20
यीशु उन अधिकार मा प्रश्न
(मत्ती २१:२३-२७; मरकुस ११:२७-३३)
1 ऊंद दिशी हिंग आत कि याग यीशु मंदिर दा लॉकुरी उपदेश कोळोन अदिक खुशखबरी केळसोन, रा प्रधान याजक अदिक नियम इन गुरु, पुरनियागोळ्द सांगुळ हात्ती बंदकु निदुरदुर;
2 अदिक अनली हतदुर, “नामी हेळ, नी ई क्याल्सागोळी याता अधिकार देल माळत्या, अदिक आव याव हुन याव नीनी ईद अधिकार कोटान?”
3 यीशु आंदरी उत्तर कोट्टुन, “ना भी नीम से ऊंद सवाल केळतीन; नानी हेळी
4 यूहन्ना अक बपतिस्मा कोळोद अधिकार स्वर्ग दी टु ईरोद या मंळसागोळ दी टु ईरोद?”
5 “आग आंदुर आपस दा चर्चा माळली कुरतुर, नाव येन अंदेव, अगर स्वर्ग इन दी टु,” रा आव अंदान, “बाक नीव आऊंद विश्वास येती माळीदिल?”
6 अदिक अगर नाव अंदेव, मंळसागोळ दी टु, रा सप्पा लॉकुर नाम मा कलगोळ भिटार, यतिकी आंदुर खराखुरा अरूतार कि यूहन्ना भविष्यवक्ता ईरोन.
7 इदुरसाटी आंदुर उत्तर कोट्टुर, “नाव अरालेव कि आव यार दी टु ईरोन.”
8 यीशु आंदुर से अंदुन, “रा ना भी नीमी हेळालीन कि ना ईद क्याल्सा याता अधिकार देल माळतीन.”
दुष्ट किसानगोळ्द उदाहरण
(मत्ती २१:३३-४६; मरकुस १२:१-१२)
9 आग यीशु लॉकुर से ईद उदाहरण अनली कुरतुन: “यावारा मंळसा अंगुर इन केई हचदुन, अदिक किसानगोळी अदरी बटई दा कोट बुट्टुन अदिक हापाळ दिनगोळ्द साटी परदेश होटोदुन.
10 याग अंगुर इन जमा माळोद समय बत्त रा मालक किसानगोळ हात्ती ऊंद दास उक कळुदुन कि आंदुर अंगुर इन केई अन येनारा कायगोळ भाग आऊक कोळुल, पर किसानगोळ आऊक बळकु खाली कय कळु बुटुर.
11 बाक आव ऊंद अदिक दास उक कळुदुन, अदिक आंदुर आऊक भी बळकु अदिक आऊन अपमान माळकु खाली कय कळु बुटुर.
12 बाक आव तिसरा दास उक कळुदुन, अदिक आंदुर आऊक भी घायल माळकु व्हार्या तेगु बुटुर.
13 आग अंगुर इन केई नव स्वामी अंदुन, ‘ना येन माळाईन? ना तान प्रिय पार उक कळाईन, जरूर अच आंदुर आऊन आदर माळ्यार.’
14 याग किसानगोळ आऊक नोळदुर रा आपस दा विचार माळली कुरतुर, ‘ईव रा वारीस हुन; बरी, नाव ईऊक कोंद बुळाती रा बाक आऊन जायदाद नाम्द आगेदीत.’
15 अदिक आंदुर आऊक अंगुर इन केई टु व्हार्या तेगुकु कोंद बुटुर.”
“इदुरसाटी अंगुर इन केई इन स्वामी आंदुर्द सांगुळ येन माळ्यान?
16 आव बंदकु आ किसानगोळी नाश माळ्यान, अदिक अंगुर इन केई दुसरा अक सोपस्यान.”
ईद केळकु आंदुर अंदुर “परमेश्वर माळुल हिंग आगबाळुल.”
17 यीशु आंदुर दी नोळकु अंदुन, बाक ईद येन लिख्सकु आद:
“याता कल्ल इक राजमहल माळावाळेर बेकार ठहरुसीदुर,
अदा क्वाना अन्द सिरा आगेत.”
18 “जो यातोदारा कल्ल मा बिद्दान आव चकनाचुर आगेदान; अदिक यदुर मा अद बिद्दीत, अदरी पीसुस बुट्टीत.”
कर कोळोद प्रश्न
(मत्ती २२:१५-२२; मरकुस १२:१३-१७)
19 आटा होती नियम इन गुरुगोळ अदिक प्रधान याजकगोळ आऊक हुडोद चाहासदुर, यतिकी आंदुर समसेगिदुर कि आव नाम मा ईद उदाहरण अंदान, लेकीन आंदुर लॉकुर से अंजदुर.
20 अदिक आंदुर आऊन ताक दा हतदुर अदिक भेद ताकोमावाळेरी कळुदुर कि न्याय इन भेष हुळकु यीशु उक आंदुर सवाल दा हुडुल, ताकी बाक आऊक रोमन शासक उन कय दा सौप्स बुळुल.
21 आ जासुसगोळ यीशु से केळदुर, “हे गुरु, नाव जान्सतेव कि नी बराबर अनत्या अदिक कल्सत्या, अदिक यारदु पक्षपात माळाल, उलटा परमेश्वर उन हादी सच्चाई देल हेळत्या.
22 येन नामी कैसर सरकार उक कर कोळोद उचित आद या ईला?”
23 आव आंदुर्द चतुराई इक अरूकु आंदुर से अंदुन,
24 “ऊंद चाँदी इन सिक्का नानी तोरसी. ईदुर मा यार्द छाप अदिक हेसुर आद?”
आंदुर अंदुर “कैसर सरकार उन.”
25 यीशु आंदुर से अंदुन, “रा जो कैसर सरकार उन हुन, अद सरकार उक कोळी; अदिक जो परमेश्वर उन आद, अद परमेश्वर उक कोळी.”
26 आंदुर लॉकुर्द मुंद ईद मात दा यीशु उक फसुस सकिदील, उलटा आऊन उत्तर देल अचम्भित आगकु सुंगा आगेदुर.
पुनरूत्थान अदिक मदा
(मत्ती २२:२३-३३; मरकुस १२:१८-२७)
27 बाक सदूकीगोळ जो अनतार कि सोत्तुर दा टु जित्ता आगोद अच हैलेच, आंदुर्दा टु थ्वाळासा लॉकुर आऊन हात्ती बंदकु केळदुर,
28 “हे गुरु, मूसा नाम साठी हिंग नियम लिखस्यान: अगर यारोवारा धोळ वार्ट तान हिंग्स उन ईतकु भी बिना औलाद सोतोदान, रा आऊन वार्ट आ रांड्यागित इन से मदा माळ कोमुल, अदिक तान वार्ट उन साठी वंश पैदा माळुल.
29 येळ वार्टुर ईरोर, पयला वार्ट मदा माळकु बिना औलाद सोतोदुन.
30 बाक दुसरा वार्ट भी आकिन से मदा माळदुन,
31 अदिक तिसरा वार्ट भी अदा आर्त से मदा माळ कोंडुन. ईदा रीति देल येळु वार्टुर बिना औलाद देल सोतोदुर.
32 आखरी दा आ आर्त भी सोतोदुर.
33 इदुरसाटी जित्ता आगदुर मा आक आंदुर्दा टु यारोर हिंग्स आदार? यतिकी आ येळु वार्टुर आकिन से मदा माळीदुर.”
34 यीशु आंदुर से अंदुन, “ई युग इन लॉकुर दा रा मदगोळ आगताव,
35 लेकीन जो लॉकुर ई लायक ठहरूस्यार कि आ युग इक अदिक सोत्तुर दा टु जित्ता आगोद प्राप्त माळुल, आंदुर ना मदा माळ्यार अदिक ना मदा दा कोटकु आदार.
36 बाक आंदुर ना रा यागलु सोत्तार, यतिकी आंदुर पुनरूत्थान इन औलाद बन्सकु स्वर्गदूतगोळ्द घाई अदिक सोत्तुर दा टु जित्ता आगदुर कारण देल परमेश्वर उन औलाद ईत्तार.
37 लेकीन ई मात इक कि सोत्तुर जित्ता आगतार, मूसा भी होत्त झाळी इन उदाहरण दा प्रगट माळ्यान कि आव प्रभु अक ‘अब्राहम उन परमेश्वर, अदिक इसहाक उन परमेश्वर अदिक याकूब उन परमेश्वर’ अनतान.
38 परमेश्वर रा मुर्दागोळ ईला लेकीन जित्तागोळ्द परमेश्वर हुन: यतिकी आऊन हात्ती सप्पा जित्ता आर.”
39 आग ईद केळकु शास्त्रीगोळ दा टु येनारा ईद अंदुर, “हे गुरु, नी बराबर उत्तर कोट्ट.”
40 अदिक आ सदूकीगोळी बाक आऊन से येनारा अदिक केळोद हिम्मत आगीदील.
मसीह यार पार हुन?
(मत्ती २२:४१-४६; मरकुस १२:३५-३७)
41 बाक यीशु आंदुर से केळदुन, “मसीह अक दाऊद उन औलाद ह्यांग अनतार?”
42 दाऊद तान भजन संहिता अन किताब दा अनतान:
“प्रभु नान प्रभु से अंदुन,
43 नान ऊम्मा कय दी कुर,
यागासताका कि ना नीन से दुश्मनी ईटावाळेर इक नीन काल दिशी माळ कोमालीन.”
44 “दाऊद रा आऊक प्रभु अनतान; रा बाक आव आऊन औलाद ह्यांग ठहरूसदुन?”
शास्त्रीगोळ से सावधान
(मत्ती २३:१-३६; मरकुस १२:३८-४०)
45 याग सप्पा लॉकुर केळोर, रा यीशु तान चेलागोळ से अंदुन,
46 “शास्त्रीगोळ से सावधान ईरी, यारी ऊद्द-ऊद्द च्वांगा हाक्कु वयाळोद वळ्लीद हततद, अदिक यारी सात्तागोळ दा नमस्कार अदिक आदर, अदिक यहूदी लॉकुर्द सभागृहगोळ दा मुख्य आसन अदिक भोज दा मुख्य जागा प्रिय हतताव.
47 आंदुर रांड्यागोळ्द मान्नागोळ इक तिंद बुळतार अदिक आंदुर फायदा नेगुतार, अदिक लॉकुरी दिखावा साटी हापाळ होत्त ताका प्रार्थना माळतेला ईरतार: इंदरी यक्कुल से यक्कुल दण्ड सिक्कीत.”