19
कर ताकोमावाळा जक्कई
1 यीशु यरीहो दा प्रवेश माळकु होगोन.
2 अल जक्कई हेसुर ईनव ऊंद मंळसा ईरोन जो कर ताकोमावाळेर प्रधान ईरोन अदिक धनी ईरोन.
3 आव यीशु अक नोळोद चाहासोन कि आव याव हुन. लेकीन भीळ इन कारण नोळ ईला सकोन, यतिकी आव गुड्ड ईरोन.
4 आग आऊक नोळोर साटी आव मुंद ओळकु ऊंद उम्बर इन मार्र मा येरेदुन, यतिकी यीशु अदा हादी देल होगावाळा ईरोन.
5 याग यीशु आ जागा पोहचुसदुन, रा म्याकुच दृष्टी माळकु आऊन से अंदुन, “हे जक्कई, झट से ल्यालमा ईळुकु बर; यतिकी ईंद नानी नीन मान्या ईरोद जरूरी आद.”
6 आव तुरन्त ईळुकु खुशी देल आऊंद स्वागत माळदुन.
7 ईद नोळकु सप्पा लॉकुर कुळकुळुस्कु अनली कुरतुर, “आव रा ऊंद पापी मंळसा अन मान्या पाऊना बन्सकु ईळदान.”
8 जक्कई नीदुरकु प्रभु से अंदुन, “हे प्रभु, नोळ, ना तान आर्धा सम्पत्ति कंगालगोळी कोळतीन, अदिक अगर यारदारा येनारा भी अन्याय माळकु ताकोम कोंडीन रा अदरी नाकगुना वापस माळ बुळतीन.”
9 आग यीशु आऊन से अंदुन, “ईंद ई मान्या उद्धार बंदान, इदुरसाटी कि ईव भी अब्राहम उन ऊंद औलाद हुन.
10 यतिकी मंळसा अन पार जो काळ्दोग्यार आंदरी ढुंढ्सली अदिक आंदुर्द उद्धार माळली बंदान.”
हत्त व्हान्ना नव सिक्कागोळ्द उदाहरण
(मत्ती २५:१४-३०)
11 याग आंदुर ई मातगोळी केळोर, रा यीशु उन उदाहरण अंदुन, इदुरसाटी कि आव यरूशलेम इन हात्ती ईरोन, अदिक आंदुर सम्सतोगोर कि परमेश्वर उन राज्य प्रगट आगोद आद.
12 इदुरसाटी आव अंदुन, “ऊंद धोळ पद इन मंळसा दुर राज्य दा होदुन ताकी राजपद हासिल माळकु बर सकुल.
13 आव तान दासगोळ दा टु हत्त मुंदुर इक कारूकु आंदरी हत्त व्हान्ना अन्द सिक्का कोट्टुन अदिक आंदुर से अंदुन, ‘नांद वापस बरासताका ताका लेन देन माळेतीर.’
14 लेकीन आऊन खुद इन लॉकुर आऊन से दुश्मनी ईटतोगोर, अदिक आऊन हिंद स्वर्गदूतगोळ द्वारा खबर कळुदुर, ‘नाव चाहसालेव कि ईव नाम मा राज्य माळुल.’ ”
15 “याग आव राजपद हासिल माळकु बंदुन, रा हिंग आत कि आव तान दासगोळी यारी व्हान्ना अन्द सिक्का कोटीदुन, तान हात्ती कार्सदुन ताकी आऊक मालूम नळुल कि आंदुर लेन देन देल येन-येन कमुसदुर.
16 आग पयला दास बंदकु अंदुन, ‘हे स्वामी, नीन व्हान्ना अन्द सिक्का देल ना मात्त हत्त व्हान्ना नव सिक्का कमुसीन.’
17 आव आऊन से अंदुन, ‘शाब्बास, हे वळ्लेव अदिक विश्वासयोग्य दास! नी हापाळ अच गोर्त दा विश्वासलायक होट्ट ईग हत्त नगरगोळ मा अधिकार ईट.’
18 दुसरा दास बंदकु अंदुन, ‘हे स्वामी, नीन सिक्का देल अईद मात्त सिक्का कमुसीन.’
19 स्वामी आऊन से भी अंदुन, ‘नी भी अईद नगरगोळ मा अधिकार ईट.’ ”
20 तिसरा बंदकु अंदुन, “हे स्वामी, नोळ नीन सिक्का ईद हुन, यदरी ना कपळा अन्द तुकळा दा कटकु ईटिदीन.
21 यतिकी नी कठोर मंळसा आय, इदुरसाटी ना नीन से अंजतोगीन: जो नी ईटीदील अदरी नेगु कोमत्या, अदिक जो नी बोऊसीदिल, अदरी भी कळ्द बुळत्या.”
22 आव आऊन से अंदुन, “हे दुष्ट दास, ना नीन आवाज देल अच नीनी दोषी ठहरूसतीन. नी नानी अरूतोग्या कि कठोर मंळसा आईन, जो ना ईटीदील अदरी नेगु कोमतीन, अदिक जो ना बोऊसीदिल अदरी कळ्द बुळतीन;
23 रा नी नान सिक्का सावकार उन हात्ती येती ईट कोंडीदिल कि ना बंदकु ब्याज समेत ताकोम कोमयदीन?”
24 अदिक जो लॉकुर हात्ती नीदुरकु ईरोर, आव आंदुर से अंदुन, “अद सिक्का आऊन से ताकोमकोमी, अदिक यार्द हात्ती हत्त व्हान्ना नव सिक्का आव आऊक कोट्ट बुळी.”
25 आंदुर आऊन से अंदुर, “हे स्वामी, आऊन हात्ती रा पयले टु अच हत्त सिक्कागोळ आव.”
26 “ना नीम से अनतीन कि यार्द हात्ती आद, आऊक मात्त कोटकु आदीत; अदिक यार हात्ती हैलेच, आऊन से अद भी जो आऊन हात्ती आद ताकोमकु आदीत.
27 लेकीन नानोर आ दुश्मनगोळ जो ईला चाहासोर कि ना आंदुर मा राज्य माळाईन, आंदरी ईल तनकु नान मुंद घात माळी.”
यरूशलेम दा विजय प्रवेश
(मत्ती २१:१-११; मरकुस ११:१-११; यूहन्ना १२:१२-१९)
28 ईव मातगोळी अंदकु यीशु यरूशलेम इन दी आंदुर मुंद मुंद नळदुन.
29 याग आव जैतून हेसुर इन पहाळ मा बैतफगे अदिक बैतनिय्याह अन हात्ती पोहचुसदुन, रा आव तान चेलागोळ दा टु येढ्ढ मुंदरी ईद अनकु कळुदुन,
30 “मुंदळोद ऊर दा होगी; अदिक अल होग्त अच ऊंद गधा अन्द पाड्डा यदुर मा याऊ यागलु सवार आगीदील, कटकु नीमी सिक्कीत, अदरी खोल्सकु तरी.
31 अगर यावारा नीम से केळ्यान कि येती खोल्सतीर, रा ईद अंद बुळेतीर कि प्रभु अक इदुर्द प्रयोजन आद.”
32 जो कळुकु आगीदुर, आंदुर होगकु ह्यांग यीशु आंदुर से अंदिदुन, हांग अच नोळदुर.
33 याग आंदुर गधा अन्द पाड्डा अक खोलसोर, रा गधा अन्द मालिक आंदुर से केळदुन, “ई पाड्डा अक येती खोल्सतीर?”
34 आंदुर अंदुर, “प्रभु उक ईदुर्द जरवत आद.”
35 आंदुर अदरी यीशु उन हात्ती तंदुर, अदिक तान कपळा आ पाड्डा मा हाक्कु यीशु उक अदुर मा कुर्स बुटुर.
36 याग आव होगोन, रा आंदुर तान कपळा हादी मा हासतेला होगतोगोर.
37 हात्ती बरतेला याग आव जैतून पहाळ इन ढलान मा पोहचुसदुन, रा चेलागोळ्द सप्पा मंडली आ सप्पा सामर्थ्य अन्द क्याल्सागोळ्द कारण जो आंदुर नोळीदुर, खुश आगकु धोळ्द आवाज देल परमेश्वर उन स्तुति माळली हतदुर:
38 “परमेश्वर आ राजा अक आशीष कोळुल, जो प्रभु अन हेसुर देल बरतान! स्वर्ग दा शांती अदिक आकाश मंडल दा महिमा आगुल!”
39 आग भीळ दा टु येनारा फरीसी आऊन से अनली कुरतुर, “हे गुरु, तान चेलागोळी आग्या कोटकु दनकुस.”
40 आव उत्तर कोट्टुन, “ना नीम से अनतीन, अगर इंदुर सुंगा ईत्तुर रा कल्ल चिल्ळासली हत्तेव.”
यरूशलेम इन साटी विलाप
41 “याग आव हात्ती बंदुन रा नगर इक नोळकु अदुर मा वर्लदुन
42 अदिक अंदुन, अगर नी, ईंद इन दिशी शांती नव मातगोळ जान्स कोमाईद, रा याट वळ्लीद आगेगाईत, लेकीन ईग अव नीन कण्ण इन हात्ती टु गुप्त ईटकु आगेग्याव.
43 यतिकी अव दिन नीन मा बंदव कि नीन से दुश्मनी ईटावाळेर मोर्चा कटकु नीनी घेर्स कोंडार, अदिक नाकु दी टु नीनी वत्त बुट्टार;
44 अदिक नीनी अदिक नीन चिकोरगोळी जो नीन दा आर, मुण्ण दा मिलुस्यार, अदिक नीन दा ऊंद कल्ल मा दुसरा कल्ल भी बिळतीदील; यतिकी परमेश्वर नीमी ऊळ्सली बंदीदुन ई समय इक नीव अरतीदिल.”
मंदिर टु व्यापारीगोळ्द तेगुकु आगोद
(मत्ती २१:१२-१७; मरकुस ११:१५-१९; यूहन्ना २:१३-२२)
45 आग यीशु मंदिर दा होगकु व्यापारीगोळी व्हार्या तेगुली कुरतुन,
46 अदिक परमेश्वर अनतान, “शास्त्र दा लिख्सकु आद, ‘नान मान्ना प्रार्थना अन्द मान्ना आदीत,’ लेकीन नीव अदरी डाकूगोळ्द हड्डा माळ बुट्टीर.”
47 यीशु रोज मंदिर दा उपदेश माळतोगोन; अदिक प्रधान याजक अदिक नियम इन गुरु अदिक लॉकुर्द प्रमुख आऊक कोनोद चाहासोर.
48 लेकीन याऊ उपाय तेगु सकिदील कि ईव याता प्रकार माळेव, यतिकी सप्पा लॉकुर बळा चाह देल आऊंद केळतोगोर.