दानिय्येल कि किताब
दानिय्येल हेसुर इन किताब
परिचय
दानिय्येल उन परिचय दानिय्येल उन किताब बेबीलोन दा इस्राएलीगोळ्द निर्वासन इन समय इन दौरान भविष्यवक्ता दानिय्येल उन जीवन अदिक भविष्यसूचक दर्शन देल संबधित आद. ईव दानिय्येल अदिक आऊन संगीगोळ्द वफादारी इन सांगुळ राष्ट्रगोळ अदिक दुनिया देल संबधित भविष्यवाणीगोळ्द बारा दा हेळतद. ईद किताब 650 सेल लगभग 535 ईसा पूर्व अन समय इन कवर माळतद, यल दानिय्येल बेबीलोन इन नाक अलग-अलग राजागोळ्द शासनकाल इन दौरान स्यावा माळीदुन. पारंपरिक दृष्टिकोण ईद आद कि दानिय्येल खुद ई समय इन दौरान बेबीलोन दा किताब लिख्सीदुन, लेकीन हापाळ आधुनिक विद्वानगोळ्द दावा आद कि ईद बाद्दा ईसा पूर्व दुसरा शताब्दी इन दौरान इस्राएल दा लिख्सकु आगीत. दुसरा लॉकुर्द मानना आद कि किताब इन येनारा भाग अलग-अलग समय मा लिख्सकु आगीदव.
दानिय्येल उन किताब निर्वासन दा ईरावाळेर इस्राएलीगोळ सांगुळ-सांगुळ कठिन समय बंदुर मा बरावाळा पिढ़ीगोळ इक आशा कोळोर साटी लिख्सकु आगीत. दानिय्येल उन जीवन इन घटनागोळ अदिक भविष्य देल संबंधित भविष्यवाणीगोळ्द माध्यम देल, परमेश्वर राजागोळ अदिक राष्ट्रगोळ मा तान ताकत तोर्सतान. बाईबल इन संदर्भ दा, ईद व्हाशोद नियम दा परमेश्वर उन राज्य अक समसोद दा मदत माळतद. दानिय्येल 7:13-14 दा मसीह अन्द भविष्यवाणी माळकु आग्याद. आखरी समय इन संबंध दा दानिय्येल उन दर्शन इन उल्लेख यीशु उन द्वारा माळकु आग्याद मत्ती 24:15,मरकुस 13:14अदिक यूहन्ना अन्द प्रकाशितवाक्य देल संबंधित आद. दानिय्येल यिर्मयाह अन्द भविष्यवाणीगोळ मा भी विचार माळतद (दानिय्येल 9:1-3).
रूप रेखा:
1. नबूकदनेस्सर उन शासनकाल इन दौरान बेबीलोन दा दानिय्येल अदिक आऊन संगीगोळ बारा दा हेळतद. 1–4
2. राजा बेलशस्सर उन दर्शन इन दानिय्येल उन व्याख्या अन बारा दा हेळतद. 5
3. दारा राजा अन्द शासनकाल इन दौरान हुल्ल इन गुफा दा दानिय्येल उन बारा दा हेळतद. 6
4 भविष्य अन्द घटनागोळ्द संबंध दा परमेश्वर देल दानिय्येल ताका खुलासा शामिल आव
a दानिय्येल भविष्य अन बारा दा येढ्ढ दर्शन अदिक अऊर्द व्याख्यागोळ्द वर्णन माळतान. 7–8
b दानिय्येल तान लॉकुर साटी प्रार्थना माळतान अदिक स्वर्गदूत जिब्राएल द्वारा आऊन उत्तर कोटकु आगतद. 9
c जिब्राएल आखरी समय सांगुळ भविष्य अन्द घटनागोळ्द खुलासा माळतान. 10–12
1
दानिय्येल अदिक आऊन संगीगोळ
(1:1–6:28)
नाक हारोदोर नबूकदनेस्सर उन राजसभा दा
1 यहूदा प्रदेश इन राजा यहोयाकीम उन राज्यकाल इन तिसरा वर्ष दा बेबीलोन द्याश इन राजा नबूकदनेस्सर यहूदा अन राजधानी यरूशलेम मा आक्रमण माळ बुटुन, अदिक अदरी घेर्स बुटुन.
2 आग प्रभु परमेश्वर यहूदा अन राजा यहोयाकीम अदिक आऊन नगर इक नबूकदनेस्सर उन कय दा सौप्स बु़ट्टुन. नबूकदनेस्सर परमेश्वर उन मंदिर इन थ्वाळासा पवित्र बरतनगोळ मा भी अधिकार माळ कोंडुन, अदिक आव आ बरतनगोळ इक शिनार द्याश दा तान द्याव उन मंदिर दा ओतकु, तान द्याव उन भंडारग्रह दा ईट्ट बुट्टुन.
3 राजा नबूकदनेस्सर तान मुख्य खोजा अशपनज उक आदेश कोट्टुन, होगी अदिक इस्त्राएली कौम इन आ बंदीगोळी तरी जो राजपरिवार अदिक कुलीन वंश इन आर.
4 आंदुर हारोदोर ईर पायजे अदिक आंदुर्दा यातोदु प्रकार इन शारीरिक दोष ईरबाळुल. आंदुर नोळदुर दा सुंदर ईरूल अदिक सप्पा प्रकार देल बुद्धिमान ईरूल. आंदुर ग्यान देल परिपूर्ण अदिक विद्वान ईरूल. आंदुर राजभवन दा स्यावा माळोर योग्य ईरूल. याग आंदुर बेबीलोन दा होट्ट बरूल आग आंदरी कसदी कौम इन साहित्य अदिक भाषा कलसेतीर.
मुख्य खोजा अशपनज राजा नबूकदनेस्सर उन आदेश उन पालन माळदुन.
5 राजा आदेश कोट्टुन कि इस्राएली कौम इन आ हारोदोर पारगोळ इक अदा राजकीय भोजन कोटकु आगुल जो आंदुर खुद तिनतान; अदा सारा आंदरी कुळ्सकु आगुल जो आंदुर खुद कुडुतार. इदुर अलावा आंदरी मुर वर्ष ताका आंदुर्द पालन पोषण माळकु आगुल. ई अवधि इन बाद्दा आंदुर राजा नबूकदनेस्सर उन स्यावा दा उपस्थित ईरूल.
6 ई इस्राएली हारोदोर पारगोळ दा टु यहूदा कुल इंदुर नाक हारोदोर इंदुर ईरोर: दानिएल, हनन्याह, मीशाएल अदिक अजर्याह.
7 मुख्य खोजा अशपनज आंदरी व्हाशोद हेसुर कोट्टुन. आव दानिएल उन हेसुर बेलतशस्सर, हनन्याह अन्द शद्रक, मीशाएल उन मेशक अदिक अजर्याह अन्द अबेदनगो ईटदुन.
8 लेकीन दानिएल तान दिल दा ईद निश्चय माळदुन कि आव राजा अन्द भोजन तिनतीदील अदिक सारा कुडुतीदील जो राजा कुडुतान; अदिक हिंग तान तान इन अशुद्ध माळालुन. इदुरसाटी आव मुख्य खोजा अशपनज से निवेदन माळदुन, “नीव नान इक महाराज उन आदेश से मुक्त ईटुल यदुर देल ना अशुद्ध आग बाळुल.”
9 परमेश्वर मुख्य खोजा अशपनज उन दिल दा दानिएल उन प्रति कृपा अदिक दया उत्पन्न माळदुन.
10 लेकीन मुख्य खोजा दानिएल से अंदुन, नान इक ई मात इन अंज्क आद कि अगर नीव नान महाराजा द्वारा निश्चित माळ्द खान-पान ताकोंडीर ईला रा नीम्द स्वास्थ्य नीम्द हारोदोर संगीगोळ्द अपेक्षा बिदोदित. याग नान स्वामी नीम्द ईळुकु मार्रा नोळ्यान, आग नीव नान ताल्ला अक खतरा दा हाक्क बुट्टीर. महाराजा नान ताल्ला धड़ टु अलग माळ बुट्टान.
11 मुख्य खोजा अशपनज दानिएल, हनन्याह, मीशाएल अदिक अजर्याह अन्द भोजन-व्यवस्था माळोर साटी ऊंद मुखिया अक नियुक्त माळीदुर. दानिएल आ मुखिया से अंदुन,
12 ना नीन से विनती माळतीन कि नीव तान ई सेवकगोळ इक हत्त दिन ताका जाँच अदिक नामी भोजन दा साग-सब्जी अदिक कुडोर साटी नीर कोळी.
13 आग नीव नाम्द मार्रागोळ इक महाराजा उन द्वारा निश्चित माळकु आदव राजकीय भोजन माळावाळेर पारगोळ्द मार्रागोळ से मिलुसी अदिक आग नीव ह्यांग नोळीर अदिक वळ्लीद सम्सीर हांग अच व्यवहार तान ई सेवकगोळ सांगुळ माळी.
14 मुखिया ई संबंध दा दानिएल अदिक आऊन संगीगोळ्द मात मान्स कोंडुर अदिक हत्त दिन ताका आंदरी जाच्सदुर अदिक परखुसदुर.
15 हत्त दिन इन बाद्दा मुखिया नोळदुन कि दानिएल अदिक आऊन संगीगोळ मार्रगोळ राजकीय भोजन माळावाळेर सप्पा पारगोळ मार्रगोळ से यक्कुल खिलुस्कु आव, अदिक आंदुर वजन भी वाळुस्याद.
16 अत: भोजन इन व्यवस्था माळावाळा मुखिया राजा अन द्वारा निश्चित माळ्द खान-पान इक कोळोद बंद माळ बु़ट्टुन अदिक अऊर जागा मा आव आंदरी साग-सब्जी कोळली कुरतुन.
17 परमेश्वर ई नाक इस्राएली हारोदोर पारगोळ इक सप्पा प्रकार इन वाचुसोद-लिखसोद अदिक सप्पा प्रकार इन ग्यान इक समसोर बुद्धि अदिक चतुराई प्रदान माळदुन. दानिएल हर प्रकार इन दिव्य-दर्शन अदिक कांसा अन्द मतलब सम्सली कुरतुन. आऊंदा ईद होट्ट बत्त.
18 राजा नबूकदनेस्सर ईद आदेश कोटीदुन कि इस्राएली कौम इन सप्पा हारोदोर पारगोळ मुर वर्ष इन बाद्दा आऊन मुंद राजमहल दा प्रस्तुत माळकु आगुल. याग ईद समय पुरा आत आग मुख्य खोजा अशपनज आंदरी राजमहल दा ओतुन. आव आंदरी राजा अन्द मुंद हाजीर माळदुन.
19 राजा नबूकदनेस्सर आ हारोदोर पारगोळ से मात-चीत माळदुन अदिक आऊक ईद अनुभव आत कि दानिएल, हनन्याह, मीशाएल अदिक अजर्याह आ सप्पा हारोदोर पारगोळ दा टु सर्वश्रेष्ठ आन. अत: आव आंदरी तान स्यावा दा नियुक्त माळ बुट्टुन.
20 याग यागल्यारा राजा बुद्धि अदिक समझ इन बारा दा आंदुर से यातोदारा प्रश्न केळोन, आग आंदुर उत्तर केळकु राजा अक ईद अनुभव आगोद कि आंदुर आऊन राज्य तिमोर सप्पा ज्योतिषिगोळ अदिक तांत्रिकगोळ से हत्त गुणा यक्कुल प्रवीण आर.
21 अदिक दानिएल बेबीलोन इन दरबार दा सम्राट कुस्रू उन राज्यकाल इन पयला वर्ष ताका ईत्तुन.