22
भेंट चळावा अन पवित्रता
1 बाक यहोवा मूसा से अंदुन,
2 “हारून अदिक आऊन पारगोळ से अन कि इस्राएलिगोळ्द पवित्र माळ्द वस्तुगोळ से यदरी आंदुर नान साटी पवित्र माळतार अलग ईरूल, अदिक नान पवित्र हेसुर इक अपवित्र माळबाळुल; ना यहोवा हुईन.”
3 अदिक आंदुर से अन कि नीम्द पीढ़ी-पीढ़ी दा नीम्द पुरा वंश दा टु जो यावारा तान अशुध्दता अन्द दशा दा आ पवित्र माळ्द वस्तुगोळ्द हात्ती होगुल, यारी इस्राएली यहोवा अन्द साटी पवित्र माळतार, आ मंळसा नान मुंद टु नाश माळकु आदान; ना यहोवा हुईन.
4 हारून उन वंश दा टु यावारा यती ईरबाळुल, जो कोढ़ी ईरूल, या आऊन रकत होगतेला ईरूल, आ मंळसा यागासताका शुद्ध आगालुन, आगासताका पवित्र माळ्द वस्तुगोळ दा टु येनारा भी तिनबाळुल. अदिक जो लोथ इन कारण अशुद्ध आग्यान, या आऊन वीर्य स्खलित आग्याद, हिंग मंळसा अक जो यावारा मुटुल,
5 अदिक जो यावारा यातोदारा हिंग रेंगसावाळा जन्तु उक मुटुल अदुर देल लॉकुर अशुद्ध आग सकतार, इंदुर दा टु यारीकारा मुटुल आऊन दा यातोदारा प्रकार इन अशुद्धता ईरूल जो आऊक भी हत्त सकतद.
6 रा आ याजक जो इंदुर दा टु यारीकारा मुटुल द्यावगाताका अशुद्ध ठहरूसकु ईरूल, अदिक यागासताका नीर देल मय तोळुकोमालुन, आगासताका पवित्र वस्तुगोळ दा टु येनारा भी तिनबाळुल.
7 आग सूर्य अस्त आगोर मा आव शुद्ध ठहरूस्यान; अदिक आग आव पवित्र वस्तुगोळ दा टु तिन सक्यान, यतिकी आऊन भोजन अदा हुंद.
8 जो जनावर तान देल सोताद या पशु देल हरूकु आग्याद अदरी तिनकु आव तान तान इक आव अशुद्ध माळबाळुल; ना यहोवा हुईन.
9 इदुरसाटी याजक लॉकुर नांद सौप्सकु आग्याद नियमगोळ्द पालन माळुल, हिंग ना आगुल कि आंदुर अवरी अपवित्र माळकु पाप इन भार नेगुल, अदिक इदुर कारण सोतोगुल; ना आंदरी पवित्र माळावाळा यहोवा हुईन.
10 “पराया कुल इन जन, यातोदारा पवित्र वस्तु उक तिनबाळुल, चाहे आव याजक उन अतिथी ईरूल या मजदुर ईरूल, तो भी आव यातोदारा पवित्र वस्तु तिनबाळुल.
11 अगर याजक यातोवारा दास उक पैस्या कोटकु कोमुल, रा आ दास अदुर दा टु तिन सकतान; अदिक जो याजक उन मान्ना दा पैदा आग्यान आंदुर भी आऊन भोजन दा टु तिनुल.
12 अदिक अगर याजक उन पोर पराया कुल इन यावारा गंळ्स से मदा आगुल, रा आव भेंट माळ्द पवित्र वस्तुगोळ दा टु तिनबाळुल.
13 अगर याजक उन पोर रांड्यागीत या छोळचिट्टी माळकु ईरूल, अदिक आकीन औलाद ईर बाळुल, अदिक आक तान स्यांण पनी इन अवस्था अन्द रीती इन अनुसार तान आप्प उन मान्ना दा ईरतीदार, रा आक तान आप्प उन भोजन दा टु तिनुल; पर पराया कुल इन यावारा अदुर दा टु तिनबाळुल.”
14 “अदिक अगर यावारा मंळसा यातोदारा पवित्र वस्तु दा टु येनारा भुल देल तिन कोमुल, रा आव अदुर पाचवा भाग वाळुस्कु अदरी याजक उक तुमकु कोळुल.
15 आंदुर इस्राएलीगोळ्द पवित्र माळ्द वस्तुगोळ इक, अवरी आंदुर यहोवा अन्द साटी येरसुल, अपवित्र माळबाळुल.
16 आंदुर आंदरी तान पवित्र वस्तुगोळ दा टु तिनस्कु आंदुर से अपराध इन दोष नेगसुसबाळुल; ना आंदरी पवित्र माळावाळा यहोवा हुईन.”
17 बाक यहोवा मूसा से अंदुन,
18 “हारून अदिक आऊन पारगोळ से अदिक इस्राएलीगोळ इक समझुसकु अन की इस्राएल इन घराना या इस्राएलीगोळ दा ईरावाळेर परदेशीगोळ दा टु यावारा यती ईरबाळुल, जो मन्नत या स्वेच्छाबलि माळोर साटी यहोवा अक यावारा होमबली येरसुल,
19 रा तान निमित्त ग्रहण योग्य ठहरूसोर साटी पालस्द पशु दा टु वस्ता या मर्री या म्यांडा दा टु तंदरूस्त नर येर्सकु आगुल.
20 अदुर्दा यातोदारा दोष ईरूल अदरी येर्सबाळेतीर; यतिकी अद नीम्द निमित्त ग्रहण योग्य ठहरूसतीदील.
21 अदिक जो यावारा पालस्द पशु या म्यांडा-मर्रगोळ दा टु विशेष वस्तु मन्नत माळोर साटी या स्वेच्छाबलि इन साटी यहोवा अक मेल-मिलाप बली येरसुल, रा ग्रहण आगोर साटी अवश्य आद कि आव निर्दोष आगुल, आऊन दा यातोदारा भी दोष ईरबाळुल.
22 जो कुढ्ढ या मय इन मुरकु या लूला ईरूल, अथवा आऊन दा फ्वाळा या पपळी या खुजली ईरूल, हिंग चीजगोळी यहोवा अन्द साटी येर्सबाळेतीर, अवरी होमबली मा यहोवा अन्द साटी बली येर्सबाळेतीर.
23 यातोदारा वस्ता या म्यांडा या व्हात इन यातोदारा अंग येक्कुल या कम ईरूल अदरी स्वेच्छाबलि इन साटी येर्स सकतीर, लेकीन मन्नत पुरा माळोर साटी अद ग्रहण माळकु आगतीदिल.
24 यारव अंड दब्सकु या कुचलस्कु या मुरकु या कडुकु ईरूल अवरी यहोवा साटी येर्स बाळेतीर, अदिक तान द्याश दा भी हिंग क्याल्सा माळबाळेतीर.”
25 “बाक ईऊर दा टु यारीकारा अक नीव तान परमेश्वर उन भोजन जानस्कु यावारा परदेशी से हुळकु येर्सबाळेतीर; यतिकी अऊर्दा दोष आद, इदुरसाटी अव नीम्द निमित्त ग्रहण आगतीदिल.”
26 बाक यहोवा मूसा से अंदुन,
27 “याग वस्ता या म्यांडा या मर्री पैदा आगुल, रा अद येळ दिन ताका तान मोय इन सांगुळ ईरूल; बाक आठवा दिन टु मुंद अद यहोवा अन्द होमबली येरसोर साटी ग्रहण योग्य ठहरूसीत.
28 चाहे वस्ता, चाहे म्यांडा या मर्री ईरूल, अदरी अदिक अदुर पाड्डा अक ऊंद अच दिन दा बली माळबाळेतीर.
29 अदिक याग नीव यहोवा अन्द साटी धन्यवाद इन मेल-मिलाप बली येरसीर, रा अदरी ईदा रिती देल माळेतीर यदुर देल अद ग्रहण योग्य ठहरूसुल.
30 अद अदा दिन तिनकु आगुल, अदुर्दा टु येनारा भी व्हातुर ताका ईर बाळुल; ना यहोवा हुईन.
31 “इदुरसाटी नीव नांद आग्यागोळ इक मानसेतीर अदिक पालन माळेतीर; ना यहोवा हुईन.
32 अदिक नांद पवित्र हेसुर इक अपवित्र ठहरूसबाळेतीर, यतिकी ना इस्राएलीगोळ्द न्याड्या अवश्य अच पवित्र अच मान्सकु आगाईन; ना नीम्द पवित्र माळावाळा यहोवा हुईन,
33 जो नीमी इक मिस्त्र द्याश टु तेगुकु तंदान यदुर देल नीम्द परमेश्वर बन्सकु ईराइन; ना यहोवा हुईन.”