7
इस्त्राएल इन आचरण इन पतन
1 हाय नान मा! यतिकी ना आ मंळसा अन घाई आगेगीन जो ब्यासक्या अन काय कोयदुर मा, या मिग्द अंगुर आया समय इन आखरी दा होट बरूल, नानी रा पिकुस्द अंजीर इन लालसा ईरोद, लेकीन तिनोर साटी यातोदु गुच्छा ईतीदील.
2 भक्त लॉकुर धरती मा टु नष्ट आगेग्यार, अदिक मंळसागोळ दा ऊंद भी सीधा मंळसा ईतीदील; आंदुर सप्पा च्या सप्पा कोन्नोर साटी घात हचतार, अदिक जार हचकु तान तान वार्टुर्द आहेर माळतार.
3 आंदुर तान येढ्ढु कय देल मन हचकु बुराई माळतार; हाकिम घुस बेळतान, अदिक न्यायी घुस ताकोमली तयार ईरतान, अदिक क्याचानववाळा तान मन इन दुष्टता वर्णन माळतान; ई प्रकार देल आंदुर सप्पा मिळुस्कु जालसाजी माळतार.
4 आंदुर दा टु जो सब से उत्तम आन, आव मुळ्ल इन झाळी घाई दुखदाई आन, जो सब से सीधा आन, आव मुळ्ल इन वाळागोळ से भी बेकार आन. नीन कायावाळेर माताळ्द दिन मतलब नीन दण्ड इन दिन होट बंदाद. ईग आंदुर जल्दी चमकुसेदार.
5 मान्ना हातळोर मा विश्वास माळबाळी, परममित्र मा भी भरोसा ईटबाळी; उलटा तान हिंग्स उन से भी सांभाळ्सकु माताळेतीर.
6 यतिकी पार आप्प उन अपमान माळतान, अदिक पोर मोय इन, अदिक सास्स आत्ता अन खिलाप येळतार; मंळसा अन दुश्मन आऊन मान्या नोरा जात इन लॉकुर ईरतार.
7 लेकीन ना यहोवा दी नोळतेला ईराईन, ना तान उद्धारकर्ता परमेश्वर उन हादी कायतेला ईराईन; नान परमेश्वर नान केळ्यान.
उद्धार परमेश्वर से अच
8 हे नान दुश्मनगोळ, नान मा आनन्द माळबाळ; यतिकी ह्यांग ना बिळाईन हांगा येळाईन; अदिक ह्यांग ना अंधार दा बिळाईन हांगा यहोवा नान साटी ऊजुळ इन क्याल्सा कोट्टान.
9 ना यहोवा अन खिलाप पाप माळीन, ई कारण ना आ समय ताका आऊन क्रोध इक सयन माळाईन यागासताका कि आव नान मुकदमा लळुस्कु नान न्याय चुकुस कोमालुन. आ समय आव नानी ऊजुळ दा तेगुकु तंदान, अदिक ना आऊन न्याय नोळाईन.
10 आग नान दुश्मनगोळ जो नान से ईद अनतार कि नीन परमेश्वर यहोवा येल ईत्तुन, आक भी आऊक नोळ्यार अदिक शरम देल मार्रा होचकोंडार. ना तान कण्णगोळ देल आऊक नोळाईन; आग आक हादी इन केसुर घाई हार्सकु आदार.
11 नीन वाळागोळ्द कटोद दिन आऊन सीमा वाळुस्कु आदीत.
12 आ दिशी अश्शूर से, अदिक मिस्त्र अन नगरगोळ से अदिक मिस्त्र अदिक फरात गांगा अन बीच इन, अदिक समुद्र समुद्र अदिक पहाळी पहाळी इन बीच इन द्याशगोळ दा टु लॉकुर नीन हात्ती बंदार.
13 तरी भी धरती मा ईरावाळेर कारण अदिक आंदुर बेकार क्याल्सागोळ कारण उजाळ अच ईत्तीत.
इस्त्राएल मा परमेश्वर उन दया
14 नी कोल हुडुकु तान प्रजा अन चरवाही माळ, मतलब तान निज भाग इन आळ मर्रीगोळ्द, जो कर्म्मेल इन आळी दा ब्यार्र कुरताव; अव पूर्वकाल इन घाई बाशान अदिक गिलाद द्याश दा आळ्सतेला ईरूल.
15 ह्यांग कि मिस्त्र द्याश दा टु नीन होटकु बरोद दिनगोळ दा, हांगा ईग ना आऊक अदभुत क्याल्सा तोर्साईन.
16 सप्पा राज्य नोळकु तान सप्पा पराक्रम इन बारा दा सरमुस्यार; आंदुर तान मार्रा अक कय देल छुपुस्यार, अदिक आंदुर कीवगोळ बयरा आगेदव.
17 आंदुर हाव घाई मुण्ण नेक्यार, अदिक जमीन मा रेंग्सावाळा जन्तुगोळ घाई तान ख्वादारा दा टु नळ्गतेला होट्टार, आंदुर नाम परमेश्वर यहोवा अन हात्ती नळ्गतेला बंदार, अदिक आंदुर नीन से अंज्यार.
18 नीन घाई परमेश्वर येल आन जो अन्याय इक क्षमा माळुल अदिक तान निज भाग इन ऊळ्द लॉकुर्द अपराध इक मुच्च बुळुल? आव तान क्रोध इक हमेशा बनुस्कु ईरालुन, यतिकी आव करुणा से प्रीती ईटतान.
19 आव मात्त नाम मा दया माळ्यान, अदिक नाम अन्याय इन क्याल्सागोळी दुर माळ्यान. नी आंदुर सप्पा पापगोळी गयरा समुद्र दा हाक्क बुट्या.
20 नी याकूब उन बारा दा आ सच्चाई, अदिक अब्राहम उन बारा दा आ करुणा पुरा माळ्या, यदुर किर्या नी प्राचीनकाल इन दिनगोळ टु हुडुकु ईगासताका नाम पुर्वजगोळ से तिनतेला बंद्या.