40
निवास स्थान निद्रुसोद अदिक अदुर प्रतिष्ठा
1 बाक यहोवा मूसा से अंदुन,
2 “पयला तिंगुळ इन पयला दिन इक नी मिलाप इन तम्बु उन निवास इक निद्रुस बुळेत.
3 अदिक अदुर दा साक्षीपत्र अन सन्दुक इक ईटकु बीच इन पळदा देल व्हर्तुस बुळी.
4 अदिक मेज इक बुळ्क ओतकु जो येनारा अदुर मा सजुसोद आद अदरी सजुस बुळेत; आग दीवट इक बुळ्क ओतकु अदुर दिंग्यागोळी होताक बुळेत.
5 अदिक साक्षीपत्र अन सन्दुक इन मुंद व्हान्ना अन वेदी इक, जो धूप इन साटी आद अदरी ईटेत, अदिक निवास इन दरवाजा अन पळदा अक हच बुळेत.
6 अदिक मिलाप इन तम्बु उन निवास इन दरवाजा अन मुंद होमवेदी इक ईटेत.
7 अदिक मिलाप इन तम्बु अदिक वेदी इन न्याड्या हौदी इक ईटकु अदुर दा नीर तुमेत.
8 अदिक नाकु दिकळोद आंगुळ इन कनात इक निद्रुसेत, अदिक आ आंगुळ इन दरवाजा मा पळदा अक हिलगुस बुळेत.
9 अदिक अभिषेक इन याण्णा हुडुकु निवास इन अदिक जो येनारा अदुर दा ईत्तीत सप्पा येनारा अन अभिषेक माळेत, अदिक सप्पा सामान समेत अदरी पवित्र माळेत; आग अद पवित्र ठहरूसीत.
10 सप्पा सामान समेत होमबली वेदी इन अभिषेक माळकु अदरी पवित्र माळेत; आग अद परम पवित्र ठहरूसीत.
11 पाया समेत गंगार इन भी अभिषेक माळकु अदरी पवित्र माळेत.
12 आग हारून अदिक आऊन पारगोळी मिलाप इन तम्बु उन दरवाजा मा ओतकु नीर देल मय तोळसुसेत,
13 अदिक हारून उक पवित्र कपळा हाकसुसेत, अदिक आऊन अभिषेक माळकु आऊक पवित्र माळेत कि आव नान साटी याजक उन क्याल्सा माळुल.
14 अदिक आऊन पारगोळी ओतकु अंगरखा हाकसुसेत,
15 अदिक ह्यांग नी आंदुर आप्प उन अभिषेक माळ्या हांगा आंदुर्द भी अभिषेक माळेत कि आंदुर नान साटी याजक उन क्याल्सा माळुल; अदिक आंदुर अभिषेक आंदुर्द पीढ़ोन पीढ़ी अन साटी आंदुर्द हमेशा अन याजकपद इन चिन्ह ठहरूसीत.”
16 ईत्ता प्रकार देल मूसा, जो आग्या यहोवा आऊक कोटीदुन अदुर्दा अनुसार माळदुन.
17 अदिक दुसरा साल इन पयला तिंगुळ इन पयला दिशी निवास निद्रुसकु आत.
18 मूसा निवास इक निद्रुसुसदुन, अदिक अदुर कुर्चीगोळ हुळकु अदुर तखत हचकु अऊर दा बेंड हाकदुन, अदिक अदुर खम्बागोळी निद्रुसदुन;
19 अदिक आव निवास इन म्याकुच तम्बु उक फैलुसदुन, अदिक तम्बु उन म्याकुच आव ओढ़ना अक हचदुन; याता प्रकार देल यहोवा मूसा अक आग्या कोटीदुन.
20 अदिक आव साक्षीपत्र अक हुडुकु सन्दुक दा ईटदुन, अदिक सन्दुक दा डण्डागोळी हचकु अदुर म्याकुच प्रायश्चित इन झाकनी इक ईट कोट्टुन;
21 अदिक आव सन्दुक इक निवास दा पोहचुसदुन, अदिक बीच इन पळदा अक हिलगुसकु साक्षीपत्र अन सन्दुक इक अदुर बुळ्क माळदुन; याता प्रकार देल यहोवा मूसा अक आग्या कोटीदुन.
22 अदिक आव मिलाप इन तम्बु दा निवास इन उत्तर दिशा दी न्याड्या अन पळदा से व्हार्या मेज इक हचदुन,
23 अदिक अदुर मा आव यहोवा अन मुंद रोट्टी सजुसकु ईटदुन; याता प्रकार देल यहोवा मूसा अक आग्या कोटीदुन.
24 अदिक आव मिलाप इन तम्बु दा मेज इन मुंद निवास इन दक्षिण दिशा दी दीवट इक ईटदुन,
25 अदिक आव दिंग्यागोळी यहोवा अन मुंद होताक बुट्टुन; याता प्रकार देल यहोवा मूसा अक आग्या कोटीदुन.
26 अदिक आव मिलाप इन तम्बु दा न्याड्या अन पळदा अन मुंद व्हान्ना अन वेदी इक ईटदुन,
27 अदिक आव अदुर मा सुगन्धित धूप होताकदुन; याता प्रकार देल यहोवा मूसा अक आग्या कोटीदुन.
28 अदिक आव निवास इन दरवाजा मा पळदा अक हचदुन.
29 अदिक मिलाप इन तम्बु उन निवास इन दरवाजा मा होमवेदी इक ईटकु अदुर मा होमबलि अदिक अन्नबलि इक येर्सदुन; याता प्रकार देल यहोवा मूसा अक आग्या कोटीदुन.
30 अदिक आव मिलाप इन तम्बु अदिक वेदी इन न्याड्या गंगार इक ईटकु अदुर दा तोळोर साटी नीर हाकदुन.
31 अदिक मूसा, हारून अदिक आऊन पारगोळ अदुर दा तान तान कय काल तोळदुर;
32 अदिक याग याग आंदुर मिलाप इन तम्बु दा या वेदी इन हात्ती होगतोगोर आग आग आंदुर कय काल तोळु तोगोर; याता प्रकार देल यहोवा मूसा अक आग्या कोटीदुन.
33 अदिक आव निवास इन नाकु दी अदिक वेदी इन आसपास आंगुळ इन कनात इक निद्रुसुसदुन, अदिक आंगुळ इन दरवाजा अन पळदा अक हिलगुस बुट्टुन. ईत्ता प्रकार देल मूसा सप्पा क्याल्सा पुरा माळदुन.
मिलाप इन तम्बु मा बादल
(गिनती 9:15-23)
34 आग बादल मिलाप इन तम्बु मा छासेत, अदिक यहोवा अन तेज निवास स्थान दा तुम्मेत.
35 अदिक बादल मिलाप इन तम्बु मा रूकसेत, अदिक यहोवा अन तेज निवास स्थान दा तुम्मेत, ई कारण मूसा अदुर दा प्रवेश माळ सकीदील.
36 इस्त्राएलीगोळ्द पुरा यात्रा दा हींग आगतोगोद, कि याग याग अद बादल निवास इन म्याकुच टु येळोद आग आग आंदुर अल टु नळोद चालु माळतोगोर;
37 अदिक अगर अद ईला येळतोगोद, रा याता दिशी ताका अद ईला येळतोगोद आ दिशी ताका आंदुर अल टु ईला नळुतोगोर.
38 इस्त्राएल इन लॉकुर इन पुरा यात्रा दा हागुल इक रा यहोवा अन बादल निवास मा, अदिक ईळ्लकी अदा बादल दा बेक्की आ सप्पा मुंदुरी कांळ्सकु बिळतोगोद.