9
यीशु उन द्वारा हन्नेळ प्रेरितगोळी कळुकु आगोद
(मत्ती १०:५-१५; मरकुस ६:७-१३)
1 बाक यीशु तान हन्नेळ चेलागोळी तान हात्ती कारदुन आंदरी सप्पा दुष्टआत्मागोळ अदिक बिमारगोळी दुर माळोद सामर्थ्य अदिक अधिकार कोट्टुन,
2 अदिक आंदरी परमेश्वर उन स्वर्गीय राज्य अन्द प्रचार माळली अदिक बिमारगोळी वळ्लीद माळोद साटी कळुदुन.
3 यीशु आंदुर से अंदुन, “तान यात्रा अन्द साटी येनु वोयबाळेतीर, ना रा कोल, ना झ्वारा, ना रोट्टी, ना पैस्या अदिक ना येढ्ढ-येढ्ढ कुळता.
4 जो यातोदु मान्या नीव ईळदीर, अल्या ईरी, अदिक अल टु उच विदा आगी.
5 जो यावारा नीमी ग्रहण माळालुर, आ नगर टु होळावती तान कालगोळ्द धुळा झाळ्स बुळी कि आंदुर मा गवाही आगुल.”
6 इदुरसाटी आंदुर होटकु ऊरा-ऊरा खुशखबरी केळसोर, अदिक हर जागा दा लॉकुरी चंगा माळ्त टेटतेला ईत्तुर.
राजा हेरोदेस उन परेशानी
(मत्ती १४:१-१२; मरकुस ६:७-२९)
7 द्याश इन चौथाई इन राजा हेरोदेस याग ई सप्पा घटनागोळ बारा दा केळदुन रा आव हापाळ घबरूसेदुन, यतिकी थ्वाळासा लॉकुर अंदुर कि यूहन्ना बपतिस्मा कोळावाळा सोत्तुर दा टु जित्ता आग्यान,
8 अदिक थ्वाळासा लॉकुर ईद अंदुर कि एलिय्याह कांळस्यान, अदिक थ्वाळासा दुसरा लॉकुर ईद अंदुर कि हाळोद भविष्यवक्तागोळ दा टु यावारा जित्ता आग्यान.
9 लेकीन हेरोदेस अंदुन, “यूहन्ना अन्द रा ताल्ला ना कळसुसीदीन, ईग ई मंळसा याव हुन यार्द बारा दा ना हिंग मातगोळ केळेतीन?” अदिक आव यीशु उक नोळोद प्रयत्न माळतेला ईत्तुन.
यीशु अईद हजार लॉकुरी तिन्सदुन
(मत्ती १४:१३-२१; मरकुस ६:३०-४४; यूहन्ना ६:१-१४)
10 बाक प्रेरितगोळ वापस बंदकु जो येनारा आंदुर माळीदुर, यीशु उक हेळ बुटुर; अदिक यीशु आंदरी अलग माळकु बैतसैदा हेसुर इन नगर दा ओतुन.
11 ईद जान्सकु भीळ आऊन हिंद आगेत, अदिक आव खुशी देल आंदुर से मिलुसदुन, अदिक आंदुर से परमेश्वर उन राज्य अन्द मातगोळ हेळली कुरतुन, अदिक जो चंगा आगोद चाहासोर आंदरी चंगा माळदुन.
12 याग द्याव आगली हत्त रा हन्नेळ चेलागोळ बंदकु यीशु से अंदुर, “भीळ इक विदा माळ कि नाकु दिकळोद ऊरगोळ अदिक ऊरगोळ दा होगकु तान साटी ईरली जागा अदिक तिनली येनारा तरी ढुंढ्स सकुल, यतिकी नाव ईल सुनसान जागा दा आयेव.”
13 यीशु आंदुर से अंदुन, “नीव अच आंदरी तिनली इक कोळी.”
चेलागोळ अंदुर, “नाम हात्ती अईद रोट्टी अदिक येढ्ढ मेनगोळी बिटकु अदिक येनु हैलेच; लेकीन हव, अगर नी चाहासत्या कि नाव होगकु ई सप्पा लॉकुर साटी भोजन कोंडेव, रा आग सकतद.” यतिकी आ लॉकुर्द संख्या रा अईद हजार इन हात्तीपास ईरोद.
14 आग यीशु तान चेलागोळ से अंदुन,
“लॉकुरी पचास-पचास माळकु पंगत-पंगत दा कुर्स बुळी.”
15 आंदुर हिंग अच माळदुर, अदिक सप्पा मुंदरी कुर्स बुटुर.
16 आग आव अव अईद रोट्टीगोळी अदिक येढ्ढ मेनगोळी हुळदुन, अदिक स्वर्ग दी नोळकु परमेश्वर उक धन्यवाद माळदुन, अदिक रोट्टी मुरू-मुरूकु चेलागोळी कोळ्त होदुन कि लॉकुरी वाळसुल.
17 आग सप्पा लॉकुर तिनकु संतुष्ट आदुर, अदिक चेलागोळ ऊळ्द टुकळागोळ दा टु हन्नेळ फुट्टी तुमकु नेगदुर.
पतरस उन यीशु उक “मसीह” स्वीकार माळोद
(मत्ती १६:१३-२०; मरकुस ८:२७-३०)
18 याग यीशु आबना दा प्रार्थना माळोन अदिक चेलागोळ आऊन सांगुळ ईरोर, रा आव आंदुर से केळदुन, “लॉकुर नान बारा दा येन अनतार?”
19 चेलागोळ उत्तर कोट्टुर, “यूहन्ना बपतिस्मा कोळावाळा, अदिक यावारा यावारा एलिय्याह, अदिक यावारा ईद कि हाळव भविष्यवक्तागोळ्द दा टु यावारा जित्ता आग्यान.”
20 यीशु आंदुर से केळदुन, “लेकीन नीव नानी येन अनतीर?”
पतरस उत्तर कोट्टुन, “परमेश्वर उन द्वारा कळुद मसीह.”
तान सायोद बारा दा यीशु उन भविष्यवाणी
(मत्ती १६:२१-२३; मरकुस ८:३१-३३)
21 आग यीशु आंदरी आदेश कोटकु अंदुन कि ईद मात इन उल्लेख यारदु से माळबाळेतीर.
22 बाक यीशु अंदुन, “ना मंळसा अन पार उन साटी जरूरी आद कि ना दुख नेगाईन, अदिक स्याणा अदिक प्रधान याजक अदिक नियम इन गुरु नानी तुच्छ जान्सकु कोंद बुट्टार, अदिक ना मुर दिन दा जित्ता आगाईन.”
23 यीशु सप्पा मुंदुर से अंदुन, “अगर यावारा नान हिंद बरोद चाहासतान, रा आव तान तान इक इनकार माळुल अदिक रोज जो तान जीव नान साटी क्रूस मा समर्पित माळुल आवा नान हिंद आगेगुल.
24 यतिकी जो यावारा तान जीव ऊळसोद चाहास्यान आव अदरी खोऊस्यान, लेकीन जो यावारा नान साटी तान जीव खोऊस्यान आव अदरी ऊळस्यान.
25 अगर मंळसा पुरा दुनिया अक हासिल माळुल अदिक तान जीव खोऊस बुळुल या अदुर्द हानि नेगुल, रा आऊक येन लाभ आदीत?
26 जो नान देल अदिक नान वचन देल लज्जित आगतान, आऊन देल ना मंळसा अन पार भी, आ समय लज्जित आदान याग आव खुद अदिक तान आप्प उन अदिक पवित्र स्वर्गदूतगोळ्द महिमा दा बंदान.
27 ना नीम से खरा माताळतीन, कि जो ईल निदुरकु आर, आंदुर दा टु यारारा हिंग आर कि यागासताका परमेश्वर उन राज्य नोळतीदिल, आगासताका सायतीदील.”
यीशु उन रूपान्तर
(मत्ती १७:१-८; मरकुस ९:२-८)
28 ई मातगोळ्द लगभग येठ्ठ दिन इन बाद्दा यीशु पतरस, यूहन्ना अदिक याकूब उक सांगुळ हुळकु प्रार्थना माळोर साटी पहाळी मा होदुन.
29 याग आव प्रार्थना माळतेला अच ईरोन, रा आऊन चेहरा अन्द रूप बदलुसेत, अदिक आऊन कपळा बिळेव आगकु चमकुसली हत्त.
30 अदिक अचानक, मूसा अदिक एलिय्याह, ई येढ्ढ मंळसा आऊन सांगुळ मातगोळ हेळोर.
31 आंदुर स्वर्गीय महिमा सहित कांळ्सदुर अदिक यीशु उन सायोद चर्चा माळोर, जो परमेश्वर उन उद्देश यरूशलेम दा पुरा आगोद ईरोद.
32 पतरस अदिक आऊन साथीगोळ कण्णगोळ जप देल तुमकु ईरव, लेकीन याग आंदुर पुर्ण रूप देल च्याता आदुर, रा आंदुर आऊन महिमा अक अदिक आ येढ्ढ मंळसागोळी, जो यीशु उन सांगुळ निदुरकु ईरोर, नोळदुर.
33 याग आंदुर आऊन हात्ती टु होगली हतदुर, रा पतरस यीशु से अंदुन, “हे स्वामी, नाम्द ईल ईरोद वळ्लीद आद: इदुरसाटी नाव मुर हांद्रा माळेव, ऊंद नीन साटी, ऊंद मूसा अन्द साटी, अदिक ऊंद एलिय्याह अन्द साटी.” आव ईला जानसोन कि आव येन माळेत्यान.
34 आव ईद माताळतेला अच ईरोन कि ऊंद बादल बंदकु आंदरी होचकोम्त, अदिक याग चेलागोळ आ बादल देल घेरूसली हतदुर रा अंजेदुर.
35 आग आ बादल दा टु आवाज होळ्त, “ईव नानव पार अदिक नान चुनुसदव हुन, ईऊंद केळी.”
36 ईव आवाज आगतेला अच यीशु आबना अच कांळ्सदुन; अदिक आंदुर सुंगा ईत्तुर, अदिक जो येनारा नोळीदुर अदुर्द बारा दा आंदुर आ दिनगोळ दा यारदारा से येनु माळीदिल.
दुष्टआत्माग्रस्त पार उक चंगा माळोद
(मत्ती १७:१४-१८; मरकुस ९:१४-२७)
37 दुसरा दिन याग यीशु अदिक आऊन मुर चेलागोळ पहाळ मा टु ईळदुर रा ऊंद धोळ्द भीळ बंदकु यीशु से मिळुस्त.
38 अदिक नोळी, भीळ दा टु ऊंद मंळसा चिळ्लासकु अंदुन, “हे गुरु, ना नीन से विनती माळतीन कि नान पार उन म्याकुच कृपादृष्टि माळ; यतिकी आव नानव ऊंद ठैसा पार आन.
39 अदिक नोळ, ऊंद दुष्टआत्मा आऊक हुडूतद, अदिक आव अचानक चिळ्लासकु येळतान; अदिक अद आऊक हिंग मुरकुळस्तद कि आव बाय दा फेस तुमकु तरतान; अदिक आऊक कठिनाई देल बिळतद.
40 ना नीन चेलागोळ से विनती माळदीन कि आ दुष्टआत्मा अक तेगुल लेकीन आंदुर तेगु सकिदील.”
41 यीशु आंदरी उत्तर कोट्टुन, “हे अविश्वासी अदिक जिद्दी लॉकुरा, ना यागासताका नीम सांगुळ ईराइन अदिक नीम सहन माळाईन? तान पार उक ईल तर.”
42 आव पार बरतेला अच ईरोन कि दुष्टआत्मा आऊक पटकुसकु मुरकुळस्त, लेकीन यीशु अशुध्द आत्मा अक दनकुसदुन अदिक पार उक वळ्लीद माळकु आऊन आप्प उक सौप्सदुन.
43 आग सब लॉकुर परमेश्वर उन महासामर्थ्य देल चकित आदुर.
तान सायोद बारा दा यीशु उन दुसरा घन भविष्यवाणी
(मत्ती १७:२२,२३; मरकुस ९:३०-३२)
लेकीन याग सब लॉकुर आ सब क्याल्सागोळ देल जो यीशु माळतोगोन, अचम्भित ईरोर, रा आव तान चेलागोळ से अंदुन,
44 “नीव ई मातगोळ मा ध्यान कोळी, यतिकी ना मंळसा अन पार मंळसागोळ्द कय दा सौप्सकु आगाईन.”
45 लेकीन आंदुर ई मात इक ईला समसोर, अदिक ईद आंदुर से होचकु ईत कि आंदुर आऊक जान्स ईला सकुल; अदिक आंदुर ई मात इन बारा दा यीशु उक केळली अंजतोगोर.
सब से धोड्डेव याव?
(मत्ती १८:१-५; मरकुस ९:३३-३७)
46 बाक आंदुर्दा ईद विवाद आगली कुर्त कि नाम दा टु धोळ याव आन.
47 लेकीन यीशु आंदुर्द मन इन विचार जान्स कोंडुन, अदिक ऊंद पार उक हुळकु तान हात्ती नीदरूसदुन,
48 अदिक आंदुर से अंदुन, “जो यावारा नान हेसुर देल ई पार उक ग्रहण माळतान, आव नानी ग्रहण माळतान; अदिक जो यावारा नानी ग्रहण माळतान, आव नान कळावाळेर इक ग्रहण माळतान, यतिकी जो नीम दा सब से स्याणेव टु स्याणेव आन, आवा धोड्डेव आन.”
जो विरोध दा ईला, आव पक्ष दा आन
(मरकुस ९:३८-४०)
49 आग यूहन्ना अंदुन, “हे स्वामी, नाव ऊंद मंळसा अक अपमान हेसुर देल दुष्टआत्मागोळी तेगुतेला नोळदेव, अदिक नाव आऊक मना माळदेव, यतिकी आव नाम सांगुळ आगकु अपमान हिंद आगालुन.”
50 यीशु यूहन्ना अदिक बाकी चेलागोळ से अंदुन, “आऊक मना माळबाळी; यतिकी जो नीम विरोध दा हैलेच, आव नीम्द सांगुळ आन.”
सामरीयागोळ द्वारा यीशु उन विरोध
51 याग यीशु उन स्वर्ग दा नेगुकु आगोद दिन हात्ती बरली हतदव रा आव यरूशलेम होगोद मजबूत निश्चय माळदुन.
52 आव तान मुंद स्वर्गदूत कळुदुन. आंदुर सामरीगोळ्द ऊंद ऊर दा होदुर कि आऊन साटी जागा तयार माळुल.
53 लेकीन आ लॉकुर आऊक ईळु गोटीदील, यतिकी आव यरूशलेम होगोन.
54 ईद नोळकु यीशु उन चेलागोळ याकूब अदिक यूहन्ना अंदुर, “हे प्रभु, येन नी चाहासत्या कि नाव आग्या कोट्टेव, कि आकाश टु बेक्की बिळसुस्कु आंदरी भसम माळसुस बुळुल?”
55 लेकीन यीशु तिर्गकु आंदरी दनकुसदुन.
56 यीशु अदिक आऊन चेलागोळ दुसरा ऊर दा होटोदुर.
यीशु उक मान्सावाळेर ह्यांग ईर पायजे
(मत्ती ८:१९-२२)
57 याग आंदुर हादी देल होगोर, रा चेलागोळ दा टु यावारा यीशु से अंदुन, “यल-यल नी होद्या, ना नीन हिंद आगेगाईन.”
58 यीशु आऊन से अंदुन, “कोल्यागोळ गुफा अदिक आकाश इन पक्षीगोळ ग्वादा ईरताव, लेकीन ना मंळसा अन पार उन साटी ताल्ला होचकोमोर साटी भी जागा हैलेच.”
59 यीशु दुसरा से अंदुन, “नान हिंद आगेग.”
आव अंदुन, “हे प्रभु, नानी पयले होगगोळ कि तान आप्प उक नळसाईन.”
60 यीशु आऊन से अंदुन, “सोद्द मंळसागोळी तान मुर्दा नळ्सगोळ, लेकीन नी होगकु परमेश्वर उन राज्य अन्द पुरा प्रचार माळ.”
61 ऊंद मात्त मंळसा भी अंदुन, “हे प्रभु, ना नीन हिंद आगेगाईन; लेकीन पयले नानी होगगोळ कि तान मान्ना अन्द लॉकुर से विदा ताकोमकु बराईन.”
62 यीशु आऊन से अंदुन, “जो यावारा तान कय नांगर मा ईटकु हिंद नोळतान, आव परमेश्वर उन राज्य अन्द लायक हैलेच.”