21
याजकगोळ्द पवित्रता
1 बाक यहोवा मूसा से अंदुन, “हारून उन पार जो याजक आन आंदुर से अन कि नीम्द लॉकुर दा टु यावारा भी शाईल, रा आऊन कारण नीम दा टु यावारा खुद इक अशुद्ध माळबाळुल;
2 तान हात्तीनोर कुटुम्बिगोळ इक, मतलब तान मोय, या आप्प, या पार, या पोर, या वार्ट उन साटी,
3 या तान कुवारा आकतींग आकीन मदा आगीदिल, यार्द हात्ती इन संबंध आद; आंदुर साटी आव तान इक अशुद्ध माळ सकतान.
4 पर याजक आगोर नाता देल आव तान लॉकुर दा प्रधान आन, इदुरसाटी आव खुद इक हिंग अशुद्ध माळबाळुल कि अपवित्र आगेगुल.”
5 याजक तान ताल्ला अन्द चुट्टी मुंडन माळबाळुल, अदिक तान गाल्ला अन्द चुट्टी इक भी बोळ्स बाळुल, अदिक तान मय मा घाव माळबाळुल.
6 आंदुर तान परमेश्वर उन साटी पवित्र बन्सकु ईरूल, अदिक तान परमेश्वर उन हेसुर अपवित्र माळबाळुल; यतिकी आंदुर यहोवा अन्द होमबली अक जो आंदुर परमेश्वर उन भोजन हुंद येर्सतार; ई कारण आंदुर पवित्र बन्सकु ईरूल.
7 याजक पवित्र रीती देल परमेश्वर उन स्यावा माळतान अनकु आव भ्रष्ट आगकु आर्त इक, वेश्या अक, या गांड्ड उक बिटकु आर्त इक तान हिंग्स माळबाळुल.
8 इदुरसाटी नी याजक उक पवित्र जान्सेत, यतिकी आव नीम्द परमेश्वर उक भोजन येर्सतान; इदुरसाटी आव नींद नजर दा पवित्र ठहरूसुल; यतिकी ना यहोवा, जो नीमी पवित्र माळतीन, पवित्र आईन.
9 अदिक अगर याजक उन पोर वेश्या बन्सकु तान तान इक अपवित्र माळुल, रा आक तान आप्प उक अपवित्र ठहरूस्तार; आकी बेक्की दा होताक्कु आगुल.
10 “जो तान वार्टुर दा महायाजक ईरूल, आऊन ताल्ला मा अभिषेक उन याण्णा हाक्कु आगुल, अदिक आऊन पवित्र कपळागोळ इक हाक्कोर साटी संस्कार आग्याद, आव तान ताल्ला अन्द चुट्टी बगरूसगोळ बाळुल, अदिक तान कपळागोळ इक हरू बाळुल;
11 अदिक न आव यातोदारा लोथ इन हात्ती होगुल, अदिक न तान आप्प या मोय इन कारण खुद इक अशुद्ध माळुल;
12 अदिक आव पवित्र जागा टु व्हार्या भी होळबाळुल, अदिक न तान परमेश्वर उन पवित्र जागा अक अपवित्र ठहरूसुल; यतिकी आव तान परमेश्वर उन अभिषेक उन याण्णारूपी मुकुट धारण माळकु आन; ना यहोवा हुईन.
13 अदिक आव कुवारा आर्त इन सांगुळ मदा माळुल.
14 जो रांड्यागीत, या छोळचिट्टी कोटकु आग्यार आक, या भ्रष्ट, या वेश्या ईरूल, हिंग आर्त से आव मदा माळबाळुल, आव तान अच लॉकुर न्याड्या दा टु यातोदारा कुवारा पोर से मदा माळुल.
15 अदिक आव तान औलाद इक तान लॉकुर दा अपवित्र माळबाळुल; यतिकी ना आकीक पवित्र माळावाळा यहोवा हुईन.”
शारीरिक दोष अदिक याजक
16 बाक यहोवा मूसा से अंदुन,
17 “हारून से अन कि नींद वंश इन पीढ़ी-पीढ़ी दा जो यावारा येनारा भी शारीरिक दोष ईरूल आव तान परमेश्वर उन भोजन येरसोर साटी हात्ती बर बाळुल.
18 यावारा यती ईरबाळुल, यारदा दोष ईरूल, आव हात्ती बरबाळुल, चाहे आव कुढ्ढ ईरूल, चाहे लंगळा, चाहे मुग्ग कुरकु ईरूल, चाहे आऊन येनारा यक्कुल अंग ईरूल,
19 या आऊन काल, या कय लूला ईरूल,
20 या आव कुबळा, या बुटरा ईरूल, या आऊन कण्णगोळ दा दोष ईरूल, या आ मंळसा अक बिळीद दाग या खुजली ईरूल, या आव नपुंसक ईरूल;
21 हारून याजक उन वंश दा टु यारदारा दा यातोदारा भी शारीरिक दोष ईरूल, आव यहोवा अन्द होमबली येरसोर साटी हात्ती बरबाळुल; आव जो दोषयुक्त आन यागलु भी तान परमेश्वर उक भोजन येरसोर साटी हात्ती बरबाळुल.
22 आव तान परमेश्वर उन पवित्र अदिक अपवित्र येढ्ढु प्रकार इन भोजन इक तिनुल,
23 लेकीन आऊन दोष इन कारण आव न रा न्याड्यावाळा परदा अन्द बुळ्क बरूल अदिक न वेदी इन हात्ती, इदुर देल हिंग न आगुल कि आव नान पवित्र जागागोळ इक अपवित्र माळुल; यतिकी ना आंदरी पवित्र माळावाळा यहोवा हुईन.”
24 इदुरसाटी मूसा हारून अदिक आऊन पारगोळ इक तथा सप्पा इस्राएलीगोळ इक ईव मातगोळ अनतेला केळ्सदुन.