5
Judah rhoek Boeih Dueksak Ham Olpaek
1 Manghai Philopator tah a noek kah lakah muep sai coeng. Te dongah caemtloek vaengkah vuei aka dawn Hermon te a tueih.
2 Philopator loh anih te a dangkah oltloeknah neh, “Thangvuen ah vuei len yanga te frankimcese neh yu thoek pah lamtah tul. Te phoei ah vuei te a thintoek te rhui saeh. Te vaengah toltung la han khuen lamtah Judah rhoek te a dueknah hil til saeh,” a ti nah.
3 Te phoeiah tah manghai te poeikung la mael. Teah te a uepnah a paya rhoek khaw om uh tih a rhalkap kah rhalboei rhoek khaw om. Amih loh Judah rhoek soah dueknah a pai ham te a uum uh.
4 Te vaengah, Hermon khaw a thui pa bangla saii ham cet coeng.
5 Toltung kah sal rhoek long khaw Judah kah a ram tah a khoe pawn ni tila a tangnah uh. Amih thongtla rhoek te khat khaw a yong pawt ham a ngaih uh. Te dongah amah tekah hlaem ah tah sal rhoek te toltung la cet uh sih Judah rhoek kah a kut te a pin pa uh.
6 Namtom rhoek khaw Judah rhoek daemnah ham te saii uh thai voel pawh.
7 Amih khaw a tat uh thai van moenih.
Judah rhoek a tloh la rhap uh tih cungkuem aka uk neh thaomnah aka khueh Pathen taengah ol a len la thangthui uh.
8 Boeipa taengkah rhennah neh aka muen kholong hlang te thuung hamla a bih uh.
9 Amih te dueknah khui lamloh loeihnah hamla a bih uh vanbangla Pathen loh amih kah thangthunah te a yaak.
Pathen loh Judah rhoek a hlawt
10 Te vaengah Hermon loh vuei rhoek te frankincense neh yu te ngahngah a tul a cah dae ca uh pawt tih o uh voel pawh. Te phoeiah tah manghai kah maengtaengnah bangla boeih a saii te thui ham impuei vongup la cet.
11 Tedae Boeipa loh Philopator te muelh a ih sak. He tah Judah rhoek hlawtnah hamla Boeipa kah longpuei coeng ni.
12 Philopator tah a mikku loh a payawk coeng dongah boethae kah mangtaengnah saii ham khaw Hermon te olpae thai voel pawh.
13 Judah rhoek ngawnnah tue te voelh a poeng coeng. Te dongah a cim Pathen kah sitlohnah te uum uh tih a koeh uh. Te phoeiah kholong mangkhak rhoek taengah tloengkhoelh thaomnah tueng sak ham a bih uh.
14 Khothun lung ah tah manghai im la yin nawt a pai te poei taemkung rhoek loh a hmuh uh. Te dongah Philopator te a haeng uh.
15 A haenghang na thueng ah tah poei tong ham om coeng dae metla a om khaw a thui pa uh.
16 Philopator khaw a ngaihmang tih yin rhoek te ongol uh dae a ti nah. Te phoeiah a caak uh tih a ok uh.
17 Hlang boeih te amah ah omngaih uh lamtah mela aka khum tangtae tah hnilh uh laeh,' a ti nah.
18 Rhai a di phoeiah atah Philopator loh Hermon te a khue tih Judah rhoek vawk a hingnah kawng te a dawt.
19 Hermon neh khoboei rhoek long khaw hlaemyin ah manghai loh a uen bangla metla a saii uh khaw a thui pa uh.
20 Philopator tah hlangang lakah khaw sai coeng tih Hermon te, “Tihnin ah ka ip muelh tih Judah rhoek he daem uh. Thangvuen ah hebang pilnam rhalawt rhoek te vuei loh khoe uh kangna saeh,” a ti.
21 Poei kah yin rhoek loh a uem uh tih manghai kah mangtaengnah te a caksak uh phoeiah im la mael uh.
22 Te khoyin ah a then la ip uh voel pawh. Judah rhoek a poci te hnaelcoe tih o ham te a poek uet ah hak uh.
Pathen Loh Judah rhoek pabae la a Hlawt
23 A vuen mincang ai a khong cuek nen tah Hermon loh vuei rhoek te frankincense a cah tih yu khaw boeih a tul coeng. Te phoeiah caehlong la a mawt tih toltung la a khuen.
24 Longpuei pha ah pilnam hlangping tah khothaih vaengah Judah rhoeh ham rhihomnah aka thoeng te aka so la khawk taii uh coeng.
25 Judah rhoek tah ngaiuepnah bawt coeng. A hingnah he a tue kolkalh ni tila a ming uh.Te dongah a kut te vaan la thoh uh Khohni Pathen taengah a len la pang uh. Amih loeihnah ham te a bih uh.
26 Khomik a thoeng van nen tah Philopator loh a uepnah a paya rhoek te manghai im la a doe. Hukkhueng kah Hermon a pai due sikim la a om khawng te a thui tih amih khaw toltung la suntlak ham a coep.
27 Tedae Philopator amah te lukil vilvak tangkik coeng tih Hermon taeng a thui ham khaw poeknah om voel pawh. Manghai amah vik loh Hermon taengah baham lae nang kang khue oem te a ti nah.
28 Philopator a mangtaengnah a hnilh vilvak khaw cungkuem aka uk Pathen long ni a hmuek sak coeng.
29 Hermon neh manghai paya rhoek loh Philopator taengah, “Judah rhoek ngawn hamla vuei khaw rhalkap khaw manghai olpaek vanbangla sikim coeng,” a ti nah.
30 Te long te manghai lukil la a coeng sak. Pathen loh anih te a cungkuem boeih a hnilh sak.
31 Philopator loh Hermon neh a tloe rhoek te, “Rhep ka caeng coeng he, na yuu na ca rhoek khaw om vetih amih te vuei aka cah mahko, Judah rhoek ka cah yuengla. Judah rhoek kah a pa rhoek tue lamloh uepom lam ni a om uh a thae a saii moenih.
32 Kai taengah na then pawt tih nangmih taengah ka then pawt koinih na hingnah uh he khum daengrhae pawn ni,” a ti nah.
33 Hermon loh a yaak vaengah nangnah thai pawt nih a tharhuithanal dongah khaw lakueng coeng.
34 Manghai paya rhoek khaw khat phoeiah khat bit uh tih cet uh. Pilnam te khaw, “Namah kah bitat mah saii duem,” a ti nah uh.
35 Judah rhoek loh manghai olcal te a yaak uh vaengah Pathen loh amih koep n'hlawt bal coeng tila a ming uh. Te dongahh ukkung boeih kah manghai Boeipa Pathen te a koeh uh.
Philopator Judah rhoek ngawn ham koep cai
36 Manghai Philopator amah kah yin rhoek te poei kung la koep a khue tih amih te koep ook thil ham a cael.
37 Hermon te a khue tih a thintoek neh, “Nang na ang tangkik, meyet lae nang taengah ka thui coeng.
38 Vuei rhoek te koep lo laeh, thangvuen ah Judah rhoek vuei loh a til te ka ngaih,” a ti nah.
39 Philopator taengah rhep aka ngol rhoek loh anih he ang coeng a ti uh.
40 Te dongah amah te, “Tongmang nang, te tla om ham te anih loh nang meyet lae n'rhing coeng? Kamih ka ang uh moenih ta, hnavoei loengloeng he tla na thui coeng dae na lungbuei te na hoi vilvak mai.
41 Alexandria ah pilnam raengpuei khaw khawk thet coeng. Amih long khaw a hnuenah coeng tih a thintoek uh coeng. Amih te huesak ni ti ka rhih uh coeng,” a ti na uh.
42 Philopator tah sai hmalet bal tih Judah rhoek kah uepomnah a oep te khaw a hnilh. Te vaengahI, “Kamah hingnah rhoe neh ka toemngam coeng he Judah rhoek te tlek a dueknanah hamla vuei loh til saeh.
43 Judah khopuei rhoek te hmaithoi neh caai neh ka tloek bitni. A khopuei rhoek khaw a hong neh a poci la om saeh. Jerumsalem bawkim khaw diklai ah a hloi la tluum saeh. Te la kai n'kun sak pawt van dongah tekah hmuen hmueih aka nawn u khat khaw om van kangna boel saeh,” a ti.
44 Manghai kah a uepnah paya rhoek te caempuei rhalboei rhoek khaw kohlop la om tih khopuei kaepvai kah namtlak takuem ah rhaltawt boeih a khueh uh.
Toltung la Vuei a mawt uh
45 Hermon loh vuei rhoek thintoek neh rhui saeh a ti dongah yu muep a tul tih frankincense khaw muep a cah. Vuei kah a bung neh a vae ah tumcaca neh cunghang muep a vah sak.
46 Te phoeiah manghai im vongup la suntla thuk tih a sikim la a om te Philopator taengah a thui. Toltung so ham aka cet khopuei pilnam rhaengpuei khaw amah caehlong ah muep bae uh.
47 Philopator khaw vuei kah a tlung neh Judah rhoek thakkhoeih patang la a dueknah te hmuh hamla phuel uh coeng.
48 Vuei loh vongka la a yoei phai vaengah laivai a khu sak te Judah rhoek loh a hm uh. Vuei hnuk kah rhalkap rhoek neh pilnam rhoek te khaw a dan uh.
49 Hlang kah vupang ol te Judah rhoek loh a yaak vaengah tah lakuengnah loh rhep a tum uh tih duek pahoi ham ni a poek uh coeng. Amih te kothae neh rhung uh tih rhap uh. Khat neh khat mok uh thae tih kop uh thae. Amih khui ah te manu napa neh a ca rhoek khaw, manu camoe cacun rhoek khaw om uh.
50 Tedae amih Pathen loh amih hnukbuet kah a bom te ni a poek uh. Te dongah diklai la bakop uh tih thangthui uh.
51 Pathen taengah ol a huel tih a pang uh vaengah a cahni rhoek te khaw a kaep ah sut a yalh sak uh. Dueknah a tong vaengah rhennah hmuh ham neh Pathen amah he cungkuemg ukkung tila tueng sak ham a bih uh.