लैव्यव्यवस्था अन किताब आ कानुनगोळ देल माळकु आद यारी परमेश्वर मूसा अन माध्यम देल इस्राएलिगोळ इक कोटीदुन. ईद कानुन बलिदानगोळ इक येरसोर अदिक भेटवाळा तम्बू दा बलिदान भेंट अदिक आराम माळदुर नियम देल संबंधित आद. “लैव्यव्यवस्था” शब्द अन्द मतलब आद लेवीगोळ देल संबंधित, जो इस्राएल इन गोत्र ईरोद यारी परमेश्वर याजक (पुरनिगोळ) माळोर अदिक मंदिर इन देख-रेख माळोर साटी नीवळुसिदुन. परंपरागत रूप देल विद्वानगोळ्द मानना आद कि लैव्यव्यवस्था अन किताब अदिक सांगुळ अच पैंतेटीक इन दुसरा किताबगोळ (उत्पत्ति, निर्गमन, गिनती अदिक व्यवस्थाविवरण) भविष्यवक्ता मूसा द्वारा लिखस्कु आगीत. हिंग प्रतीत आगतद कि खुद ग्रंथ भी ईत्त संकेत माळतद, यतिकी 1:1 दा लिखस्कु आद कि परमेश्वर ईद मातगोळ मूसा से अंदीदुन. थ्वाळासा विद्वानगोळ्द ईद भी मानना आद कि प्राचीन दस्तावेजगोळ देल संकलित आगकु 5 वा या 6 वा शताब्दी ईसा पूर्व दा बेबीलोन दा तयार माळकु आगीत.

लैव्यव्यवस्था अक दा नाव वाचुसतेव कि परमेश्वर याजकगोळ इक अलग प्रकार इन बलिदान येर्सोद आदेश कोट्टुन. इऊर दा येनारा बलिदान लॉकुर्द पापगोळ साटी येर्सकु आगव. अलग बलिदान खुद इन इच्छा देल, यावारा गंळ्स उक परमेश्वर उन प्रति प्यार इन कारण येर्सकु आगोद. हर स्थिती दा ईद आवश्यक ईरोद कि बलिदान शुद्ध अदिक दोषरहित ईरूल, यानी मंळसा अन दी टु सर्वोत्तम ईरूल, ईद स्पष्ट देल परमेश्वर उन पवित्रता अक दर्शुसोद. किताब इन आखरी भाग दा ईद समझुस्कु आग्याद कि इस्राएली अदिक याजक ह्यांग शुद्ध ईर सकतार ईद बाक ह्यांग अशुद्धता देल शुद्ध आग सकतद. ई किताब इन मुख्य विषय ईद आद कि परमेश्वर पवित्र आन, अदिक ई किताब दा कोटकु नियमगोळ्द पालन माळकु इस्राएली परमेश्वर उन उपस्थिती दा ईर सकोर.