1 ना धरती मा ऊंद अदिक बुराई नोळदीन, अदुर भार देल मंळसा वतकु ईरतान. 2 अद बुराई ईद हुन: परमेश्वर मंळसा अक धन-सम्पत्ति अदिक प्रतिष्ठा प्रदान माळतान, अदिक मंळसा अक तान इच्छा अन्द अनुसार सप्पा येनारा प्राप्त आगेगतद. आऊक यातोदु वस्तु अन्द अभाव ईराल्द. लेकीन आ मंळसा अक परमेश्वर धन-सम्पत्ति भोगसोद सामर्थ्य कोळाल्द; बल्‍की अनजान मंळसा आऊन धन-सम्पत्ति भोग्सतान. इदुरसाटी धन-सम्पत्ति बेकार आद, ईद भयानक दुख इ मात आद. 3 अगर यावारा मंळसा अन्द सौ पार पैदा आगतार, अदिक आव लम्बा उमर ताका जीत्ता ईरतान, दीर्घ आयु प्राप्त माळतान, लेकीन अगर आव जीवन इन सुखगोळ इक भोग्स सकालुन, सोतुर मा आखरी किर्या भी आऊक प्राप्त आग बाळुल, रा ना ईद अनाईन: हिंग मंळसा से अधुरा समय दा जनमुस्द सोतकु पार वळ्लेव आन. 4 सोतकु बच्चा ई धरती मा व्यर्थ अच बरतान, अदिक अंधकार दा लुप्त आगेगतान, अदिक आऊन हेसुर भी अंधकार दा मुच्चेगतद. 5 आव सूर्य अन्द प्रकाश उक नोळ सकीदील, अदिक आऊक जीवन इन येनु अनुभव आगीदील. फिर भी आऊक आ दीर्घायु वाळा मंळसा से येक्‍कुल आराम सिक्त. 6 चाहे मंळसा येढ्ढ हजार वर्ष जीऊसुल, लेकीन अगर आव जीवन इन आनन्द पूर्वक भोग माळालुन रा हिंग दीर्घायु देल येन लाभ? सप्पा मंळसा जीवन इन आखरी दा ऊंद अच जागा अक होगतार. 7 मंळसा तान व्हाट्टा अन्द साटी अच सप्पा मेहनत माळतान, तौभी आऊन व्हाट्टा यागलु तुमाल्द. 8 अत: बुद्धिमान मंळसा याता मात दा मूर्ख मंळसा से श्रेष्ठ आदुन? गरीब मंळसा, जो ईद जान्सतान कि जीवन दा ह्यांग आचरण माळ पायजे, आऊन से याता मात दा श्रेष्ठ सिद्ध आदुन? 9 कण्णगोळ देल नोळ कोमोद मन इन चंचल कामनागोळ से उत्तम आद. अत: व्हाट्टा अन्द साटी मेहनत माळोद भी बेकार आद, ईद मानसी हवा अक हुडोद आद. 10 जो यावारा भी मंळसा आगुल, आऊक आऊन हेसुर पयले टु अच कोटकु आगीत: मंळसा अन्द बारा दा ईद प्रकट माळकु आगेग्याद कि आव केवल मुण्ण आन. अत: आव तान से येक्‍कुल बलवान मंळसा से लळाई माळ सकालुन. 11 जीवन इन बारा दा याट विचार माळी, आट अच अद बेकार हततद, रा हिंग जीवन देल मंळसा अक येन लाभ? 12 मंळसा तान क्षणिक जीवन सावली इन घाई व्यतीत माळतान; अत: याव जानस्तान कि आऊन साटी हिंग जीवन दा उत्तम येन आद? मंळसा अक याव हेळ सकतान कि आऊन सोत्तुर बाद्दा सूर्य अन्द ल्‍यालमा धरती मा येन आदीत?