonathan taengkah a thoh taengtae pawn ni.
19 He he Jerusalem kah hlangping hmaiah a tae pah.
20 He kah catlaep pakhat he Spartan taengah a pat. Khoboei rhoek neh Spartan khopuei kah loh khosoih boeih Simon taeng neh a hmaca rhoek, khosoih rhoek, ka manuca Judah pilnam boeih te kut kan tuuk.
21 Ka pilnam taengla nan tueih laipai rhoek loh nangmih thangpomnah neh hinyah nah te khaw a thui dongah kaimih taengla halo uh te ka omngaih uh.
22 Amih kah a thui boeih te langya la ka thui uh a dangkah bangla oltloeknah ka khueh uh. Antiochus capa Numenius neh Jason capa Anitpater, Judah laipai rhoek te kaimih taengla halo tih mamih kah paya coengnah te koep ka thoelh uh.
23 He kah hlang rhoek hinyahkap la doe ham khaw, amih kah olka cabu he rhangpuei kah dongah khueh ham he khaw ka pilnam loh a uem. Te daengah ni Spartan pilnam long khaw amih kah catlaep te a khueh thai eh. Te phoeiah catlaep pakhat he khosoih boeih Simon taengah ka pat,” a ti nah.
24 Roman neh huitai la omnah te cak sak ham Simon loh Numenius te sui photling a len a khiing minas thawng khat aka lo te a khuen sak tih Rome la a tueih.
Simon Thangpomnah
25 He olka he pilnam loh a yaak vaengah, “Simon neh a capa metluk lae n'uem eh?.
26 Amah khaw, a manuca rhoek khaw, a napa imkhui khaw a pai cak uh. Israel kah rhal te a vai tih a haek phoeih a loeihnah te a pai sak.
27 Te dongah ca te rhohum cabel dongah a tarhit uh Zion Tlang kah tung dongah a tai uh.
Amih kah catlaep dongah tah, “Kum ya sawmrhih kum bae, khosoih boei Simon kah a kum thum nah, Elul hla hnin hlai rhet,
28 Asaramel kah rhaengpuei tungpuei ah khosoih rhoek neh pilnam long khaw, namtu khoboei rhoek long khaw, khohmuen a hamca rhoek long khaw a dang kah olhoenah he ka khueh uh
29 Khohmuen ah rhalthohnah aka puek taitu parhi te, Joarib koca, Mattahtias capa khosoih Simon neh a manuca rhoek tah mueirhih dongah khaw amah phum uh tih, a namtu ham rhal khaw a tungaep. A hmuencim neh a olkhueng khaw a huul dongah a namtu ham thangpomnah a len a khuen pah.
30 Jonathan loh namtu te a cului tih khosoih boei la a om phoeiah khaw a pilnam te koep a coi.
31 A rhal rhoek loh a khohmuen te loh pah ham a cai tih a hmuencim te kut a hlah thil vaengah,
32 Simon te thoo tih a namtu hamla a vathoh.
33 A tangka te muep a hnonah tih a namtu kah rhalkap te thapang a paek. Judea kah khopuei rhoek neh Judea khorhi kah Bethzur te khaw a cak sak. Lamhma kah rhalkap rhoek pumcumnah koep a paek tih Judea kah rhaltawt la a khueh.
34 A noekbuet ah rhla loh kho a sak nah, tuipuei kaengkah Joppa neh Azotus khorhi kah Gazara khaw a cak sak. Teah te Judah rhoek kho a thong sak tih khoembaelnah ham khaw kho a khan pah.
35 Pilnam loh Simon kah uepomnah neh namtu ham lai a rhoe tih thangpom nah a dang te a hmuh. Te dongah anih te khosoih boei neh mawtkung la a khueh uh. Hno a saii boeih dongah a namtu ham tiktamnah neh uepomnah a khueh pah tih a pilnam pomsang hamla a longpuei cungkuem la a tlap.
36 Amah tue vaengah tah a kut dongah hnopai khaw puh. Te dongah Gentiles rhoek tah khohmuen rhamvoel la a khueh uh. Gentile rhoek te Jerusalem kah David khopuei om uh tih a rhalmah im khaw a sak uh. Te te rhatoeng la a hnonah uh tih hmuecim kaepvai a poeih uh. A cimnah nte khaw a porhak la muep a khueh.
37 Te khuiah Simon loh Judah rhoek a om sak tih, khohmuen neh khopuei kah hiluepnah hamla Jerusalem vong te koep a poeng.
38 He rhoek he a hmuh vaengah manghai Demetrius loh anih te khosoih boei la a cak sak.
39 Anih te paya la pakhat la a khueh tih a sang la thangpomnah a paek.
40 Judah he Roman loh paya la, huitai la, manuca la a khueh tih, Simon kah laipai rhoek te khaw Romanh loh thangpomnah neh a doe te amah loh a yaak coeng.
41 Tonghma a tingtawk te a phoe hlankhui tah Siomna te amih mawtkung neh khosoih boei la om saeh tila Judah rhoek neh a khosoih rhoek a kovai uh.
42 Simon te amih kah khoboei la a khueh tih hmuencim te a hutnah a paek uh. Khohmuenkah boei boeih soah neh, lungpokhaica soah khaw, hmuencak sokah a hutnah te khaw, hmuencim kah a hutnah te khaw anih a paek uh.
43 Te dongah anih ol te boeih ngai uh sae lamtah a ram kah ca boeih te anih ming neh daek uh saeh, anih tah daidi neh sui himbai te bai saeh.
44 He oltloeknah neh a olhui aka oelh ham te mebang pilnam neh mebang khosoih long khaw saii boel saeh. Anih kah kotlingnah a om pawt atah a khohmuen rhaengpuei tingtunnah khaw, daidi himbai neh sui hnisui a aka bai khaw om boel saeh.
45 Oltloeknah he a phaelh ka aka khueh tih aka aek boeih tah dantatnah yook saeh.
46 Oltloek bangla saii ham Simon taengah hamsum a paek te pilnam boeih loh a kovai uh.
47 Te dongah Simon te khosoih boei la om ham khaw, rhalboei la, Judah rhoek kah khoboei, khosoih la, amih boeih aka tungaep la a doe uh tih a kovai uh.
48 Te phoeiah oltloeknah boeih te rhohum cabaeldongah tarhit tih hmuencim hmai kah miklaw ah tai ham neh,
49 catlaep pakhat te Simon neh a ca rhoek hut la, thakvoh khuiah khoem saeh tila ol a paek.