48
गोत्रगोळ दा जागा अन वाटप
1 गोत्रगोळ दा जमीन-वितरण “गोत्रगोळ भाग आगुल: उत्तरी सीमा देल हद्द हेतलोन इन हादी इन हाती टु हमात इन घाटी ताका, अदिक दमिश्क इन सीमा अन हाती इन हसरेनान टु उत्तर इन दी हमात इन हाती ताका ऊंद भाग दान इन ईरूल; अदिक अदुर्द पूर्वी अदिक पश्चिमी सीमा भी ईरूल.
2 दान इन सीमा टु हतकु पूर्व टु पश्चिम ताका आशेर उन ऊंद भाग ईरूल.
3 आशेर इन सीमा टु हद्द, पूर्व टु पश्चिम ताका नप्ताली इन ऊंद भाग आगुल.
4 नप्ताली इन सीमा टु हद्द पूर्व टु पश्चिम ताका मनश्शे अन ऊंद भाग.
5 मनश्शे अन सीमा टु हद्द पूर्व टु पश्चिम ताका एप्रैम उन ऊंद भाग ईरूल.
6 एप्रैम उन सीमा टु हद्द पूर्व टु पश्चिम ताका रूबेन उन ऊंद भाग आगुल.
7 रूबेन इन सीमा टु हद्द, पूर्व टु पश्चिम ताका यहूदा अन ऊंद भाग आगुल.”
द्याश इन न्याड्या दा जमीन इन खास भाग
8 यहूदा अन सीमा टु हद्द पूर्व टु पश्चिम ताका अद अर्पण माळ्द भाग आगुल, यदरी नीमी अर्पण माळोद बीद्दीत, अद पच्चीस हजार बास चौळा अदिक पूर्व टु पश्चिम ताका यातोदारा ऊंद गोत्र अन भाग इन तुल्य लंबा ईरूल, अदिक अदुर न्याड्या दा पवित्र जागा ईरूल.
9 जो भाग नीमी यहोवा अक अर्पण माळोद ईत्तीत, अदुर लंबाई पच्चीस हजार बास अदिक चौळाई हत्त हजार बास इन ईरूल.
10 ईद अर्पण माळ्द पवित्र भाग याजकगोळी सीकुल; अद उत्तर दी पच्चीस हजार बास लंबा, पश्चिम इन दी हत्त हजार बास चौळा, पूर्व दी हत्त हजार बास लंबा अदिक दक्षीण इन दी पच्चीस हजार बास लंबा आगुल; अदिक अदुर न्याड्या यहोवा अन पवित्र जागा ईरूल.
11 ईद खास पवित्र भाग सदोक उन सन्तान इन आ याजकगोळ्द आगुल जो नान आग्यागोळ्द पालन माळतार, अदिक इस्त्राएलगोळ्द भटकुसदुर समय लेवीगोळ घाई ईला भटकुसीदुर.
12 ईदुरसाटी द्याश इन अर्पण माळ्द भाग दा टु ईद आंदुर साटी अर्पण माळ्द भाग मतलब परमपवित्र द्याश ठहरूसुल; अदिक लेवीगोळ सीमा से हतकु ईरूल.
13 याजकगोळ सीमा देल हद्द लेवीगोळ्द भाग ईरूल, अद पच्चीस हजार बास लंबा अदिक हत्त हजार बास चौळा ईरूल. सप्पा लंबाई पच्चीस हजार बास इन अदिक चौळाई हत्त हजार बास इन आगुल.
14 आंदुर अदुर दा टु न रा येनारा मारूल, न दुसरा जमीन देल बदलुसुल; अदिक न जमीन इन पयला उपज अदिक यारीकारा भी कोटकु आगुल. यतिकी अद यहोवा अन साटी पवित्र आद.
15 “चौळाई इन पच्चीस हजार बास इन मुंद जो अईद हजार मिक्कु ईत्तीत, अद नगर अदिक मोहल्ला अदिक चराई इन साटी साधारण भाग आगुल; अदिक नगर अदुर न्याड्या दा ईरूल.
16 नगर इन ईद माप आगुल, मतलब उत्तर, दक्षिण, पूर्व अदिक पश्चिम इन दी साळे नाक नाक हजार कय.
17 नगर इन हात्ती उत्तर, दक्षिण, पूर्व पश्चिम दा चराईगोळ ईरूल. जो येढ्ढवार येढ्ढवार सौ बास चौळा ईरूल.
18 अर्पण माळ्द पवित्र भाग इन हाती लंबाई दा टु जो येनारा उळुल, मतलब पूर्व अदिक पश्चिम येढ्ढु दी हत्त हत्त हजार बास को अर्पण माळ्द भाग इन हाती ईरूल, अदुर ऊपज नगर दा मयनत माळावाळेर्द तीनोर साटी आगुल.
19 इस्त्राएल इन सप्पा गोत्र दा टु जो नगर दा मयनत माळतार, आंदुर अदुर्द खेती माळुल.
20 सप्पा अर्पण माळ्द भाग पच्चीस हजार बास लंबा अदिक पच्चीस हजार बास चौळा ईरूल; नीमी चौकोर पवित्र भाग अर्पण माळोद बिद्दीत यदुर दा नगर इन खास जमीन ईरूल.”
21 “जो भाग ईतोगुल, अद प्रधान उक सीकुल. पवित्र अर्पण माळ्द भाग इन. अदिक नगर इन खास जमीन इन येढ्ढु दी मतलब आंदुर पूर्व अदिक पश्चिम इन दी पच्चीस पच्चीस हजार बास इन चौळाई इन हात्ती, जो अदिक गोत्रगोळ भाग इन हाती ईरूल, अद प्रधान उक सीकुल. अर्पण माळ्द पवित्र भाग अदिक भवन इन पवित्र जागा आंदुर बीच दा ईरूल.
22 जो प्रधान उन भाग ईत्तीत, अद लेवीगोळ न्याड्या अदिक नगरगोळ खास जमीन आगुल, प्रधान उन हिस्सा यहूदा अदिक बिन्यामीन इन सीमा अन न्याड्या दा आगुल.”
अन्य गोत्रगोळ भाग
23 “अन्य गोत्रगोळ भाग ई प्रकार आगुल: पूर्व टु पश्चिम ताका बिन्यामीन उन ऊंद भाग ईरूल.
24 बिन्यामीन उन सीमा से हदद पूर्व टु पश्चिम ताका शिमोन उन ऊंद भाग.
25 शिमोन उन सीमा से हदद पूर्व टु पश्चिम ताका इस्साकार उन ऊंद भाग.
26 इस्साकार इन सीमा टु हद्द पूर्व टु पश्चिम ताका जबूलून उन ऊंद भाग.
27 जबूलून उन सीमा से हद्द पूर्व टु पश्चिम ताका गाद उन ऊंद भाग.
28 अदिक गाद इन सीमा अन हात्ती दक्षीण इन दी सीमा तामार टु हुडुकु कादेश इन मरीबोत हेसुर इन सोता ताका, अदिक मिस्त्र अन नाला अदिक महासागार ताका पोहचुसुल.
29 जो द्याश नीमी इस्त्राएल उन गोत्रगोळ इक वाटसोद आदीत अद ईदा हुन, अदिक आंदुर भाग भी ईवा हु, परमेश्वर यहोवा अन ईदा वाणी हुन.”
नगर इन दरवाजा
30 “नगर इन निकास ईद आगुल, मतलब उत्तर इन दी यदुर्द लंबाई साळे नाक हजार बास इन आगुल.
31 अदुर दा मुर फाटक ईरूल; मतलब ऊंद रूबेन उन फाटक, ऊंद यहूदा अन फाटक, अदिक ऊंद लेवी इन फाटक आगुल; यतिकी नगर इन फाटक इन हेसुर इस्त्राएल इन गोत्रगोळ हेसुर मा ईटोद बीद्दीत.
32 पूर्व इन दीकळोद सीमा साळे नाक हजार बास लंबा आगुल, अदिक अदुर दा नाक फाटक ईरूल; मतलब ऊंद यूसुफ उन फाटक, ऊंद बिन्यामीन उन फाटक, अदिक ऊंद दान इन फाटक.
33 दक्षीण इन दी सीमा साळे नाक हजार बास लंबा ईरूल, अदिक अदुर दा मुर फाटक ईरूल; मतलब ऊंद शिमोन उन फाटक, ऊंद इस्साकार उन फाटक, अदिक जबूलून उन फाटक;
34 अदिक पश्चिम इन दीकळोद सीमा साळे नाक हजार बास लंबा ईरूल, अदिक अदुर दा मुर फाटक ईरूल; मतलब ऊंद गाद उन फाटक, ऊंद आशेर उन फाटक, अदिक ऊंद नप्ताली इन फाटक ईरूल.
35 नगर इन नाकु दी घेरा अठरा हजार बास इन ईरूल, अदिक अदिक आ दिशी टु नगर इन हेसुर ‘यहोवा शाम्मा’ ईत्तीत.”