34
इस्त्राएल इन चरवाहागोळ
1 यहोवा अन ईद वचन नान हाती पोहचुस्त:
2 “हे मंळसा अन सन्तान, इस्त्राएल इन चरहावा अन विरूद्ध भविष्यवाणी माळकु आ चरवाहागोळ से अन, परमेश्वर यहोवा ईद अनतान: हाय इस्त्राएल इन चरवाहा मा जो तान तान व्हाट्टा तुमतार! येन चरवाहागोळ मर्र-म्यांढ्ढागोळ्द व्हाट्टा ईला तुम पायजे?
3 नीव लॉकुर ण्याण तिनतीर, ऊन हाकतीर अदिक मोटा मोटा जनावरगोळ इक कडुतीर; लेकीन मर्र-म्यांढ्ढागोळ इक नीव आळसालीर.
4 नीव बिमारगोळी बलवान माळीदील, ना रोगीगोळी चंगा माळीर, न घायलगोळ्द घावगोळी कटीर, न तेग्द इक वापस माळीर, ना काळ्द इक ढुंढसीर, लेकीन नीव ताकत अदिक जबरदस्ती देल अधिकार नळसीर.
5 अव चरवाहा अन ईला ईत्तुर कारण तितर-बितर आदव; अदिक सप्पा आळी दाकळव जनावरगोळद आहार आगेदव.
6 नान मर्र-म्यांढ्ढा तितर-बितर आगेग्याव; अव सप्पा पहाळीगोळ अदिक ऊँचा ऊँचा टीलागोळ मा भटकुसव; नान मर्र-म्यांढ्ढा सप्पा पृथ्वी इन म्याकुच तितर-बितर आदव; अदिक ना याऊ अऊरव सुधी ताकोमोन, ना यावारा अवरी ढुंढसोन.
7 “ई कारण, हे चरवाहागोळा, यहोवा अन वचन केळी:
8 परमेश्वर यहोवा अन ईदा वाणी आद, नान जीवन इन किर्या, नानव मर्र-म्यांढ्ढा जो लुटुसीग्याव, अदिक नानव मर्र-म्यांढ्ढा जो चरवाहा अन ईला ईत्तुर कारण सप्पा आळी दाकळव जनावरगोळ्द आहार आगेदव; अदिक ईदुरसाटी कि नान चरवाहागोळ नान मर्र-म्यांढ्ढागोळ्द सुधी ताकोंडीदील, अदिक नान मर्र-म्यांढ्ढा अन ईला, तांद अच व्हाट्टा तुमदुर;
9 ई कारण हे चरवाहागोळा, यहोवा अन वचन केळी,
10 परमेश्वर यहोवा ईद अनतान: नोळी, ना चरवाहागोळ विरूद्ध आईन; अदिक ना आंदुर से तान मर्र-म्यांढ्ढागोळ्द लेखा ताकोमाईन, अदिक आंदरी बाक अवरी आळ्स गोळतीदील; आंदुर बाक तान तान व्हाट्टा तुम सकतीदील. ना तान मर्र-म्यांढ्ढा आंदुर बाय टु बीळसाईन कि मुंद इक अव अऊरव आहार आगबाळुल.
वळ्लेव चरवाहा
11 “यतिकी परमेश्वर यहोवा ईद अनतान: नोळी, ना खुद अच तान मर्र-म्यांढ्ढागोळ्द सुधी ताकोमाईन, अदिक अवरी ढुंढसाईन.
12 ह्यांग चरवाहा तान मर्र-म्यांढ्ढागोळ दा टु भटकुस्द इक मात तान झुंड दा जमा माळतान, हांग अच ना भी तान मर्र-म्यांढ्ढागोळ इक जमा माळाईन; ना अवरी आ सप्पा जागागोळ टु तेगुकु तराईन, येल येल अव बादल अदिक घोर अंधकार इन दिशी तितर-बितर आगेग्याव.
13 ना अवरी द्याश द्याश इन लॉकुर दा टु तेगाईन, अदिक द्याश द्याश टु जमा माळाईन, अदिक अऊर दा खुद इन जमीन दा तराईन; अदिक इस्त्राएल इन पहाळीगोळ मा अदिक नालागोळ दा अदिक द्याश इन सप्पा बसुस्द जागागोळ मा आळसाईन.
14 ना अवरी वळ्लीद चराई दा आळसाईन, अदिक इस्त्राएल इन ऊँचा ऊँचा पहाळी मा अवरी चराई सीक्कीत; अल अव वळ्लीद हरीयाली दा कुरतोदव, अदिक इस्त्राएल इन पहाळी मा वळ्लीद से वळ्लीद चराई चरूसेव.
15 ना खुद अच तान मर्र-म्यांढ्ढागोळोव आळसावाळा आगाईन, अदिक ना खुद अच अवरी कुरसाईन, परमेश्वर यहोवा अन ईदा वाणी हुन.
16 ना काळ्द इक ढुंढसाईन, अदिक तेग्द इक वापस तराईन, अदिक घायल इन घाव इक कटाईन, अदिक बीमार इक बलवान माळाईन अदिक जो मोटा अदिक ताकवर आद अवरी ना नष्ट माळाईन; ना अऊर्द चरवाही न्याय देल माळाईन.
17 “हे नान झुण्ड, नीम से परमेश्वर यहोवा ईद अनतान: नोळी, ना मर्र-म्यांडा अदिक व्हात इन न्याड्या न्याय माळतीन.
18 येन नीमी ईद श्याण मात जान्सकु बीळतद कि नीव वळ्लीद चराई चरूसी अदिक मिग्द चराई इक तान काल देल मेटी; अदिक येन नीमी ईद श्याण मात जान्सकु बीळतद कि नीव निर्मल नीर कुडुकोमी अदिक मिग्द नीर इक तान कालगोळ देल डवला माळी?
19 येन नान मर्र-म्यांढ्ढागोळी इक नीम कालगोळ से मेटकु आग्याव इक रचोद, अदिक नीम कालगोळ देल डवला माळ्द इक कुडोद बीद्दीत?
20 “ई कारण परमेश्वर यहोवा आंदुर से ईद अनतान: नोळी, ना खुद मोटा अदिक पतला मर्र-म्यांढ्ढागोळ न्याड्या न्याय माळाईन.
21 नीव जो सप्पा बिमारगोळी पंजागोळ अदिक खांदा देल ईल ताका ढकलुसतीर अदिक सींग देल ईल ताका बडुतीर कि अव तीतर-बितर आगेगताव,
22 ई कारण ना तान मर्र-म्यांढ्ढागोळी बीळसाईन, अदिक अव बाक ईला लुटसेव, अदिक मर्र-मर्र इन म्यांढ्ढा म्यांढ्ढा अन न्याड्या न्याय माळाईन.
23 ना आंदुर मा हींग चरवाहा ठहरुसाईन जो अऊर चरवाही माळ्यान, आव नान दास दाऊद आदान, आवा अवरी आळस्यान, अदिक आवा अऊरव आळसावाळा आदान.
24 ना, यहोवा, अऊरव परमेश्वर ठहरूसाईन, अदिक नान दास दाऊद आऊन न्याड्या प्रधान आदान; ना यहोवा अच ईद अंदीन.
25 “ना अऊर सांगुळ शांती इ वादा माळाईन, अदिक दुष्ट किळागोळी द्याश दा ईर गोळतीदील; अत: अव आळी दा निडर ईत्ताव, अदिक आळी दा मींगेव.
26 ना अवरी अदिक तान पहाळी इन आस पास इन जागागोळी आशीष इन कारण माळ कोमाईन; अदिक मेंह अक ना ठीक समय दा बरसुसाईन; अदिक अद आशीष इन माळ आदीत.
27 मैदान इन मार्र फलुसेव अदिक जमीन तान उपज पैदा माळीत, अदिक अव द्याश द्याश दा निडर ईत्तव; याग ना अऊर गुलामी अन जुवा अक मुरूकु आ लॉकुर कय देल बीळसाईन, जो अऊर से स्यावा माळसुसतार, आग आंदुर जान्स कोंडार कि ना यहोवा हुईन.
28 अव बाक जाती जाती देल लुट्सकु आगतीदील, अदिक ना आळी दाकळव जनावर अवरी हरूकु तींदव; अव निडर ईत्तव, अदिक अवरी याऊ अंजुसतीदील.
29 ना आंदुर साटी उपजाऊ बारी उपजुसाईन, अदिक अव द्याश दा बाक हस्तकु सायतीदील, अदिक न जाती-जाती इन लॉकुर बाक अऊर्द निंदा माळ्यार.
30 आंदुर जानस्यार कि ना परमेश्वर यहोवा, अऊर सांगुळ आईन, अदिक आंदुर जो इस्त्राएल उन घराना आर, आंदुर नान प्रजा उर, ना परमेश्वर यहोवा अन ईदा वाणी आद.
31 नीव रा नान मर्र-म्यांढ्ढागोळ, नान चराई इन मर्र-म्यांढ्ढागोळ हुईर, नीव रा मंळसा हुईर, अदिक ना नीमव परमेश्वर हुईन, परमेश्वर यहोवा अन ईदा वाणी हुन.”